റോഡിലെ കിടങ്ങിൽ വീണ് ഇരുചക്രവാഹനം രണ്ടായി മുറിഞ്ഞു

പന്തീരാങ്കാവ്: റോഡിലെ കിടങ്ങിൽ ചാടി ഇരുചക്രവാഹനം രണ്ടായി മുറിഞ്ഞു. പന്തീരാങ്കാവ് ചാലിക്കര അസിം അൻസാറിന്റെ വാഹനമാണ് ജലനിധിക്കായി കിളയെടുത്ത വലിയ കുഴിയിൽ വീണത്. ദേശീയപാതയിൽനിന്ന് പന്തീരാങ്കാവ് അങ്ങാടിയിലേക്കുള്ള റോഡിലാണ് മാസങ്ങളായി കുഴി അപകടം വരുത്തിവെക്കുന്നത്. ദിവസങ്ങൾക്കു മുമ്പ് ഓട്ടോ കുഴിയിൽ ചാടി യാത്രക്കാർക്ക് പരിക്കേറ്റിരുന്നു. ബസുകൾ കുഴിയിൽ ചാടി യന്ത്രത്തകരാറ് പതിവായതോടെ ഇടക്ക് ബസ് ജീവനക്കാർതന്നെ മുൻകൈയെടുത്ത് റോഡ് അറ്റകുറ്റപ്പണി നടത്തിയിരുന്നെങ്കിലും മഴ പെയ്തതോടെ പൂർവസ്ഥിതിയിലായി. ദേശീയപാതയിലെ പന്തീരാങ്കാവ് ജങ്ഷനിൽ ഗതാഗത കുരുക്കുണ്ടാവുമ്പോഴെല്ലാം യാത്രക്കാർ ഉപയോഗിക്കുന്ന റോഡിലാണ് അപകടകരമായ വലിയ കിടങ്ങ്. ശനിയാഴ്ച മറ്റൊരു ബൈക്കും അപകടത്തിൽപെട്ടിരുന്നു. ഇരുവാഹനങ്ങളിലെയും യാത്രക്കാർ ഭാഗ്യംകൊണ്ടാണ് പരിക്കില്ലാതെ രക്ഷപ്പെട്ടത്.