Top
Begin typing your search above and press return to search.
keyboard_arrow_down
Login
exit_to_app
exit_to_app
Homechevron_rightNewschevron_rightLocal Newschevron_rightKottayamchevron_rightതിരുവാഭരണ ഘോഷയാത്ര...

തിരുവാഭരണ ഘോഷയാത്ര പുറപ്പെട്ടു

text_fields
bookmark_border
പന്തളം: മകരസംക്രമ സന്ധ്യയില്‍ ശബരിമലയിൽ അയ്യപ്പവിഗ്രഹത്തിൽ ചാര്‍ത്താനുള്ള തിരുവാഭരണങ്ങള്‍ വഹിച്ചുള്ള ഘോഷയാത്ര ഭക്തിസാന്ദ്രമായ അന്തരീക്ഷത്തിൽ പന്തളത്തുനിന്ന്​ പുറപ്പെട്ടു. ശരണംവിളികളാൽ മുഖരിതമായ അന്തരീക്ഷത്തിൽ നൂറുകണക്കിന് അയ്യപ്പഭക്തരുടെ അകമ്പടിയോടെയാണ് പന്തളം വലിയ കോയിക്കൽ ശ്രീധർമ ശാസ്​ത ക്ഷേത്രത്തിൽനിന്ന്​ യാത്രയായത്. കോവിഡ് മാനദണ്ഡങ്ങൾ പാലിച്ചുതന്നെ ആചാരപരമായ എല്ലാ ചടങ്ങുകളും പൂർത്തിയാക്കിയാണ് ഘോഷയാത്ര പുറപ്പെട്ടത്. കൊട്ടാരം കുടുംബാംഗങ്ങൾക്ക് ആശൂലമായതിനാൽ ഇത്തവണ രാജപ്രതിനിധിയില്ലാതെയാണ്​ ഘോഷയാത്ര പുറപ്പെട്ടത്. രാജപ്രതിനിധിക്ക്​ പകരം ഗുരുസ്വാമിയാണ് സംഘാംഗങ്ങളെ മാലയിട്ട് അനുഗ്രഹിക്കുക. ചൊവ്വാഴ്ച രാവിലെ 11ന്​ തിരുവിതാംകൂർ ദേവസ്വം ബോര്‍ഡ് പ്രസിഡൻറ്​ എൻ. വാസു, ബോർഡ് അംഗം കെ.എസ്. രവി എന്നിവരുടെ നേതൃത്വത്തിൽ പന്തളം കൊട്ടാരം നിർവാഹകസംഘം പ്രസിഡൻറ്​ പി.ജി. ശശികുമാർ വർമ, പി.എൻ. നാരായണ വർമ എന്നിവരിൽനിന്ന്​ തിരുവാഭരണങ്ങൾ ഏറ്റുവാങ്ങി. ഗുരുസ്വാമിയുടെ നേതൃത്വത്തിൽ ഇവ ക്ഷേത്രത്തിലെത്തിച്ചു. ആചാര വിധിപ്രകാരം ശ്രീകോവിലിന്​ മുന്നിൽ തിരുവാഭരണ പേടകം തുറന്നു​െവച്ചു. 12.45ന് മേല്‍ശാന്തി പടിഞ്ഞാറേമഠം മഹേഷ് കുമാർ പോറ്റി പേടകവാഹക സംഘാംഗങ്ങൾക്ക്​ മാലകൾ പൂജിച്ചുനൽകി. 12.55ന്​ മേല്‍ശാന്തി പേടകത്തിനു നീരാഞ്​ജനമുഴിഞ്ഞ് ചടങ്ങുകള്‍ പൂര്‍ത്തിയാക്കി. ക്ഷേത്രത്തിന്​ മുകളിൽ കൃഷ്ണപ്പരുന്ത്​ വട്ടമിട്ടു പറന്നതോടെ ഉച്ചക്ക് ഒന്നിന്​ ഗുരുസ്വാമി കുളത്തിനാലില്‍ ഗംഗാധരന്‍ പിള്ള പേടകം ശിരസ്സിലേറ്റി ഘോഷയാത്ര പുറപ്പെട്ടു. കലശക്കുടവും വെള്ളിയാഭരണങ്ങളും അടങ്ങിയ കലശപ്പെട്ടിയുമായി മരുതമന ശിവന്‍പിള്ളയും കൊടിപ്പെട്ടിയുമായി കിഴക്കേത്തോട്ടത്തില്‍ പ്രതാപചന്ദ്രന്‍ നായരും അനുഗമിച്ചു. ദേവസ്വം അധികൃതരും ഘോഷയാത്രക്കൊപ്പം യാത്രതിരിച്ചു. പത്തനംതിട്ട എ.ആര്‍. ക്യാമ്പിലെ അസി. കമാൻഡൻറ്​ പി.പി. സന്തോഷ് കുമാറി​ൻെറ നേതൃത്വത്തിൽ 42 അംഗ സായുധ പൊലീസ് സംഘവും അനുഗമിക്കുന്നുണ്ട്​. ഘോഷയാത്ര രാത്രി അയിരൂര്‍ പുതിയകാവ് ദേവീക്ഷേത്രത്തില്‍ വിശ്രമിച്ചു. ബുധനാഴ്ച പുലര്‍ച്ച രണ്ടിന് അവിടെനിന്ന്​ പുറപ്പെടുന്ന സംഘം രാത്രി ളാഹ വനംവകുപ്പി​ൻെറ സത്രത്തില്‍ വിശ്രമിക്കും. 14ന്​ പുലർച്ച യാത്ര തിരിക്കുന്ന സംഘം നീലിമല കയറി അപ്പാച്ചിമേടും കടന്ന് ശബരീപീഠം വഴി ശരംകുത്തിയിലെത്തുമ്പോള്‍ ദേവസ്വം ബോര്‍ഡ് അധികൃതര്‍ വാദ്യമേളങ്ങളുടെ അകമ്പടിയോടെ കർപ്പൂരാഴിയുഴിഞ്ഞ്​ സ്വീകരിച്ച്​ സന്നിധാനത്തേക്ക് ആനയിക്കും. ആറുമണിയോടെ പതിനെട്ടാംപടി കയറി എത്തുന്ന ഗുരുസ്വാമിയില്‍നിന്ന്​ മേല്‍ശാന്തിയും തന്ത്രിയും ചേര്‍ന്ന്​ തിരുവാഭരണങ്ങള്‍ ഏറ്റുവാങ്ങി ശ്രീകോവിലിലേക്ക് കൊണ്ടുപോയി വിഗ്രഹത്തില്‍ ചാര്‍ത്തും. തുടര്‍ന്ന് ദീപാരാധനക്കായി നടതുറക്കുമ്പോള്‍ കിഴക്കന്‍ചക്രവാളത്തില്‍ മകരസംക്രമ നക്ഷത്രവും പൊന്നമ്പലമേട്ടില്‍ മകരജ്യോതിയും തെളിയും. ഇക്കുറി 5000 പേർക്ക് മാത്രമാണ് ശബരിമലയിൽ ദർശനത്തിന്​ അനുമതി. ചിത്രം: PTG Thiruvabharana Ghoshayathra പന്തളം വലിയകോയിക്കൽ ശ്രീധർമശാസ്ത ക്ഷേത്രത്തിൽനിന്ന്​ തിരുവാഭരണ ഘോഷയാത്ര പുറപ്പെടുന്നു
Show Full Article
TAGS:
Next Story