ആവശ്യം മുഴുവൻ സീറ്റും; പരമാവധി ഏഴ്​ അല്ലെങ്കിൽ എ​ട്ടെന്ന്​ കോൺഗ്രസ്​

കോട്ടയം: കേരള കോൺഗ്രസ്​ കഴിഞ്ഞ തെരഞ്ഞെടുപ്പില്‍ മത്സരിച്ച 15 സീറ്റിൽ പരമാവധി ഏഴ്​ അല്ലെങ്കിൽ എട്ടുവരെ ജോസഫ്​ വിഭാഗത്തിനു​ നൽകിയേക്കുമെന്ന്​ കോൺഗ്രസ്​ വൃത്തങ്ങൾ സൂചന നൽകി. കഴിഞ്ഞ ദിവസം തിരുവനന്തപുരത്ത്​ നടന്ന കൂടിക്കാഴ്​ചയിൽ കേരള കോണ്‍ഗ്രസ് കഴിഞ്ഞതവണ മത്സരിച്ച മുഴുവൻ സീറ്റിലും മത്സരിക്കുമെന്ന്​ പി.ജെ. ജോസഫ് വ്യക്തമാക്കിയിരുന്നു. മധ്യകേരളത്തിലും വടക്കൻ ജില്ലകളിലുമായി 15 സീറ്റിൽ​ കേരള കോൺഗ്രസ്​ കഴിഞ്ഞ തെരഞ്ഞെടുപ്പിൽ മത്സരിച്ചു. 11 സീറ്റിൽ മാണി വിഭാഗവും നാലിൽ ജോസഫ്​ പക്ഷവും.​ എന്നാൽ, ആറിടത്ത്​ മാത്രമാണ്​ ജയിക്കാനായത്​. െതാടുപുഴയും കടുത്തുരുത്തിയുമാണ്​ ജോസഫ്​ വിജയിച്ച മണ്ഡലങ്ങൾ. ഈ സാഹചര്യത്തിൽ അതിരുകടന്ന അവകാശവാദം ഉചിതമല്ലെന്നും കോൺഗ്രസ്​ ചൂണ്ടിക്കാട്ടുന്നു. കോണ്‍ഗ്രസുമായി ഇക്കാര്യത്തില്‍ ചര്‍ച്ച തുടരുമെന്ന നിലപാടിലാണ്​ പി.ജെ. ജോസഫ്. ജോസ്​ വിഭാഗത്തി​ൻെറ സീറ്റുകളിൽ നോട്ടമിട്ട്​ കോൺഗ്രസിലും കേരള കോൺഗ്രസിലുമായി മുപ്പതോളം പേർ രംഗത്തുണ്ട്​. അതുകൊണ്ടുതന്നെ സീറ്റ്​ നിർണയം യു.ഡി.എഫിന്​ കടുത്ത തലവേദനയാകും സൃഷ്​ടിക്കുക. തദ്ദേശ തെരഞ്ഞെടുപ്പിലും തർക്കം ശക്തമാകൂമെന്നാണ്​ സൂചന. പ്രത്യേകിച്ച്​ ജില്ല പഞ്ചായത്ത്​ തെരഞ്ഞെടുപ്പിൽ. സി.എ.എം