കള്ളനോട്ട്​ കേസ്​: പ്രതികളെ റിമാൻഡ് ചെയ്തു

തിരുവല്ല: ഹോം സ്​റ്റേകളിലും ആഡംബര ഫ്ലാറ്റുകളിലും താമസിച്ച് വ്യാജനോട്ട് നിർമിച്ച് വിതരണം നടത്തിയ കേസിൽ പിടിയിലായ പ്രതികളെ കോടതിയിൽ ഹാജരാക്കി റിമാൻഡ് ചെയ്തു. കേസിലെ മുഖ്യപ്രതി ശ്രീകണ്​ഠപുരം ചെമ്പേലി തട്ടപ്പറമ്പിൽ വീട്ടിൽ എസ്. ഷിബു (43), ഷിബുവി​ൻെറ ഭാര്യ സുകന്യ (31), ഷിബുവി​ൻെറ സഹോദരൻ തട്ടാപ്പറമ്പിൽ വീട്ടിൽ എസ്. സജയൻ (35) , കൊട്ടാരക്കര ജവഹർനഗർ ഗാന്ധിമുക്ക് ലക്ഷം വീട് കോളനിയിൽ സുധീർ (40) എന്നിവരെയാണ് ശനിയാഴ്​ച ഉച്ചയോടെ തിരുവല്ല കോടതിയിൽ ഹാജരാക്കി റിമാൻഡ് ചെയ്തത്. ഷിബുവി​ൻെറ പിതൃസഹോദര പുത്രൻ കാഞ്ഞിരപ്പള്ളി കൊടുങ്ങൂർ തട്ടാപ്പറമ്പിൽ വീട്ടിൽ സജിയെ (38) വ്യാഴാഴ്ച റിമാൻഡ് ചെയ്തിരുന്നു. 200, 500, 2000 രൂപയുടെ നോട്ടുകളാണ് സംഘം പ്രധാനമായും നിർമിച്ചിരുന്നത്. തിരുവല്ല കുറ്റപ്പുഴയിലെ ഹോം സ്​റ്റേ കേന്ദ്രീകരിച്ച് നോട്ട് നിർമിച്ച സംഭവത്തിൽ രജിസ്​റ്റർ ചെയ്ത കേസിലാണ് പ്രതികൾ പിടിയിലായത്. സുകന്യയെ അട്ടക്കുളങ്ങര വനിത ജയിലിലും മറ്റ് നാലുപേരെ ആറ്റിങ്ങൽ സബ് ജയിലുമാണ് റിമാൻഡിൽ പാർപ്പിച്ചിരിക്കുന്നത്. കൂടുതൽ ചോദ്യം ചെയ്യുന്നതിനായി ഇവരെ കസ്​റ്റഡിയിൽ ലഭിക്കുന്നതിനുള്ള അപേക്ഷ അടുത്ത ദിവസം നൽകുമെന്ന് ഡിവൈ.എസ്.പി ടി. രാജപ്പൻ പറഞ്ഞു.