കാസർകോട്​ നഗരസഭ സ്​റ്റാൻഡിങ്​ കമ്മിറ്റി: ലീഗ്​ കൗൺസിലർമാർ രാജി തീരുമാനം പിൻവലിച്ചു

കാസർകോട്: നഗരസഭ സ്​റ്റാൻഡിങ്​ കമ്മിറ്റി ബി.ജെ.പിക്ക് ലഭിച്ചതിൽ പ്രതിഷേധിച്ച് ലീഗ്​ കൗൺസിലർമാർ നടത്തിയ രാജി പ്രഖ്യാപനം പിൻവലിച്ചു. നേതൃത്വത്തി​‍ൻെറ പിടിപ്പുകേടാണ് കാരണമെന്നാരോപിച്ച് ലീഗ് കൗണ്‍സിലര്‍മാരായ മമ്മു ചാലയും അസ്മ മുഹമ്മദും പാർട്ടി നേതൃത്വത്തിനു രാജിക്കത്ത് നൽകിയിരുന്നു. എന്നാൽ, വാർഡ് കമ്മിറ്റികളുടെ നിർദേശത്തി​‍ൻെറ അടിസ്​ഥാനത്തിൽ സ്ഥാനം രാജിവെക്കേണ്ടെന്ന്​ ഇരുവരും തീരുമാനിച്ചു. നഗരസഭയിലെ 12ാം വാര്‍ഡ് അംഗമാണ് മമ്മുചാല. ബന്ധുവായ അസ്മ മുഹമ്മദ് 13ാം വാര്‍ഡ് അംഗമാണ്. ബി.ജെ.പിയെ അകറ്റിനിർത്തുന്നതിൽ പാർട്ടിക്ക് സംഭവിച്ച ജാഗ്രതക്കുറവ് മേൽ കമ്മിറ്റിയെ അറിയിക്കാമെന്ന ധാരണയിൽ വാർഡ് കമ്മിറ്റിയുടെ നിർദേശം മാനിച്ചാണ് രാജി തീരുമാനം പിൻവലിച്ചത്.