മഞ്ചേശ്വരം സി.എച്ച്.സിയിൽ ജനപ്രതിനിധികൾ കുത്തിയിരിപ്പ് സമരം നടത്തി

Upl CHC Manjeshwar Protest മഞ്ചേശ്വരം സാമൂഹിക ആശുപത്രിയിൽ ജനപ്രതിനിധികൾ നടത്തിയ കുത്തിയിരിപ്പ് സമരം മഞ്ചേശ്വരം: കോവിഡി​ൻെറ പേരിൽ, കുട്ടികൾക്കുള്ള കുത്തിവെപ്പിന് മഞ്ചേശ്വരം സി.എച്ച്​.സിയിൽ എത്തിയവർക്ക് കുത്തിവെപ്പ് നടത്താതെ തിരിച്ചയക്കാനുള്ള നടപടിയിൽ പ്രതിഷേധിച്ച്​ ജനപ്രതിനിധികൾ കുത്തിയിരിപ്പ് സമരം നടത്തി. കുത്തിവെപ്പിന് വന്ന അമ്മമാർക്ക് കോവിഡ് നെഗറ്റിവ് സർട്ടിഫിക്കറ്റ് വേണമെന്ന നിലപാടിൽ ഉറച്ചുനിന്ന മെഡിക്കൽ ഓഫിസർ കുട്ടികൾക്ക് കുത്തി വെപ്പെടുക്കാൻ തയാറായില്ല. വിഷയം നാട്ടുകാർ എം.എൽ.എ എം.സി. ഖമറുദ്ദീ​ൻെറയും ബ്ലോക്ക് പഞ്ചായത്ത് പ്രസിഡൻറ​്​ എ.കെ.എം. അഷ്റഫി​ൻെറയും ശ്രദ്ധയിൽപെടുത്തി. ജില്ല മെഡിക്കൽ ഓഫിസറെ ഇക്കാര്യം അറിയിക്കുകയും ജില്ല മെഡിക്കൽ ഓഫിസർ കുത്തിവെപ്പെടുക്കാൻ ഡോക്ടറോട് ആവശ്യപ്പെട്ടിട്ടും ഡോക്ടർ തയാറായില്ല. ഇതിനെ തുടർന്ന് ബ്ലോക്ക് പഞ്ചായത്ത് പ്രസിഡൻറ്​ എ.കെ.എം. അഷ്‌റഫ്, ആരോഗ്യ വിദ്യാഭ്യാസ സ്​റ്റാൻഡിങ്​ കമ്മിറ്റി ചെയർമാൻ മുസ്തഫ ഉദ്യാവർ, മഞ്ചേശ്വരം ഗ്രാമപഞ്ചായത്ത് വികസന സ്​റ്റാൻഡിങ്​ കമ്മിറ്റി ചെയർമാൻ മുക്​താർ ഉദ്യാവർ, ക്ഷേമകാര്യ സ്​റ്റാൻഡിങ്​ കമ്മിറ്റി ചെയർമാൻ ഷംസീന അബ്​ദുല്ല, ആരോഗ്യ വിദ്യാഭ്യാസ സ്​റ്റാൻഡിങ്​ കമ്മിറ്റി ചെയർമാൻ കെ.എം.കെ. അബ്​ദുറഹ്‌മാൻ ഹാജി, ഗ്രാമ പഞ്ചായത്ത് അംഗം അബ്​ദുല്ല ഗുഡ്ഡഗേരി, അബ്​ദുല്ല ഖജ, ഹമീദ്‌ ഹൊസങ്കടി, ഇദ്രിസ് മഞ്ചേശ്വരം തുടങ്ങിയവർ കുത്തിയിരിപ്പ് സമരം നടത്തുകയും ചെയ്തു. തുടർന്ന് എ.കെ.എം. അഷ്റഫി​ൻെറ നേതൃത്വത്തിൽ ഉദ്യോഗസ്​ഥരുമായി നടത്തിയ ചർച്ചകൾക്ക് ശേഷമാണ് കുട്ടികൾക്ക്​ കുത്തിവെപ്പ്​​ നൽകിയത്. ഇതിനെ തുടർന്ന് പ്രതിഷേധ സമരം അവസാനിപ്പിച്ചു. കേരളത്തിൽ എവിടെയും ഇല്ലാത്ത വിധത്തിലുള്ള ഒരു നിയമ വാഴ്ചയാണ് മഞ്ചേശ്വരം സി.എച്ച്.സി മെഡിക്കൽ ഓഫിസറും സ്​റ്റാഫ് നഴ്‌സും ചേർന്ന് നടത്തുന്നതെന്ന് പ്രതിഷേധക്കാർ പറഞ്ഞു. ഇരുവർക്കുമെതിരെ നടപടിയെടുക്കണമെന്നാവശ്യപ്പെട്ട്​ മുഖ്യമന്ത്രിക്കും ആരോഗ്യ മന്ത്രിക്കും ആരോഗ്യ ഡയറക്ടർക്കും ബ്ലോക്ക് പഞ്ചായത്ത് പരാതി നൽകിയിട്ടുണ്ട്.