ഓട്ടുപാത്രങ്ങൾ വാടകക്കെടുത്ത് വിൽപന; യുവാവ് പിടിയിൽ

കണ്ണൂർ: സദ്യക്കും മറ്റും വാടകക്ക് സാധനങ്ങൾ നൽകുന്ന കടയിൽ നിന്നും വിലപിടിപ്പുള്ള ഓട്ടുരുളിയും ചട്ടുകങ്ങളും വാടകക്കുവാങ്ങി മറിച്ചുവിറ്റ് ആഡംബര ജീവിതം നയിക്കുന്ന സംഘത്തിലെ യുവാവ് അറസ്റ്റിൽ. ഇരിക്കൂർ കോളയാട് ഡയനാമോ ഗ്രൗണ്ടിനുസമീപം താമസിക്കുന്ന വി.കെ. രോഹിത്തിനെയാണ് (22) ടൗൺ പൊലീസ് അറസ്റ്റ് ചെയ്തത്. ഫെബ്രുവരി 19ന് കണ്ണൂർ തളാപ്പിലെ ബിജുവിന്റെ ഉടമസ്ഥതയിലുള്ള വാടക സ്റ്റോർസിൽനിന്ന് 20 കിലോയോളം തൂക്കമുള്ള രണ്ട് ഉരുളിയും 15 കിലോ തൂക്കം വരുന്ന ഓട്ടു ചട്ടുകവും വാടകക്കെടുത്ത സംഘം തിരിച്ചുനൽകാതെ ആക്രിക്കടകളിൽ വില്പന നടത്തുകയായിരുന്നു. ബിജുവി​ന്‍റെ പരാതിയിൽ പൊലീസ് നടത്തിയ അന്വേഷണത്തിൽ മയ്യിൽ, കാട്ടാമ്പള്ളി, ശ്രീകണ്ഠപുരം, ചക്കരക്കല്ല് എന്നിവിടങ്ങളിലെ ആക്രിക്കടകളിൽ ഇവ വില്പന നടത്തിയതായി കണ്ടെത്തി. വിറ്റുകിട്ടിയ പണം ഉപയോഗിച്ച് സംഘം മംഗളൂരുവിലും ബംഗളൂരുവിലും ചുറ്റിക്കറങ്ങുകയായിരുന്നു. സിറ്റി സ്റ്റേഷൻ പരിധിയിലെ ദിലീപി​ന്‍റെ വാടക സ്റ്റോറിലും സംഘം തട്ടിപ്പ് നടത്തിയതായി കണ്ടെത്തി. പ്രതിയെ കോടതിയിൽ ഹാജരാക്കി. പടം