ഡോ. കെ.വി. ഫിലോമിന ശ്രീകണ്​ഠപുരം നഗരസഭ ചെയർപേഴ്​സനാകും

ശ്രീകണ്ഠപുരം: കെ.പി.സി.സി സെക്രട്ടറിയും മഹിള കോൺഗ്രസ് സംസ്ഥാന ജന.സെക്രട്ടറിയുമായ ഡോ.കെ.വി. ഫിലോമിന ശ്രീകണ്ഠപുരം നഗരസഭ ചെയർപേഴ്സനാകും. ശനിയാഴ്ച ഡി.സി.സി പ്രസിഡൻറ് സതീശൻ പാച്ചേനിയുടെ നേതൃത്വത്തിൽ കൗൺസിലർമാർക്കിടയിൽ വോട്ടെടുപ്പ് നടത്തിയാണ് ഫിലോമിനയെ തിരഞ്ഞെടുത്തത്. കെ.വി. ഫിലോമിനയുടെ പേരിനൊപ്പം മറ്റ് ചില പേരുകൾ കൂടി ഉയർന്നതോടെയാണ് വോട്ടെടുപ്പ് നടത്തേണ്ടിവന്നത്. നഗരസഭയിലെ പന്ന്യാൽ വാർഡിൽ നിന്നാണ് ഫിലോമിന വിജയിച്ചത്. 2010 മുതൽ 2015 വരെ ജില്ല പഞ്ചായത്ത് അംഗമായിരുന്നു. ശ്രീകണ്ഠപുരം എസ്.ഇ.എസ് കോളജ്​ മലയാളവിഭാഗം മേധാവി, യു.ജി.സി വിദഗ്ധ സമിതി അംഗം എന്നീ നിലകളിൽ പ്രവർത്തിച്ചിട്ടുണ്ട്. തലശ്ശേരി അതിരൂപത പാസ്​റ്ററൽ കൗൺസിൽ അംഗമാണ്.