സ്ഥാനാർഥികൾക്ക് മർദനമേറ്റു

പയ്യന്നൂർ: എരമം -കുറ്റൂർ ഗ്രാമപഞ്ചായത്തിലെ കുറ്റൂരിൽ യു.ഡി.എഫ് സ്ഥാനാർഥിക്ക് മർദനമേറ്റു. പയ്യന്നൂർ ബ്ലോക്ക്​ പഞ്ചായത്ത് മാതമംഗലം ഡിവിഷൻ യു.ഡി.എഫ് സ്ഥാനാർഥിയും യൂത്ത് കോൺഗ്രസ് മുൻ മണ്ഡലം പ്രസിഡൻറുമായ ശ്രീധരൻ ആലന്തട്ടയെയാണ് പരിക്കുകളോടെ പയ്യന്നൂർ പ്രിയദർശിനി ആശുപത്രിയിൽ പ്രവേശിപ്പിച്ചത്. വൈകീട്ട് 4.10 ഓടെയാണ് സംഭവം. കുറ്റൂർ യു.പി സ്​കൂളിലെ ബൂത്തിൽ ബൂത്ത് ഏജൻറ്​ കൂടിയായ ശ്രീധരനെ ബൂത്തിൽ കയറി മർദിച്ചതായാണ് പരാതി. പയ്യന്നൂർ നഗരസഭയിലെ 44ാം വാർഡിൽ യു.ഡി.എഫ് സ്വതന്ത്ര സ്ഥാനാർഥിയും ബൂത്ത് ഏജൻറുമായ പി.ടി.പി സജിദയെ ഒരു സംഘം എൽ.ഡി.എഫ് പ്രവർത്തകർ തടഞ്ഞുവെച്ച് ഭീഷണിപ്പെടുത്തുകയും ചീഫ് ഏജൻറ്​ ടി.കെ. മുഹമ്മദ് റിയാസിനെ മർദിക്കുകയും ചെയ്​തതായി പരാതിയുണ്ട്. പയ്യന്നൂർ നഗരസഭ വാർഡ് മൂന്നിൽ വെള്ളൂർ ഈസ്​റ്റ്​ ജനത സൊസൈറ്റി ബൂത്തിൽ യു.ഡി.എഫ് സ്ഥാനാർഥി കച്ചേരി രമേശൻ, ബൂത്ത് ഏജൻറ്​ എന്നിവരെ പോളിങ്​ സ്​റ്റേഷനിൽ ഒരു സംഘം മർദിച്ചതായും പരാതിയുണ്ട്. തായിനേരിയിൽ മുൻ കൗൺസിലർ മുസ്​ലിം ലീഗിലെ എം.കെ. ഷമീമയെ ഒരു സംഘം തടഞ്ഞുവെച്ചതായും യു.ഡി.എഫ് ആരോപിച്ചു. രാമന്തളി ഗ്രാമപഞ്ചായത്തിലെ മൂന്നാം വാർഡിൽ യു.ഡി.എഫ് ഏജൻറുമാരായ ടി.പി. അഫ്​സൽ, സി.എം.കെ. കമറുസമാൻ എന്നിവർക്ക് മർദനമേറ്റു. കാങ്കോൽ-ആലപ്പാമ്പ് ഗ്രാമപഞ്ചായത്ത് മൂന്നാം വാർഡ് യു.ഡി.എഫ് സ്ഥാനാർഥി ഉഷയെ മർദനമേറ്റ പരിക്കുകളോടെ പ്രിയദർശിനി ആശുപത്രിയിൽ പ്രവേശിപ്പിച്ചു.