പിതൃസഹോദരനെയും കുടുംബാംഗങ്ങളെയും യുവാവ്​ കുത്തിപ്പരിക്കേല്‍പിച്ചു

ചെറുപുഴ: ജോസ്ഗിരിയില്‍ ബന്ധുവായ യുവാവ് പിതൃസഹോദരനെയും കുടുംബാംഗങ്ങളെയും കുത്തിപ്പരിക്കേല്‍പിച്ചു. ജോസ്ഗിരി കട്ടപ്പള്ളിയിലെ പൊട്ടക്കല്‍ പൗലോസ് (78), ഭാര്യ റാഹേല്‍ (72), ഇവരുടെ മകന്‍ ഡേവിഡ് (47) എന്നിവര്‍ക്കാണ് കുത്തേറ്റത്. പൗലോസി​ൻെറ സഹോദരപുത്രന്‍ ബിനോയ് (40) ആണ് ആക്രമിച്ചതെന്നു പൊലീസ് പറഞ്ഞു. ഞായറാഴ്ച രാത്രി എട്ടോടെയായിരുന്നു സംഭവം. പകല്‍ യുവാവ് ഇവരുടെ വീട്ടിലെത്തി ഭീഷണി മുഴക്കിയിരുന്നതായും പറയുന്നു. നാട്ടുകാര്‍ വിവരമറിയിച്ചതിനെ തുടര്‍ന്ന്​ ചെറുപുഴ പൊലീസ് എത്തിയശേഷമാണ് കുത്തേറ്റവരെ ആശുപത്രിയിലേക്ക് കൊണ്ടുപോയത്. അക്രമം നടത്തിയശേഷം യുവാവ് ഒളിവില്‍ പോയി. പരിക്കേറ്റവരെ പരിയാരം മെഡിക്കല്‍ കോളജ്​ ആശുപത്രിയിൽ പ്രവേശിപ്പിച്ചു.