തീരദേശ റോഡ്​ പ്രവൃത്തി തുടങ്ങി

പയ്യന്നൂർ: ഹാർബർ എൻജിനീയറിങ് വകുപ്പ് മുഖേന പണം അനുവദിച്ച പയ്യന്നൂർ മണ്ഡലത്തിലെ തീരദേശ റോഡുകളുടെ മണ്ഡലംതല പ്രവൃത്തി ഉദ്​ഘാടനം മന്ത്രി ജെ. മേഴ്സിക്കുട്ടിയമ്മ ഓൺലൈനായി നിർവഹിച്ചു. രാമന്തളി പഞ്ചായത്ത് ഓഡിറ്റോറിയത്തിൽ നടന്ന ചടങ്ങിൽ സി. കൃഷ്ണൻ എം.എൽ.എ അധ്യക്ഷതവഹിച്ചു. രാമന്തളി ഗ്രാമപഞ്ചായത്ത്, പയ്യന്നൂർ നഗരസഭ എന്നീ തദ്ദേശ സ്ഥാപനങ്ങളിലെ ഒമ്പത് റോഡുകളാണ് പദ്ധതിയിൽ ഉൾപ്പെട്ടിട്ടുള്ളത്. പയ്യന്നൂർ നഗരസഭ -കണ്ടങ്കാളി സ്കൂൾ -കിഴക്കേ കണ്ടങ്കാളി റോഡ് 29 ലക്ഷം, കണ്ടങ്കാളി സ്കൂൾ റെയിൽവേ സ്‌റ്റേഷൻ റോഡ് 51. 20, പെരുമ്പ കാപ്പാട് റോഡ് 56.50, കാനായി തോട്ടം കടവ് മീങ്കുഴി ഡാം റോഡ് 26, രാമന്തളി ഗ്രാമപഞ്ചായത്ത് -മാന്താൻ തോട് നീലകരച്ചാൽ റോഡ് 14.90, എട്ടിക്കുളം പി.എച്ച്.സി നിരപ്പൻചാൽ ലിങ്ക് റോഡ് നവീകരണവും കൽവർട്ട്​ നിർമാണവും 22, കൊവ്വപ്പുറം കിഴക്ക് ജനകീയ റോഡ് 29.25, ശ്രീദുർഗ പെരിങ്ങവയൽ റോഡ് 27.30, കിണർമുക്ക് മുതുകുന്ന് റോഡ് 20.20 എന്നീ പ്രവൃത്തികളാണ് പദ്ധതിയിലുള്ളത്.