പവർ ഗ്രിഡ് കോർപറേഷൻ അധികൃതർ മുണ്ടേരി സ്​കൂൾ സന്ദർശിച്ചു

കണ്ണൂർ: പവർ ഗ്രിഡ് കോർപറേഷൻ ഉദ്യോഗസ്​ഥർ സി.എസ്.ആർ ഫണ്ടിൽ നിന്ന്​ അനുവദിച്ച പദ്ധതി പ്രവർത്തനം അവലോകനം ചെയ്യുന്നതിന് മുണ്ടേരി ഹയർ സെക്കൻഡറി സ്​കൂൾ സന്ദർശിച്ചു. കെ.കെ. രാഗേഷ് എം.പിയുടെ കൂടെയാണ് സംഘാംഗങ്ങൾ സ്​കൂൾ സന്ദർശിച്ചത്. 1.26 കോടി രൂപയുടെ പദ്ധതിയാണ് കോർപറേഷൻ, എം.പിയുടെ അഭ്യർഥന പ്രകാരം നേരത്തേ അനുവദിച്ചത്. ഹയർ സെക്കൻഡറി വിദ്യാർഥികൾക്കായി 70 കുട്ടികളെ ഉൾക്കൊള്ളാൻ പ്രാപ്​തമായ രണ്ട് പുതിയ ക്ലാസ് മുറികൾ തയാറാക്കി ഡിജിറ്റൽ സ്​റ്റുഡിയോ ക്ലാസ് മുറികളാണ് അനുവദിച്ചത്. ഇതോടൊപ്പം നാല്​ ക്ലാസ് മുറികൾ പരിഷകരിച്ച് സ്​മാർട്ട് ക്ലാസാക്കി മാറ്റാനുള്ള പദ്ധതിയും പുരോഗമിക്കുന്നുണ്ട്​. ഡെപ്യൂട്ടി ജനറൽ മാനേജർ കെ.ടി. അവിനാഷി​ൻെറ നേതൃത്വത്തിലുള്ള സംഘം പ്രവൃത്തി വിലയിരുത്തി. കെ.കെ. രാഗേഷ് എം.പി നൽകിയ പദ്ധതി പ്രകാരം പുതുതായി കണ്ണൂർ ഗവ. മെഡിക്കൽ കോളജിനും 1.15 കോടി രൂപയുടെ പദ്ധതികൾ പവർ ഗ്രിഡ് കോർപറേഷൻ അനുവദിച്ചിരുന്നു. അൾട്രാ സൗണ്ട് മെഷീൻ, വൻെറിലേറ്റർ, ആധുനിക എക്​സ് റേ യൂനിറ്റ്, ഹിമോ ഡയാലിസിസ് യൂനിറ്റ് എന്നിവയാണ് മേൽ തുക കൊണ്ട് സ്ഥാപിക്കുന്നത്​. കമ്പനി സംഘം പരിയാരം കണ്ണൂർ ഗവ. മെഡിക്കൽ കോളജും സന്ദർശിച്ചു. മുണ്ടേരിയിൽ നടന്ന വിലയിരുത്തലിൽ കമ്പനി പ്രതിനിധികൾക്കുപുറമേ കെ.കെ. രാഗേഷ് എം.പി, അസി. എക്​സിക്യുട്ടിവ് എൻജിനീയർ കെ. ശിവദാസൻ, പ്രിൻസിപ്പൽ എം. മനോജ്, ഹെഡ്​മാസ്​റ്റർ കെ.പി. ചന്ദ്രൻ, കെ. മനോജ്, മുദ്ര വിദ്യാഭ്യാസ സമിതി കൺവീനർ പി.പി. ബാബു തുടങ്ങിയവർ പങ്കെടുത്തു.