ആംബുലൻസ് തടഞ്ഞ സംഭവം: പ്രതികൾ റിമാൻഡിൽ

ആലക്കോട്: കോവിഡ് രോഗികളെയും കൊണ്ട് ആശുപത്രിയിലേക്ക് പോവുകയായിരുന്ന 108 ആംബുലൻസ് തടഞ്ഞ് ആക്രമണം നടത്തിയ രണ്ടുപേരെ ആലക്കോട് പൊലീസ് അറസ്​റ്റുചെയ്തു. രയരോം ബീംബുംകാട് സ്വദേശി തെക്കേമലയിൽ സനീഷ് (42), ചാണോക്കുണ്ട് സ്വദേശി വാളിപ്ലാക്കൽ ഷൈജു (35) എന്നിവരാണ് അറസ്​റ്റിലായത്. കഴിഞ്ഞ ശനിയാഴ്ച രാത്രി കൊട്ടയാട് കവലയിലാണ് സംഭവം. കോവിഡ് പോസിറ്റിവായ തേർത്തല്ലി സ്വദേശികളെയും കൊണ്ട് അഞ്ചരക്കണ്ടി മെഡിക്കൽ കോളജിലേക്ക് പോവുകയായിരുന്ന 108 ആംബുലൻസിന് നേരെയാണ് മദ്യലഹരിയിലായിരുന്ന സംഘം ആക്രമണം നടത്തിയത്. വാഹനം തടയുകയും ടയറി​ൻെറ കാറ്റഴിച്ചുവിടാൻ ശ്രമം നടത്തുകയും വാഹനത്തിലുണ്ടായിരുന്ന ആരോഗ്യ പ്രവർത്തകരെയും ഡ്രൈവറെയും ചീത്ത വിളിക്കുകയും രോഗികളുടെ ഫോട്ടോ മൊബൈലിൽ പകർത്തുകയും ചെയ്തു. പ്രതികൾ സഞ്ചരിച്ച വാഹനം പൊലീസ് കസ്​റ്റഡിയിലെടുത്തിട്ടുണ്ട്. ആലക്കോട് സി.ഐ കെ.ജെ. വിനോയിയുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്​.