അഴിയൂർ ഗ്രാമപഞ്ചായത്തിന്​ ശുചിത്വ പദവി

മാഹി: അഴിയൂർ ഗ്രാമപഞ്ചായത്ത് സംസ്ഥാന സർക്കാറി‍ൻെറ ശുചിത്വ പദവി സ്വന്തമാക്കി. നൂറിൽ 82 മാർക്കാണ്​ നേടിയത്​. മാലിന്യ സംസ്​കരണം 84 ശതമാനം വീടുകളിലും ഏർപ്പെടുത്തിയതി‍ൻെറ അടിസ്ഥാനത്തിലാണ് പദവി നേടിയത്. പ്ലാസ്​റ്റിക് ഷ്രെഡിങ്​ യൂനിറ്റ് പ്രവർത്തനം, കോഴിമാലിന്യ സംസ്​കരണം, കടലിലെയും നീർത്തടങ്ങളിലെയും പ്ലാസ്​റ്റിക് നിർമാർജനം, മുടി മാലിന്യ സംസ്​കരണം, കുടിനീർ തെളിനീർ പദ്ധതി, മുത്തശ്ശിയോട് ചോദിക്കാം, പ്ലാസ്​റ്റിക് ടോൾബൂത്തുകൾ, ഹരിത കല്യാണം, ഹരിത പ്രോട്ടോകോൾ യൂനിറ്റ്, എ‍ൻെറ അഴിയൂർ നിർമല അഴിയൂർ പദ്ധതി, ഫിലമൻെറ് രഹിത ഗ്രാമപഞ്ചായത്ത്, നീർത്തട നടത്തം, ജലശ്രീ ക്ലബ് രൂപവത്​കരണം, കിണർ പരിപാലന പരിപാടികൾ, ജീവതാളം പദ്ധതി, ഗൃഹചൈതന്യം പദ്ധതി, പച്ചത്തുരുത്ത്, ശുചിത്വ ഭവനം പദ്ധതി എന്നീ പ്രവർത്തനങ്ങൾ നടത്തുന്നുണ്ട്​. മാലിന്യ സംസ്​കരണത്തിലൂടെ ഒമ്പത്​ ലക്ഷം രൂപ വരുമാനവും പഞ്ചായത്ത്​ നേടി. വികസന സ്​റ്റാൻഡിങ് കമ്മിറ്റി ചെയർപേഴ്​സൻ ഉഷ ചാത്താൻകണ്ടി അധ്യക്ഷത വഹിച്ചു. പഞ്ചായത്ത് പ്രസിഡൻറ് വി.പി. ജയൻ പദവി പ്രഖ്യാപനം നടത്തി. ടി. ഷാഹുൽ ഹമീദ്, പി. പ്രകാശ്, നാസർ ബാബു, ജാസ്​മിന കല്ലേരി, സുധ മാളിയേക്കൽ, സുധീഷ് തൊടുവയൽ, ബിന്ദു ജയ്​സൺ, പി. ജ്യോതിഷ്, പി. ഷംന, എം.വി. സിദ്ദീഖ് എന്നിവർ സംസാരിച്ചു. 300 കുടുംബങ്ങൾക്ക് ജലജീവൻ മിഷൻ പദ്ധതിപ്രകാരം കുടിവെള്ള കണക്​ഷൻ എത്തിക്കാനും നഗര സഞ്ജയന പദ്ധതിയിൽ പൊതുസ്ഥലങ്ങളിൽ ടോയ്‌ലറ്റ് സംവിധാനം സ്ഥാപിക്കാനും തീരുമാനിച്ചു. മുഴുവൻ വീടുകളിലും വാട്ടർ ഓഡിറ്റ് നടത്തും. സംസ്ഥാന ഔഷധസസ്യ ബോർഡി‍ൻെറ സഹായത്തോടെ ഔഷധസസ്യങ്ങൾ വീടുകളിലെത്തിക്കും. ഹരിത കർമസേനയുടെ നേതൃത്വത്തിൽ പ്ലാസ്​റ്റിക്​ ബദൽ ഉൽപന്നങ്ങൾ തയാറാക്കും. മാലിന്യ നിർമാർജനത്തിന് പുതിയ സോഫ്റ്റ്‌വെയർ ഉണ്ടാക്കും. 36 മിനി എം.സി.എഫ് തൊഴിലുറപ്പ് പദ്ധതിയിലൂടെ ആരംഭിക്കും. 200 പേർക്ക് ബയോബിൻ നൽകും. പ്ലാസ്​റ്റിക് മാലിന്യങ്ങൾ ക്ലീൻ ചെയ്യാൻ വാഷിങ്​ മെഷീനും ടൗണുകളിൽ തുമ്പൂർമൊഴി സംസ്​കരണ സംവിധാനം സ്ഥാപിക്കാനും പദ്ധതി തയാറാക്കി.