ലൈംഗികാതിക്രമം; മേക്കപ്പ്മാനെതിരെ കേസ്​

കൊച്ചി: വിവാഹ മേക്കപ്പിനിടെ ലൈംഗികാതിക്രമം നടത്തിയ മേക്കപ്പ്മാനെതിരെ യുവതികളുടെ പരാതിയിൽ കേസെടുത്തു. എറണാകുളം ചളിക്കവട്ടത്തെ ബ്രൈഡൽ മേക്കപ്പ്‌ സ്‌റ്റുഡിയോ ഉടമ കാക്കനാട്‌ സ്വദേശി അനീസ്‌ അൻസാരിക്കെതിരെയാണ് പാലാരിവട്ടം പൊലീസ് കേസെടുത്തത്. കേരളത്തിന് പുറത്ത് താമസിക്കുന്ന മൂന്ന് യുവതികളാണ് സിറ്റി പൊലീസ് കമീഷണർ സി.എച്ച്. നാഗരാജുവിന് പരാതി നൽകിയത്. സ്‌റ്റുഡിയോയിൽ വെച്ച്‌ പീഡിപ്പിച്ചെന്നാണ് പരാതി. ഒരാഴ്ച മുമ്പ് യുവതികൾ ഇയാൾക്കെതിരെ സമൂഹമാധ്യമത്തിൽ മീ ടൂ പോസ്റ്റ് ഇട്ടിരുന്നു. ഇത്​ ശ്രദ്ധയിൽപെട്ട ഉടനെ സ്വമേധയ അന്വേഷണം ആരംഭിച്ചിരുന്നുവെന്ന് സിറ്റി പൊലീസ് കമീഷണർ സി.എച്ച്. നാഗരാജു പറഞ്ഞു. സമൂഹമാധ്യമങ്ങളിൽ പോസ്റ്റുവന്നതോടെ ഇയാൾ ദുബൈലേക്ക് കടന്നതായി സംശയിക്കുന്നുണ്ട്. അന്വേഷണം ഊർജിതമാക്കിയിട്ടുണ്ട്. ഇയാളുടെ മൊബൈൽ ഫോൺ ഓഫാണെന്ന് പൊലീസ് പറഞ്ഞു.