തോട്ടപ്പള്ളിയിൽ ചെമ്മീൻതോട് ഉണക്കുന്നത് തടയണം -മനുഷ്യാവകാശ കമീഷൻ

ആലപ്പുഴ: തോട്ടപ്പള്ളി പൊഴിമുഖത്തിനു ഇരുവശത്തും ചെമ്മീൻതോട് ഉണക്കുന്നതു കാരണം പരിസരവാസികൾക്കുണ്ടാകുന്ന ബുദ്ധിമുട്ട് പരിഹരിക്കാൻ കർശന നടപടി സ്വീകരിക്കണമെന്ന് സംസ്ഥാന മനുഷ്യാവകാശ കമീഷൻ. പുറക്കാട് ഗ്രാമപഞ്ചായത്ത് സെക്രട്ടറിക്കാണ് ജുഡീഷ്യൽ അംഗം പി. മോഹനദാസ് നിർദേശം നൽകിയത്. മത്സ്യത്തൊഴിലാളികളുടെയും പീലിങ്​ തൊഴിലാളികളുടെയും തൊഴിലുമായി ബന്ധപ്പെട്ടതല്ല ചെമ്മീൻ തോട് ഉണക്കൽ. തോട്ടപ്പള്ളി തുറമുഖം വിനോദസഞ്ചാര സാധ്യതയുള്ള മേഖലയാണെന്നും പ്രദേശവാസികളുടെയും വിനോദസഞ്ചാരികളുടെയും ആരോഗ്യം കണക്കിലെടുക്കേണ്ടതുണ്ടെന്നും ഉത്തരവിൽ പറഞ്ഞു. ഹെൽത്ത് ഇൻസ്പെക്ടർ പരിശോധിച്ച്​ റിപ്പോർട്ട് ലഭ്യമാക്കിയിട്ടുണ്ടെന്ന് പുറക്കാട് പഞ്ചായത്ത് സെക്രട്ടറി അറിയിച്ചു. തോട്ടപ്പള്ളി സ്വദേശി പി. സാബു സമർപ്പിച്ച പരാതിയിലാണ് നടപടി.