പ്രതികള്‍ക്കൊപ്പം മദ്യപിച്ച പൊലീസുകാര്‍ക്കെതിരെ നടപടിക്ക് ശിപാര്‍ശ

ചെറുതോണി: പ്രതികള്‍ക്കൊപ്പം മദ്യപിച്ച പൊലീസുകാര്‍ക്കെതിരെ വകുപ്പുതല നടപടിക്ക് ശിപാര്‍ശ. മുരിക്കാശേരി പൊലീസ് സ്റ്റേഷനിലെ അഡീഷനല്‍ എസ്.ഐ ഉള്‍പ്പെടെ നാലുപേര്‍ക്കെതിരെയാണ് ഇടുക്കി സി.ഐ സിബിച്ചന്‍ ജോസഫ് ജില്ലാ പൊലീസ് മേധാവിക്ക് റിപ്പോര്‍ട്ട് നല്‍കിയത്. അഡീഷനല്‍ എസ്.ഐ എം.ഐ. ജോസഫ്, എ.എസ്.ഐ വി.ജെ. സെബാസ്റ്റ്യന്‍, സി.പി.ഒമാരായ ചന്ദ്രന്‍, സജീവ് എന്നിവര്‍ക്കെതിരെയാണ് നടപടി.

ഒരാഴ്ച മുമ്പ് മുരിക്കാശേരി ടൗണില്‍ വ്യാപാരിയായ തങ്കച്ചനെ മണല്‍കടത്ത് സംഘത്തിലെ സഹോദരന്മാരായ രണ്ടുപേര്‍ സ്ഥാപനത്തില്‍ കയറി മര്‍ദിച്ചിരുന്നു. ഈ കേസുമായി ബന്ധപ്പെട്ട പ്രതികള്‍ക്കൊപ്പമാണ് തിങ്കളാഴ്ച രാത്രി സ്റ്റേഷന് സമീപത്തെ ക്വാര്‍ട്ടേഴ്സില്‍ ഉദ്യോഗസ്ഥര്‍ മദ്യപാനം നടത്തിയത്. ഇടുക്കി എസ്.പിക്ക് ലഭിച്ച രഹസ്യവിവരത്തെ തുടര്‍ന്നാണ് സി.ഐ മിന്നല്‍ പരിശോധന നടത്തിയത്. പ്രതികള്‍ വാങ്ങിയ മദ്യത്തിന്‍െറ അളവും ഇനവും സംബന്ധിച്ച് വ്യക്തമായ വിവരമാണ് ജില്ലാ പൊലീസ് മേധാവിക്ക് നല്‍കിയിരുന്നത്.