മുതിര്‍ന്ന പൗരന്മാര്‍ക്ക് വോട്ടുചെയ്യാന്‍ പ്രത്യേക സൗകര്യമൊരുക്കണം –മനുഷ്യാവകാശ കമീഷന്‍

ന്യൂഡല്‍ഹി: അരക്കോടിയിലേറെ വോട്ടര്‍മാര്‍ 60 വയസ്സിന് മുകളിലുള്ള കേരളത്തില്‍ മുതിര്‍ന്ന പൗരന്മാര്‍ക്ക് വോട്ട് രേഖപ്പെടുത്താന്‍ പ്രത്യേക സൗകര്യമൊരുക്കണമെന്ന് മനുഷ്യാവകാശ കമീഷന്‍ തെരഞ്ഞെടുപ്പു കമീഷന് കത്തെഴുതി. ഈ വിഷയത്തില്‍ വയോജനക്ഷേമ ബോര്‍ഡ് സ്പെഷല്‍ ഓഫിസര്‍ വി.കെ. ബീരാന്‍ മുന്നോട്ടുവെച്ച നിര്‍ദേശം ന്യായമാണെന്നും കടുത്ത ചൂടിനിടെ അവശതകളുള്ള മുതിര്‍ന്ന പൗരര്‍ നീണ്ട ക്യൂവില്‍ കാത്തുനിന്ന് വോട്ടുചെയ്യേണ്ടിവരുന്ന അവസ്ഥ ഒഴിവാക്കാന്‍ നടപടി വേണമെന്നും ദേശീയ മനുഷ്യാവകാശ കമീഷനംഗം ജസ്റ്റിസ് സിറിയക് ജോസഫ് കേന്ദ്ര മുഖ്യ തെരഞ്ഞെടുപ്പു കമീഷണര്‍ ഡോ. നസീം സെയ്ദിക്കയച്ച കത്തില്‍ ആവശ്യപ്പെട്ടു. 70 വയസ്സിന് മുകളിലുള്ള വോട്ടര്‍മാര്‍ക്ക് പ്രത്യേക സൗകര്യമൊരുക്കണമെന്നാണ് നിര്‍ദേശം.