ഷാര്‍ജയില്‍ 42,000 വീടുകള്‍ക്ക് സൗജന്യ പുസ്തകാലയങ്ങള്‍ 

ദുബൈ: അതിരുകളില്ലാത്ത അറിവ് (നോളജ് വിത്തൗട്ട് ബോര്‍ഡേര്‍സ്) എന്ന സാംസ്കാരിക മുന്നേറ്റത്തിന്‍െറ ഭാഗമായി വായന പ്രോത്സാഹിപ്പിക്കുന്നതിന് ഷാര്‍ജയില്‍ ഒരുക്കിയത് 42,000 വീട്ടു ലൈബ്രറികള്‍. ഷാര്‍ജയിലെ  42,366 സ്വദേശി കുടുംബങ്ങള്‍ക്ക് പുസ്തകാലയങ്ങള്‍ നല്‍കാനാണ് തീരുമാനം. 
ഖാലിദിയ, മൊഗൈദര്‍, വാസിത്, മുവൈലിയ പ്രാദേശിക കൗണ്‍സിലുകള്‍ വഴിയാണ് പുസ്തകങ്ങള്‍ നല്‍കിയതെന്ന് ദൗത്യത്തിന് നേതൃത്വം നല്‍കുന്ന കെ.ഡബ്ളിയു. ബി  ജനറല്‍ മാനേജര്‍ റാശിദ് അല്‍ കൗസ് പറഞ്ഞു. ഓരോ കുടുംബത്തിനും 50 പുസ്തകങ്ങള്‍ ഉള്‍ക്കൊള്ളുന്ന ലൈബ്രറിയാണ് സമ്മാനിക്കുന്നത്. 
അക്ഷരങ്ങളെ അളവറ്റു സ്നേഹിക്കുന്ന സുപ്രീം കൗണ്‍സില്‍ അംഗവും ഷാര്‍ജ ഭരണാധികാരിയുമായ ശൈഖ് ഡോ. സുല്‍ത്താന്‍ ബിന്‍ മുഹമ്മദ് ആല്‍ ഖാസിമിയുടെ പുസ്തകം, കുട്ടികള്‍ക്കായുള്ള സാഹിത്യ, ചരിത്ര പുസ്തകങ്ങള്‍, കുടുംബിനികള്‍ക്ക് താല്‍പര്യമുള്ള വിഷയങ്ങള്‍ ഉള്‍ക്കൊള്ളിച്ച പുസ്തകങ്ങള്‍ എന്നിവയാണ് നല്‍കിവരുന്നത്.