ഇന്ത്യന്‍ ദേശീയ സുരക്ഷാ ഉപദേഷ്ടാവ്  ശൈഖ് മുഹമ്മദ് സായിദുമായി കൂടിക്കാഴ്ച നടത്തി

അബൂദബി: അബൂദബി കിരീടാവകാശിയും യു.എ.ഇ സായുധ സേനാ ഡെപ്യൂട്ടി സുപ്രീം കമാന്‍ഡറുമായ ജനറല്‍ ശൈഖ് മുഹമ്മദ് ബിന്‍ സായിദ് ആല്‍ നഹ്യാന്‍ ഇന്ത്യന്‍ ദേശീയ സുരക്ഷാ ഉപദേഷ്ടാവ് അജിത് ഡോവലിനെ സ്വീകരിച്ചു. ഇരു രാഷ്ട്രങ്ങളും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിനുള്ള വഴികളെ കുറിച്ച് ശൈഖ് മുഹമ്മദ് സായിദും അജിത് ഡോവലും ചര്‍ച്ച നടത്തി. ചൊവ്വാഴ്ച മാമൂറയില്‍ വെച്ചായിരുന്നു കൂടിക്കാഴ്ച.
പരസ്പര താല്‍പര്യമുള്ള പ്രാദേശിക-അന്താരാഷ്ട്ര വിഷയങ്ങള്‍, മേഖലയിലെ സംഭവവികാസങ്ങള്‍, ഭീകരതയും തീവ്രവാദവും നേരിടാന്‍ ഇന്ത്യയും യു.എ.ഇയും നടത്തുന്ന യജ്ഞങ്ങള്‍ തുടങ്ങിയ കാര്യങ്ങള്‍ ഇരുവരും അവലോകനം ചെയ്തു. അബൂദബി ഭരണനിര്‍വഹണകാര്യ അതോറിറ്റി ചെയര്‍മാന്‍ ഖല്‍ദൂന്‍ ഖലീഫ ആല്‍ മുബാറക്, അബൂദബി കിരീടവകാശിയുടെ കൊട്ടാര കാര്യാലയ അണ്ടര്‍ സെക്രട്ടറി മുഹമ്മദ് മുബാറക് ആല്‍ മസ്റൂയി എന്നിവരും കൂടിക്കാഴ്ചയില്‍ പങ്കെടുത്തു.