ദുബൈയില്‍ ഒരുകോടി ദിര്‍ഹമിന്‍െറ  വ്യാജ മൊബൈല്‍ ഫോണ്‍ പിടിച്ചു

ദുബൈ: ദുബൈ സാമ്പത്തിക വികസന വകുപ്പ് നടത്തിയ പരിശോധനയില്‍ ഒരുകോടി ദിര്‍ഹമിന്‍െറ വ്യാജ മൊബൈല്‍ ഫോണുകളും അനുബന്ധ ഉപകരണങ്ങളും പിടികൂടി. 47,000 മൊബൈല്‍ ഫോണുകള്‍, 99000 ചാര്‍ജറുകളും ബാറ്ററികളും, 110000 മൊബൈല്‍ ഫോണ്‍ കവറുകള്‍ എന്നിവയാണ് പിടിച്ചെടുത്തത്. നഗരത്തിലെ പ്രമുഖ ഹോട്ടലില്‍ നടത്തിയ റെയ്ഡിലാണ് വ്യാജ ഉല്‍പന്നങ്ങള്‍ പിടിച്ചെടുത്തതെന്ന് സാമ്പത്തിക വികസന വകുപ്പിന്‍െറ ബൗദ്ധിക സ്വത്തവകാശ വകുപ്പ് ഡയറക്ടര്‍ ഇബ്രാഹിം ബെഹ്സാദ് അറിയിച്ചു. 
വീണ്ടും പാക്ക് ചെയ്ത് വില്‍ക്കാനുള്ള ഒരുക്കത്തിനിടെയാണ് ഉല്‍പന്നങ്ങള്‍ പിടികൂടിയത്. റെയ്ഡില്‍ ഫോണുകളുടെ യഥാര്‍ഥ ബ്രാന്‍ഡ് ഉടമാ പ്രതിനിധികളും സന്നിഹിതരായിരുന്നു. അധികൃതരുടെ കണ്ണുവെട്ടിക്കാനാണ് തട്ടിപ്പുകാര്‍ ഹോട്ടല്‍ മുറി തെരഞ്ഞെടുത്തത്. വ്യാജ ഉല്‍പന്നങ്ങള്‍ ശ്രദ്ധയില്‍ പെട്ടാല്‍ വിവരമറിയിക്കണമെന്ന് അധികൃതര്‍ പൊതുജനങ്ങളോട് ആവശ്യപ്പെട്ടു.