സൗദി-ബഹ്​റൈൻ കോസ്​വേ ജൂലൈ 27ന്​ തുറക്കും 

saudi-bahrain-coseway

ദമ്മാം: സൗദി അറേബ്യയുടെ കിഴക്കൻ മേഖലയിലെ പ്രധാന പ്രവേശന കവാടമായ സൗദി-ബഹ്​റൈൻ കോസ്​വേ ജൂലൈ 27 മുതൽ വീണ്ടും യാത്രക്കായി തുറക്കുമെന്ന് ബഹ്​റൈൻ വൃത്തങ്ങളെ ഉദ്ധരിച്ച്​ അറബ്​ മാധ്യമങ്ങൾ​ റിപ്പോർട്ട്​ ചെയ്​തു. കോവിഡ് വ്യാപനം തടയാനുള്ള നടപടികളുടെ ഭാഗമായി നാലു മാസം മുമ്പ്​ മാർച്ച്​ ഏഴിനാണ്​ കോസ്​വേ അടച്ചിട്ടത്​. 

നിത്യവും പതിനായിരക്കണക്കിന്​ ആളുകൾ ബഹ്​റൈനിലേക്കും തിരിച്ചും യാത്ര ചെയ്യുന്ന കോസ്​വേ സൗദി അറേബ്യയുടെ ഏറ്റവും പ്രധാനപ്പെട്ട യാത്രാമാർഗമാണ്​. സൗദി വ്യാപാര മേഖലയിലെ ചരക്കുനീക്കങ്ങളുടെ പ്രധാന ഇടനാഴി കൂടിയാണിത്​. 

ബഹ്​റൈനിൽ കോവിഡ്​ വ്യാപകമാവുകയും സൗദിയിൽ കോവിഡ്​ സ്​ഥിരീകരിക്കുകയും ചെയ്​ത സാഹചര്യത്തിലാണ്​​ കോസ്​വേ അടച്ചത്​. ആയിരക്കണക്കിന് ​ആളുകൾ ഇതോടെ പ്രതിസന്ധിയിലായി. സൗദി അരാംകോ ഉൾപ്പെടെയുള്ള കമ്പനികളിൽ ജോലിചെയ്യുന്ന നിരവധി പേർ ബഹ്​റൈനിൽ താമസിക്കുകയും നിത്യവും സൗദിയിലെത്തി ജോലിചെയ്യുകയും ചെയ്യുന്നവരാണ്​. കടൽപാത അടഞ്ഞതോടെ ഇവരിൽ അധികം പേരും സൗദിയിൽ കുടുങ്ങിപ്പോയി. 

അനിശ്ചിതകാലത്തേക്ക്​ കോസ്​വേ അടക്കു​േമ്പാഴും ഇത്രകാലം നീണ്ടുപോകുമെന്ന്​ ആരും കരുതിയിരുന്നില്ല. കാത്തിരുപ്പുകൾക്കൊടുവിലാണ്​ 27 മുതൽ കോസ്​വേ തുറക്കുമെന്ന വിവരങ്ങളെത്തുന്നത്​. സൗദിയിൽ ലോക്​ ഡൗൺ പിൻവലിക്കുകയും ജനജീവിതം സാധാരണ ഗതിയിലാവുകയും ചെയ്​തതു മുതൽ കോസ്​വേ തുറക്കുന്ന വാർത്തക്കായി കാതോർത്തിരിക്കുകയാണ്​ സൗദിയിലെ സ്വദേശികളും വിദേശികളും. 

ബഹ്​​ൈറനിൽനിന്ന്​ നാട്ടിൽ പോയവരെ തിരികെയെത്തിക്കാൻ​ കഴിഞ്ഞ മാസം 12 മുതൽ ഗൾഫ്​ എയർ വിമാനസർവിസുകൾ നടത്തുന്നുണ്ട്​. തിരിച്ചെത്തിയവർ 14 ദിവസം ക്വറൻറീനിൽ കഴിയണം എന്നാണ്​ ബഹ്​റൈൻ സർക്കാറി​​​െൻറ നിർദേശം. 

കോസ്​വേ തുറക്കുന്നതോടെ വിസ കാലാവധിയുള്ളവർക്ക് ബഹ്​റൈൻ വഴി സൗദിയിലേക്ക്​ തിരിച്ചെത്താനാകുമോ എന്ന്​ കോസ്​വേ തുറക്കുന്ന വാർത്തയെത്തിയതോടെ ആളുകൾ ചോദിച്ചുതുടങ്ങിയിട്ടുണ്ട്​. നിലവിലെ സാഹചര്യത്തിൽ മുഴുവൻ സുരക്ഷാ മാനദണ്ഡങ്ങളും പാലിച്ചുകൊണ്ടായിരിക്കും കോസ്​വേ പ്രവർത്തിക്കുക എന്നാണ്​ അധികൃതർ വ്യക്തമാക്കുന്നത്​​. 

സൗദിയിൽ കുടുങ്ങിയ ബഹ്​റൈൻ വിസയുള്ളവർക്ക്​ തിരികെപ്പോകാൻ അനുമതി നേരത്തെ നൽകിയിരുന്നെങ്കിലും ബഹ്​​ൈറനിൽ കുടുങ്ങിയവർക്ക്​ തിരികെ വരാൻ സാധിക്കുമായിരുന്നില്ല. നിരവധി കമ്പനികളിലെ ജീവനക്കാർക്ക്​ ആശ്വാസം പകരുന്നതുകൂടിയാണ്​ പുതിയ വാർത്ത. സൗദിയിലും ബഹ്​റൈനിലുമുള്ള കച്ചവട മേലയിൽ പ്രവർത്തിക്കുന്നവർക്കും ടാക്​സി സേവനം നടത്തുന്നവർക്കും കോസ്​വേ തുറക്കുന്നത്​​ ആശ്വാസം പകരും.

Loading...
COMMENTS