ഖത്തര്‍ സമാധാന രാഷ്ട്രം-‘നംബിയോ’  പഠന റിപ്പോര്‍ട്ട് 

ദോഹ: കുറ്റകൃത്യങ്ങള്‍ കുറവുള്ള രാഷ്ട്രങ്ങളുടെ പട്ടികയില്‍ മിഡില്‍ ഈസ്റ്റ്രാജ്യങ്ങളില്‍വെച്ച്  ഏറ്റവും മുന്നിലുള്ളത് ഖത്തര്‍. ആഗോള തലത്തില്‍ ഖത്തറിന് ഏഴാം സ്ഥാനത്ത് എത്താനും കഴിഞ്ഞു. നംബിയോ തയാറാക്കിയ ലോക രാജ്യങ്ങളിലെ ക്രൈം ഇന്‍ഡക്സ് 2016 പട്ടികയിലാണ് ഈ നേട്ടം. സൗത്ത് കൊറിയ,സിങ്കപ്പൂര്‍, ജോര്‍ജിയ,തായ്വാന്‍,ജപ്പാന്‍,ഹോങ്കോംങ് ഏന്നീ രാജ്യങ്ങളാണ് ഖത്തറിന്‍െറ മുന്നില്‍ വന്നത്. ലഭിച്ച വിവരങ്ങളുടെ അടിസ്ഥാനത്തില്‍ ഖത്തറിന് 20.41 പോയിന്‍റാണ് പട്ടികയില്‍ ഉള്ളത്. സൗത്ത് കൊറിയക്ക് ഇത് 14.99 മാര്‍ക്കാണ് ഉള്ളത്. പൂജ്യം തൊട്ട് 100 വരെയുള്ള സ്കെയില്‍ അനുസരിച്ചാണ് കുറ്റകൃത്യങ്ങളുടെ പോയന്‍റ് നിശ്ചയിച്ചത്.  20ല്‍ താഴെ പോയിന്‍റുകള്‍ കുറ്റ കൃത്യങ്ങള്‍ തീരേ കുറവുള്ളതായി പരിഗണിച്ചപ്പോള്‍  80നു മുകളില്‍വന്ന രാഷ്ട്രങ്ങളില്‍ കുറ്റകൃത്യങ്ങള്‍ അതീവ അപകടകരമാണന്നും  കണക്കാക്കിയിട്ടുണ്ട്. ഉയര്‍ന്ന ജനസംഖ്യ വസിക്കുന്ന രാജ്യത്ത് കുറ്റകൃത്യങ്ങള്‍ ഇല്ലാതെ സമാധാന ജീവിതം സാധ്യമാക്കുന്നതിന് ആഭ്യന്തര മന്ത്രാലയവും പോലീസ് വിഭാഗവും നടത്തുന്ന തുടര്‍ച്ചയായ പ്രയത്നങ്ങളുടെ ഫലമയാണ് രാജ്യത്തിന് മുന്നില്‍ നില്‍ക്കാന്‍ സാധിക്കുന്നതെന്ന്  ആഭ്യന്തര മന്ത്രാലയം പ്രസ്താവനയില്‍ പറഞ്ഞു. കുറ്റകൃത്യങ്ങള്‍ കുറവുള്ള രാജ്യങ്ങളില്‍ ഇതിനുമുമ്പും  ഖത്തര്‍, മിഡില്‍ ഈസ്റ്റ്, നോര്‍ത്ത് ആഫ്രിക്കന്‍ രാജ്യങ്ങളെക്കാള്‍ മുന്നിലത്തെിയിട്ടുണ്ട്. ഇന്‍സ്റ്റിറ്റ്യൂട്ട് ഫോര്‍ എക്കണോമിക്സ് ആന്‍ഡ് പീസ് പ്രസിദ്ധപ്പെടുത്തിയ ഗ്ളോബല്‍ പീസ് ഇന്‍ഡക്സില്‍ ഖത്തറായിരുന്നു മുന്നിലത്തെിയിരുന്നത്. നയപരമായ ദൃഢതയോടെയാണ് രാജ്യം ഈ രംഗത്ത് പ്രവര്‍ത്തിക്കുന്നത് എന്നും മന്ത്രാലയം വ്യക്തമാക്കി.