കെ.സി.എ സുവർണ ജൂബിലി ഫിനാലെ 28ന്
text_fieldsമനാമ: ബഹ്റൈനിലെ പ്രമുഖ സാംസ്കാരിക സംഘടനയായ കേരള കാത്തലിക് അസോസിയേഷൻ (കെ.സി.എ) സുവർണ ജൂബിലി ഫിനാലെ മേയ് 28ന് ക്രൗൺ പ്ലാസയിലെ ബഹ്റൈൻ കോൺഫറൻസ് സെന്ററിൽ നടക്കുമെന്ന് ഭാരവാഹികൾ വാർത്തസമ്മേളനത്തിൽ അറിയിച്ചു.
ബഹ്റൈനിലെ തൊഴിൽ, സാമൂഹികക്ഷേമ മന്ത്രി ജമീൽ ബിൻ മുഹമ്മദ് അലി ഹുമൈദാൻ മുഖ്യാതിഥിയായി പങ്കെടുക്കുന്ന ചടങ്ങിൽ ഇന്ത്യൻ അംബാസഡർ പിയൂഷ് ശ്രീവാസ്തവ, മൂവാറ്റുപുഴ ബിഷപ് ഡോ. ഏബ്രഹാം മാർ യൂലിയോസ്, അഡ്വ. സണ്ണി ജോസഫ് എം.എൽ.എ എന്നിവർ വിശിഷ്ടാതിഥികളായി പങ്കെടുക്കും. ബഹ്റൈൻ സർക്കാർ ഉദ്യോഗസ്ഥർ, കമ്യൂണിറ്റി നേതാക്കൾ, സാമൂഹിക-സാംസ്കാരിക-കായികരംഗത്തെ പ്രമുഖർ എന്നിവർ ഫിനാലെയിൽ അതിഥികളായിരിക്കും. ആരോഗ്യം, വിദ്യാഭ്യാസം, വ്യവസായം എന്നീ മേഖലകളിലെ പ്രമുഖരെയും ബിസിനസ് സംരംഭകരെയും ചടങ്ങിൽ ആദരിക്കും.
സുവർണ ജൂബിലി ആഘോഷങ്ങളുടെ ഭാഗമായി സോഫിടെൽ ഹോട്ടലിൽ ചാരിറ്റി ഡിന്നർ, ഇന്റർനാഷനൽ വോളിബാൾ ടൂർണമെന്റ്, സർഗോത്സവ്, കെ.സി.എ ഗ്രാൻഡ്മാസ്റ്റർ ഇന്റർനാഷനൽ ഓൺലൈൻ ക്വിസ്, രക്തദാന ക്യാമ്പ്, മെഡിക്കൽ ക്യാമ്പ് തുടങ്ങിയ നിരവധി പരിപാടികൾ സംഘടിപ്പിച്ചിരുന്നു. സുവർണ ജൂബിലി ചാരിറ്റി പ്രവർത്തനങ്ങളുടെ ഭാഗമായി കേരളത്തിലെ ഒരു കുടുംബത്തിന് വീടും ബഹ്റൈനിലെ ഡിസബിൾഡ് സൊസൈറ്റിക്ക് 25 വീൽചെയറുകളും നൽകി. കൂടാതെ, ഒരു ആശുപത്രിക്ക് ഡയാലിസിസ് യൂനിറ്റും നൽകുമെന്ന് ഭാരവാഹികൾ അറിയിച്ചു.
വാർത്തസമ്മേളനത്തിൽ കെ.സി.എ പ്രസിഡന്റ് റോയ് സി. ആന്റണി, ഗോൾഡൻ ജൂബിലി ചെയർമാൻ എബ്രഹാം ജോൺ, കോർ ഗ്രൂപ് ചെയർമാൻ സേവി മാത്തുണ്ണി, ഗോൾഡൻ ജൂബിലി രക്ഷാധികാരികളും മുൻ പ്രസിഡന്റുമാരുമായ വർഗീസ് കാരക്കൽ, പീറ്റർ പൈലി, കെ.സി.എ ഗോൾഡൻ ജൂബിലി വൈസ് ചെയർമാൻ കെ.ഇ. റിച്ചാർഡ്, ചാരിറ്റി കൺവീനർ പീറ്റർ സോളമൻ എന്നിവർ പങ്കെടുത്തു.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.