​പ്രേതങ്ങളെ തേടി നടക്കുന്ന സൈക്കോ ഡേവിഡ്;​ അരങ്ങേറ്റ ചിത്രത്തിലൂടെ ശ്രദ്ധേയനായി ജനക്​

പ്രതിനായക വേഷം ചെയ്​ത്​ തമിഴ്​നാട്ടിൽ കൈയടി നേടുകയാണ്​ മലയാളി നടനായ ജനക്​ മനയത്ത്​. തമിഴിലെ അരങ്ങേറ്റ സിനിമയായ 'ബിയ'യിലെ ഡേവിഡ്​ എന്ന പ്രതിനായക വേഷം ജനകിന്​ മികച്ച തുടക്കമാണ്​ നൽകിയിരിക്കുന്നത്​. ലോക്​ഡൗണിനിടെ തിയേറ്ററുകൾ തുറന്നതോടെ രാജ്​ ഗോകുൽദാസ്​ സംവിധാനം ചെയ്​ത ഹൊറർ സിനിമയായ 'ബിയ' കഴിഞ്ഞ ദിവസമാണ്​ തമിഴ്​നാട്ടിൽ റിലീസ്​ ആയത്​.

സൈക്കോ കഥാപാത്രമായ ഡേവിഡിനെയാണ് ജനക് സിനിമയിൽ അവതരിപ്പിക്കുന്നത്​. പ്രേതങ്ങളെ തേടി നടക്കുകയും മനുഷ്യനെ അതിദാരുണമായി കൊലപ്പെടുത്തുകയും ചെയ്യുന്നതാണ് ഡേവിഡിൻെറ സ്വഭാവം. പ്രതിനായകവേഷം മികച്ച രീതിയില്‍ കൈകാര്യം ചെയ്തതോടെ മലയാളത്തിലും തമിഴില്‍ നിന്നുമായി ഒട്ടേറെ അവസരങ്ങൾ തേടിയെത്തുമെന്ന പ്രതീക്ഷയിലാണ്​ ജനക്​. അമേരിക്ക, ലണ്ടന്‍ അടക്കം വിദേശ രാജ്യങ്ങളിൽ ഒരു പതിറ്റാണ്ടിലേറെയായി തിയേറ്റര്‍ ആര്‍ട്ടിസ്റ്റായ ജനക് മനയത്ത് ഗായകനും നർത്തകനും തിരക്കഥാകൃത്തും കൂടിയാണ്.

വളരെ ആകസ്​മികമായിട്ടാണ്​ താൻ 'ബിയ'യിൽ അഭിനയിച്ചതെന്ന്​ ജനക്​ പറയുന്നു. തിയേറ്റർ പരിചയമുള്ളതുകൊണ്ട്​ ഡേവിഡിനെ അനായാസമായി അവതരിപ്പിക്കാനും കഴിഞ്ഞുവെന്ന്​ അദ്ദേഹം ചൂണ്ടിക്കാട്ടി. ആരോമല്‍ സിനി ക്രിയേഷൻസിൻെറ ബാനറിൽ സി.ആർ. രാജേഷ് ആണ്​ ചിത്രം നിർമിച്ചിരിക്കുന്നത്​. രാജ് ഗോകുല്‍ദാസ്, ജൂബിൽ രാജന്‍ പി ദേവ്, സാവന്തിക, അനില്‍ മുരളി എന്നിവരും ചിത്രത്തിൽ വേഷമിട്ടിരിക്കുന്നു.