പന്ത് വിഴുങ്ങിയ നായക്ക് ശസ്ത്രക്രിയ

കൊല്ലം: വിഴുങ്ങിയ പന്ത് പുറത്തെടുക്കാൻ നായക്ക് ശസ്ത്രക്രിയ നടത്തി. ചാത്തന്നൂർ മാമ്പള്ളിക്കുന്നം അച്യുതത്തിൽ ജിതേഷ് ജയൻറ വീട്ടിലെ റോട്ട്​വീലർ ഡോഗിനാണ് ശസ്ത്രക്രിയ. പന്ത്​ വിഴുങ്ങി കുറച്ചുനാൾ ശേഷമാണ് നായ അസ്വസ്ഥത കാട്ടിത്തുടങ്ങിയത്. ജില്ല വെറ്ററിനറി കേന്ദ്രത്തിൽ നടത്തിയ എക്സറേ പരിശോധനയിൽ കൊറോണ ബോളിനൊപ്പം ബാറ്ററിയും എൽ.ഇ.ഡി ബൾബും ഉൾപ്പെടുന്ന യൂനിറ്റെല്ലാം ഉള്ളിലാക്കി എന്ന്​ കണ്ടെത്തി. രണ്ടു മണിക്കൂർ നീണ്ട ശസ്ത്രക്രിയയിലൂടെ ബാറ്ററി യൂനിറ്റും പഴകിദ്രവിച്ച കൊറോണ പന്തും പുറത്തെടുത്തു. ജില്ല വെറ്ററിനറി കേന്ദ്രത്തിലെ സർജൻമാരായ ഡോ. സജയ്കുമാർ, ഡോ. അജിത് പിള്ള, സീനിയർ വെറ്ററിനറി സർജൻ ഡോ.അജിത് ബാബു എന്നിവർ ശസ്ത്രക്രിയക്ക് നേതൃത്വം നൽകി.