പ്രപഞ്ചത്തിലെ ഏറ്റവും ദുരൂഹവും അദ്ഭുതകരവുമായ പ്രതിഭാസമെന്താണെന്നു ചോദിച്ചാല്‍ ഒരുത്തരമേ ഉണ്ടാകൂ - തമോഗര്‍ത്തങ്ങള്‍ (Black Holes). സമീപമുള്ള നക്ഷത്രങ്ങളുടെ അസാധാരണമായ ചലനങ്ങളും അതിശക്തമായ കണികാ പ്രവാഹവുമെല്ലാം തമോഗര്‍ത്തങ്ങളെ കണ്ടെത്താനുള്ള എളുപ്പവഴികളാണ്.
ഗുരുത്വാകര്‍ഷണബലം അത്യധികം തീവ്രമാകുന്ന ഈ മേഖലയില്‍ നിന്ന് പ്രകാശരശ്മികള്‍ക്കുപോലും രക്ഷപ്പെടാന്‍ കഴിയാത്തതുകൊണ്ട് തമോഗര്‍ത്തങ്ങളെ നേരിട്ടു കാണാന്‍ കഴിയില്ല. ഇപ്പോഴിതാ തമോഗര്‍ത്തങ്ങളുടെ ദുരൂഹതകളിലേക്ക് തുറന്നുപിടിച്ച എക്സ്-റേ കണ്ണുകളുമായി ന്യൂസ്റ്റാര്‍ പുറപ്പെടുന്നു. 2012 ജൂണ്‍ 13ന് വിക്ഷേപിക്കപ്പെടുന്ന സ്പേസ് ടെലിസ്കോപ്പാണ് ന്യൂസ്റ്റാര്‍ (Nuclear Spectroscopic Telescope Array  NuSTAR).
ശാന്തസമുദ്രത്തിലെ മാര്‍ഷല്‍ ദ്വീപിലുള്ള ക്വാജലൈന്‍ അറ്റോള്‍ ലോഞ്ച്പാഡില്‍നിന്ന് ജൂണ്‍ 13ന് വിക്ഷേപിക്കപ്പെടുന്ന, ഓര്‍ബിറ്റല്‍ സയന്‍സസ് കോര്‍പറേഷന്‍െറ L1011 സ്റ്റാര്‍ ഗേയ്സര്‍ എന്ന കൃത്രിമ ഉപഗ്രഹത്തിന്‍െറ അടിഭാഗത്ത് ഉറപ്പിച്ചാണ് ന്യൂസ്റ്റാറിനെ ബഹിരാകാശത്തെത്തിക്കുന്നത്. പെഗാസസ് - XL റോക്കറ്റാണ് വിക്ഷേപണത്തിനുപയോഗിക്കുന്നത്. ബഹിരാകാശത്ത് ഭൂമിക്കടുത്തുള്ള ഭ്രമണപഥത്തില്‍ (LowEarth Orbit) സ്ഥാപിക്കപ്പെടുന്ന ന്യൂസ്റ്റാര്‍ രണ്ടാഴ്ചക്കുശേഷം പ്രവര്‍ത്തനമാരംഭിക്കും. ആശുപത്രികളില്‍ അസ്ഥികളുടെ ചിത്രങ്ങളെടുക്കാനും എയര്‍പോര്‍ട്ടുകളില്‍ ലഗേജ് പരിശോധനകള്‍ നടത്താനുമുപയോഗിക്കുന്ന തരത്തിലുള്ള ഉയര്‍ന്ന ഊര്‍ജനിലയിലുള്ള എക്സ്-കിരണങ്ങളാണ് ന്യൂസ്റ്റാറില്‍ ഉപയോഗിക്കുന്നത്. നിലവിലുള്ള ഏറ്റവും ശക്തമായ എക്സ്- റേ ദൂരദര്‍ശിനികള്‍ നല്‍കുന്നതിലും നൂറുമടങ്ങ് സംവേദനക്ഷമതയും പത്തുമടങ്ങ് ഉയര്‍ന്ന റെസല്യൂഷനും ന്യൂസ്റ്റാര്‍ നല്‍കുന്ന പ്രപഞ്ച ചിത്രങ്ങള്‍ക്കുണ്ടാകും. ഇപ്പോള്‍ ബഹിരാകാശത്തുള്ള ചന്ദ്ര സ്പേസ് ഒബ്സര്‍വേറ്ററിയുമായി ചേര്‍ന്നു പ്രവര്‍ത്തിക്കാനും ന്യൂസ്റ്റാറിനു കഴിയും.
ചന്ദ്രയില്‍ താഴ്ന്ന ഊര്‍ജനിലയിലുള്ള എക്സ്-കിരണങ്ങളാണ് ഉപയോഗിക്കുന്നത്. ഇവ രണ്ടും ചേര്‍ന്നുള്ള നിരീക്ഷണം തമോഗര്‍ത്തങ്ങളെ കൂടാതെ മറ്റു ദുരൂഹ പ്രതിഭാസങ്ങളായ ന്യൂട്രോണ്‍ താരങ്ങളെയും ബ്ളേയ്സറുകളെയും മൃതനക്ഷത്രങ്ങളെയുമെല്ലാം കണ്ടെത്താന്‍ സഹായിക്കും. കൂടാതെ, സൂര്യനുള്‍പ്പെടെയുള്ള നക്ഷത്രങ്ങളില്‍നിന്നുള്ള പ്ളാസ്മാ പ്രവാഹവും (Coronal Mass Ejection) ന്യൂസ്റ്റാര്‍ പഠനവിധേയമാക്കും. അതുവഴി ലഭിക്കുന്നത് വ്യക്തതയുള്ള ഒരു സമ്പൂര്‍ണ പ്രപഞ്ചചിത്രംതന്നെയായിരിക്കും.
വളരെ ചെറിയൊരു മേഖലയില്‍ ദ്രവ്യം അതിസാന്ദ്രമായി ഘനീഭവിക്കുമ്പോള്‍ ആ മേഖലയില്‍ ദ്രവ്യത്തിന്‍െറ ഗുരുത്വബലം അനന്തമാവുകയും പ്രകാശത്തിനുപോലും അവിടെനിന്ന് രക്ഷപ്പെടാന്‍ കഴിയാതാവുകയും ചെയ്യുന്ന പ്രതിഭാസമാണ് തമോഗര്‍ത്തങ്ങളെന്നു പറയുന്നത്. സൂര്യനേക്കാള്‍ പത്തുമടങ്ങിലധികം വലുപ്പമുള്ള നക്ഷത്രങ്ങളുടെ ജീവിതാന്ത്യത്തില്‍ നക്ഷത്ര വിസ്ഫോടനത്തെത്തുടര്‍ന്ന് അവ തമോഗര്‍ത്തങ്ങളായി മാറാന്‍ സാധ്യതയുണ്ട്. ഇതിന് കൃത്യമായ ഗണിതസൂത്രങ്ങള്‍ കണ്ടെത്തിയിട്ടുണ്ട്. തമോദ്വാരങ്ങളുടെ കേന്ദ്രം വൈചിത്യം (Singularity) എന്നാണ് അറിയപ്പെടുന്നത്. അവിടെ എന്തു നടക്കുന്നുവെന്നോ തമോദ്വാരങ്ങളില്‍ പതിക്കുന്ന ദ്രവ്യത്തിനും ഊര്‍ജത്തിനും എന്തു സംഭവിക്കുന്നുവെന്നോ കണ്ടെത്താന്‍ കഴിഞ്ഞിട്ടില്ല. തമോദ്വാരങ്ങളുടെ ആകര്‍ഷണബലം തീവ്രമാകുന്ന മേഖലയായ സംഭവ ചക്രവാള (Event Horizon)ത്തിനപ്പുറമുള്ള ഭാഗം ദൃശ്യപ്രപഞ്ചത്തില്‍നിന്ന് മറയ്ക്കപ്പെട്ടിരിക്കുകയാണ്. മിക്കവാറും എല്ലാ സര്‍പ്പിള ഗാലക്സികളുടെയും കേന്ദ്രത്തില്‍ ഭീമന്‍ തമോഗര്‍ത്തങ്ങളുണ്ട്. നമ്മുടെ മാതൃഗാലക്സിയായ ക്ഷീരപഥത്തിന്‍െറ കേന്ദ്രത്തില്‍ തമോഗര്‍ത്തത്തിന്‍െറ സാന്നിധ്യം തെളിയിക്കപ്പെട്ടിട്ടുണ്ട്. അടുത്തിടെ കോടി സൂര്യന്മാരുടെ പിണ്ഡമുള്ള രണ്ടു തമോഗര്‍ത്തങ്ങള്‍ കണ്ടെത്തിയത് വാര്‍ത്തകളില്‍ സ്ഥാനംപിടിച്ചിരുന്നു.
പ്രാപഞ്ചിക തിരശ്ശീല കീറിമുറിക്കുന്ന തമോദ്വാരങ്ങളെക്കുറിച്ചുള്ള പഠനംവഴി പ്രപഞ്ചോല്‍പത്തിയെക്കുറിച്ചും സമാന്തര പ്രപഞ്ചങ്ങളുടെ സാധ്യതകളെക്കുറിച്ചുമെല്ലാം നിലനില്‍ക്കുന്ന ദുരൂഹതകള്‍ ഇനി മറനീക്കി പുറത്തുവരും. ഓരോ തമോഗര്‍ത്തവും ഓരോ പ്രപഞ്ചമാണെന്ന ഏറ്റവും പുതിയ പരികല്‍പനയുടെ വിശ്വാസ്യത അളക്കുന്നതിനും ന്യൂസ്റ്റാറിനു കഴിയും. തമോഗര്‍ത്തങ്ങള്‍ രൂപമെടുക്കുന്നതും അവയുടെ വളര്‍ച്ചയും പഠിക്കുന്ന ന്യൂസ്റ്റാര്‍ നക്ഷത്രസമൂഹങ്ങളുടെ പ്രവര്‍ത്തനങ്ങളെ അവയെങ്ങനെ സ്വാധീനിക്കുമെന്നും കണ്ടെത്തും. സ്ഥലകാലങ്ങളുടെ അനന്തവക്രത പ്രവചിച്ച ഐന്‍സൈ്റ്റന്‍െറ സാമാന്യ ആപേക്ഷികതാ സിദ്ധാന്തം (General Theory of Relativity) ഉപകരണങ്ങളുടെ സഹായത്തോടെ പരീക്ഷിക്കാനും ന്യൂസ്റ്റാറിനു കഴിയും.
സവിശേഷമായി രൂപകല്‍പന ചെയ്തിരിക്കുന്ന 133 ദര്‍പണങ്ങള്‍ വീതമുള്ള രണ്ട് ഇമേജിങ് യൂനിറ്റുകളും അവയെ തമ്മില്‍ ബന്ധിപ്പിക്കുന്ന 13 അടി നീളമുള്ള ഡിറ്റക്ടറും ഏറ്റവും ശക്തമായ എക്സ്-കിരണങ്ങളെവരെ പിടിച്ചെടുക്കാന്‍ പര്യാപ്തമാണ്. നിരീക്ഷണമേഖലയുടെ ദൂരമനുസരിച്ച് ദര്‍പണങ്ങള്‍ സ്വയം ക്രമീകരണത്തിലൂടെ ഫോക്കസ് ചെയ്യാനും കഴിയും. കാലിഫോര്‍ണിയ ഇന്‍സ്റ്റിറ്റ്യൂട്ട് ഓഫ് ടെക്നോളജി (Caltech)യുടെയും നാസയുടെ ജെറ്റ് പ്രൊപല്‍ഷന്‍ ലാബിന്‍െറയും നിയന്ത്രണത്തിലാണ് ന്യൂസ്റ്റാര്‍ പ്രവര്‍ത്തിക്കുന്നത്. കൊളംബിയ സര്‍വകലാശാല, ഗോദാര്‍ദ് ഫൈ്ളറ്റ് സെന്‍റര്‍, എ.ടി.കെ എയ്റോസ്പേസ് സിസ്റ്റം, ഇറ്റാലിയന്‍ സ്പേസ് ഏജന്‍സി എന്നിവരുടെ സഹകരണവും ന്യൂസ്റ്റാറിനു പിന്നിലുണ്ട്. കെനിയയിലെ മലിന്‍ഡിയിലാണ് ദൂരദര്‍ശിനിയുടെ ഭൂതല നിയന്ത്രണ നിലയം (Ground Station) സ്ഥാപിച്ചിട്ടുള്ളത്.
ന്യൂസ്റ്റാര്‍ തുറക്കുന്നത് പ്രപഞ്ചത്തിന്‍െറ പുതിയ കിളിവാതിലുകളായിരിക്കുമെന്നാണ് കാള്‍ടെക്കിലെ പ്രഫസറായ ഫിയോന ഹാരിസണ്‍ പറയുന്നത്. മിഠായിക്കടയില്‍ വിടര്‍ന്ന കണ്ണുകളോടെ നോക്കിനില്‍ക്കുന്ന കുട്ടിയുടെ കൗതുകമാണ് ന്യൂസ്റ്റാറിന്‍െറ വിക്ഷേപണത്തിനു   തയാറെടുത്തുകൊണ്ടിരിക്കുന്ന ശാസ്ത്രസംഘത്തിനുള്ളത്. ന്യൂസ്റ്റാര്‍ പ്രപഞ്ച രഹസ്യങ്ങള്‍ ഓരോന്നായി അനാവരണം ചെയ്യുന്നത് കാണാന്‍ നമുക്കും കാത്തിരിക്കാം.