കൊടുംചൂടിനു മുമ്പൊരു മഞ്ഞുകാലമുണ്ട്.  ബദാം, മരുത് മരങ്ങള്‍ പൂവില്ലാതിരിക്കെ ഇലയെല്ലാം  പഴുത്ത് പാടലവും ഊതവുമൊക്കെയായിത്തീര്‍ന്നു.  ശീമക്കൊന്ന ഇളംപാടലപ്പൂക്കള്‍ നിറച്ച് തീര്‍ത്ത പൂങ്കാട്ടിലിരുന്ന് കുയില്‍ എന്തൊക്കെയോ പാടിപറഞ്ഞു.    ഇലവും മറ്റുമരങ്ങളും ഇല തീര്‍ത്തുംപൊഴിച്ച് പുതുശരീരം തീര്‍ത്ത് പുത്തനാണ്ടിന്‍ പ്രതീക്ഷകളുമായി നില്‍ക്കുന്നു. ഇനി പകലോനെ കാണണം, പകലേറെ കാണണം, പലതുമായ് തീരണം... മരംപോലും കോച്ചുന്നൊരു മകരമുണ്ടായിരുന്നു. മഞ്ഞത്ത് പൊഴിഞ്ഞ കരിയിലയെല്ലാം അടിച്ചുകൂട്ടി ചുറ്റും കൂടിയിരുന്ന് തീകാഞ്ഞ് തണുപ്പാറ്റിയ പുലര്‍ക്കാലങ്ങള്‍ ഇപ്പോഴുമുണ്ടോ? പുലരിയല്‍പം കഴിഞ്ഞാലോ മകരക്കാറ്റും. മകരവെയിലൊന്ന് മൂക്കുമ്പോള്‍ മകരക്കാറ്റില്‍ പട്ടം പറത്തിവിടും. ഭൂമിയിലുറച്ചുനില്‍ക്കേ വെണ്‍മുകിലുകളെ നോക്കി, സൂര്യന്‍െറ മഹാപ്രഭ തേടി,  നൂലിഴയിലൂടെ പട്ടം മോഹങ്ങളുമായി മുകളിലേക്കുയരും. ആരാണ് മകരക്കുളിരിനെ ഇല്ലാതാക്കുന്നത്? മലമുകളിലേക്ക്, ഗ്രാമംതോറുമുള്ള മൈതാനങ്ങളിലെ സമ്മേളനങ്ങളിലേക്ക്്, കലാ കായിക മഹാമേളകളിലേക്കുമൊക്കെയുള്ള തീര്‍ഥാടനകാലമല്ളോ മലയാളിക്ക് മഞ്ഞുകാലം. മഞ്ഞാണോ  മനമാണോ ആളുകളെ കൂട്ടിച്ചേര്‍ക്കുന്നത്? മകരമാസത്തിലെ മാനംകാണാന്‍ സൂചന വായിച്ച് തുടരുക.  
സന്ധ്യാമാനത്ത് വടക്ക് ചക്രവാളത്തില്‍നിന്ന് ഉയര്‍ന്ന്  W മറിഞ്ഞ ആകൃതിയില്‍ കാണുന്ന എളുപ്പം തിരിച്ചറിയാവുന്ന നക്ഷത്രഗണമാണ് കസ്യോപ്യ  (Cassiopeia).  കസ്യോപ്യക്ക് അല്‍പം തെക്ക് ഒരു നക്ഷത്രക്കുല- കാര്‍ത്തികക്കൂട്ടം (Plaiedes) മങ്ങിക്കാണാം. ബൈനോക്കുലറില്‍ മനോഹര കാഴ്ചയാണിത്. കസ്യോപ്യയുടെ സ്ഥാനത്ത് പുലര്‍ച്ചെ നോക്കിയാല്‍ വലിയ തവിയുടെ ആകൃതിയില്‍ കാണുന്ന ഗണമാണ് സപ്തര്‍ഷികള്‍ (Ursa major/big dipper). ഇപ്പോള്‍ രാത്രിയില്‍ എളുപ്പം തിരിച്ചറിയാവുന്ന മധ്യാകാശത്തിലെ ഒരു നക്ഷത്രഗണമാണ് ഓറിയണ്‍ (Orion). വേട്ടക്കാരന്‍, ഏണം, ശബരഗണം എന്നീ പേരുകളുമുള്ള ഈ ഗണത്തെ നേര്‍മുകളില്‍  കാണാം. ഒരു ചരിഞ്ഞ വരയിലെന്നോണം അടുത്തടുത്ത് മൂന്നു നക്ഷത്രങ്ങള്‍; ത്രിമൂര്‍ത്തികള്‍ (belt) അവക്ക് ചുറ്റും ഒരു ചതുരത്തിന്‍െറ നാലു മൂലകളിലെന്നോണം തിളക്കംകൂടിയ നാലുനക്ഷത്രങ്ങള്‍-രണ്ടെണ്ണം വടക്കും  രണ്ടെണ്ണം തെക്കും. വടക്കുള്ള  രണ്ടിനുമിടയിലായുള്ള മങ്ങിയ ഒരു നക്ഷത്രക്കൂട്ടം-മകയീര്യം, ത്രിമൂര്‍ത്തികളിലേക്ക് ചൂണ്ടി തൊട്ടടുത്ത് നിരന്ന മങ്ങിയ മൂന്നു നക്ഷത്രങ്ങള്‍. ഇവ ചേര്‍ത്താണ് വേട്ടക്കാരന്‍. ത്രിമൂര്‍ത്തികള്‍ ഖിബ്ല നക്ഷത്രങ്ങള്‍ എന്നും അറിയപ്പെടുന്നു. ത്രിമൂര്‍ത്തികള്‍ക്ക് വടക്കുള്ള നക്ഷത്രങ്ങളില്‍ കിഴക്കുള്ള ചുവന്നത് തിരുവാതിര നക്ഷത്രം (Betelgeuse). പടിഞ്ഞാറുളളത് ബെല്ലാട്രിക്സ്. ത്രിമൂര്‍ത്തികള്‍ക്കു തെക്ക് -ചതുരത്തിന്‍െറ തെക്കേ മൂലകളില്‍ കിഴക്കുള്ളതാണ് സെയ്ഫ ്(saiph) പടിഞ്ഞാറുള്ളത് റൈഗല്‍((Rigel). വേട്ടക്കാരന്‍ തിരിച്ചറിഞ്ഞാല്‍ നക്ഷത്ര മാപ്പ് നോക്കി മറ്റ് നക്ഷത്രഗണങ്ങളെ എളുപ്പം മനസ്സിലാക്കാം. ആകാശത്തിലെ ഏറ്റവും തിളക്കമുള്ള നക്ഷത്രത്തെ (സിറിയസ് /രുദ്രന്‍; (Sirius) വേട്ടക്കാരന്‍ ഗണത്തിന്‍െറ  തെക്കുകിഴക്കു  മൂലക്ക് അരികിലായി കാണാം.  Y മറിച്ചിട്ടതുപോലെ സിറിയസിനോടു ചേര്‍ന്ന്  ഏതാനും നക്ഷത്രങ്ങളെയും കാണാം.  സിറിയസും ഈ കൂട്ടുകാരും ചേര്‍ന്നതാണ് ബൃഹത് ശ്വാനന്‍ (Canis Major)ഗണം. സിറിയസ് സമീപത്തെ സാമാന്യം തിളക്കമുള്ള നക്ഷത്രമാണ്  മിര്‍സാം(Mirzam). തിരുവാതിരയില്‍നിന്ന് അല്‍പം കിഴക്കുമാറി ഒരു ജോടി നക്ഷത്രങ്ങളെ കാണാം. ഇവയില്‍ തിളക്കമേറിയത് പ്രോസിയന്‍ (Procyon), മങ്ങിയത് ഗൊമീസ(Gomeisa).  ഇവ രണ്ടും ചേര്‍ന്നതാണ് ലഘുശ്വാനന്‍ (Canis Minor)ഗണം. വേട്ടക്കാരന്‍െറ തെക്കുപടിഞ്ഞാറു മൂലയിലുള്ള  നീലനക്ഷത്രമായ റൈഗല്‍, വടക്കുകിഴക്കു മൂലയിലെ ചുവന്ന തിരുവാതിര  എന്നിവയിലൂടെ  വടക്കുകിഴക്കോട്ടു നീങ്ങിയാല്‍ അല്‍പമകലെ ഒരു ജോടി നക്ഷത്രങ്ങളെ കാണാം. ഇവയില്‍ തെക്കുള്ള ചുവന്ന നക്ഷത്രമാണ് പോളക്സ് (Pollux), വടക്കുള്ളത് കാസ്റ്റര്‍(Castor). അശ്വിനി ദേവകള്‍ എന്നറിയപ്പെടുന്ന ഇവയും സമീപത്തെ ഏതാനും നക്ഷത്രങ്ങളും ചേര്‍ന്നതാണ്  മിഥുനം(Gemini) ഗണം. സിറിയസ്, പ്രോസിയ,  പോളക്സ്, കാസ്റ്റര്‍, ഗൊമീസ, മിര്‍സാം  എന്നീ നക്ഷത്രങ്ങളെ ചേര്‍ത്തുവരച്ചാല്‍ ഒരു തോണിയുടെ രൂപം കിട്ടും.  ഇതാണ് പുണര്‍തം. വേട്ടക്കാരനില്‍നിന്ന് ഏറെ തെക്ക്,  സിറിയസ്  കഴിഞ്ഞാല്‍ ഏറ്റവും തിളക്കമുള്ള  അഗസ്ത്യന്‍(Canopus)നക്ഷത്രത്തെ കാണാം.  കരൈന ഗണത്തിലെ ഒന്നാമനാണിത്
സിറിയസ്, തിരുവാതിര നക്ഷത്രങ്ങളിലൂടെ വടക്കു പടിഞ്ഞാറോട്ടു നീട്ടിയാല്‍ എത്തിച്ചേരുന്ന ചുവന്ന നക്ഷത്രമാണ് ഷഢാസ്യന്‍ (Capella).  ഇതും തൊട്ടടുത്ത ഏതാനും നക്ഷത്രങ്ങളും ചേര്‍ന്ന്  തീര്‍ക്കുന്ന വികൃതമായ ഒരു പഞ്ചഭുജം ആണ് പ്രാജിത/ഓറിഗ (Auriga)നക്ഷത്രഗണം.  വേട്ടക്കാരന്‍ഗണത്തിന് വടക്കുഭാഗത്തായി ഇതിനെകാണാം. ബൈനോക്കുലറിലൂടെ ഈ ഗണത്തിലേക്ക് നോക്കിയാല്‍ മങ്ങിയ നക്ഷത്രക്കുലകളെ മനോഹരമായി കാണാം. ഓറിഗയുടെ തൊട്ടുപടിഞ്ഞാറ് ഭാഗത്ത് കൊക്കുപോലെ രണ്ടുനിര നക്ഷത്രങ്ങള്‍ മുന വടക്കോട്ടു ചൂണ്ടിക്കാണാം. വരാസവസ്(Perseus) ഗണമാണിത്. ബൈനോക്കുലറിലൂടെ ഈ മുനയിലേക്ക് നോക്കിയാല്‍ മങ്ങിയ ഇരട്ട നക്ഷത്രക്കുല (Double Cluster h & chi persei)യെ കാണാം. വരാസവസ്(Perseus) ഗണത്തിന്‍െറ പടിഞ്ഞാറേ നിരയില്‍ മങ്ങിയ ഒരു നക്ഷത്രമുണ്ട്. ഏതാണ്ട് രണ്ടുദിവസംകൊണ്ട് കാന്തിമാനം 2.2 മുതല്‍ 3.5 വരെ വ്യത്യാസം കാട്ടുന്ന ചരനക്ഷത്രമായ (Variable) അല്‍ഗോള്‍(Algol) ആണിത്.
ഗ്രഹങ്ങള്‍: സന്ധ്യക്ക് മധ്യാകാശത്തില്‍ വ്യാഴം  (Jupiter) മേടംരാശിയിലും  പടിഞ്ഞാറേ ചക്രവാളത്തില്‍ ശുക്രന്‍(Venus) കുഭം രാശിയിലുമായി ഏറെ തിളങ്ങി കാണാം. പുലര്‍ച്ചെ മധ്യാകാശത്തില്‍ ചൊവ്വ (Mars)യെ ചിങ്ങം രാശിയിലും ശനി (Saturn) യെ തുലാം രാശിയിലും ചുവന്നു കാണാം. ഈ മാസം  31ന്, വ്യാഴത്തെ ചന്ദ്രനരികിലായി  കാണാം. തിങ്കള്‍(ചന്ദ്രന്‍), ചൊവ്വ, ബുധന്‍, വ്യാഴം, വെളളി(ശുക്രന്‍), ശനി എന്നിവ നക്ഷത്രപശ്ചാത്തലത്തില്‍ ദിനേന കിഴക്കോട്ട് നീങ്ങുന്നത് വെറും കണ്ണില്‍ തന്നെ നിരീക്ഷിച്ചറിയാവുന്നതാണ്.  
(സൂചന: ഇരുണ്ട തെളിഞ്ഞ മാനം ലഭ്യമാവുന്ന സ്ഥലത്ത്  20 മിനിറ്റോളം  ഇരുട്ടിനെ പരിചയിച്ച് (Dark adapted) നക്ഷത്രനിരീക്ഷണം നടത്തുക.   നക്ഷത്രമാപ്പ്  തലക്കു മുകളില്‍പിടിച്ചു ദിശ കൃത്യമാക്കി  നിരീക്ഷിക്കാം. മാപ്പിലെ അകത്തെ വൃത്തത്തിലെ ഗണങ്ങള്‍ ശ്രദ്ധിച്ച് അവയെ മാനത്ത് തിരിച്ചറിയുക. മാപ്പ് വായിക്കുന്നതിനായി ചുവന്ന നുറുങ്ങുവെട്ടവും  കൂടെ കരുതാം.  ഈ മാസം 15ന്  ഒമ്പതു മണിക്കും  30ന്  എട്ടു മണിക്കും ആകാശ ചിത്രം ഈ മാപ്പിലേതുപോലെയായിരിക്കും.