ഫെബ്രുവരി 24

• പ്രമുഖ ബഹിരാകാശ ശാസ്ത്രജ്ഞനും ബഹിരാകാശ കമീഷന്‍ അംഗവുമായ റോഥം നരസിംഹ ആന്‍ട്രിക്സ്-ദേവാസ് കരാറിന്റെപേരില്‍ ഐ.എസ്.ആര്‍.ഒ മുന്‍ മേധാവി ജി.മാധവന്‍ നായരെയും മുതിര്‍ന്ന ശാസ്ത്രജ്ഞരെയും കരിമ്പട്ടികയില്‍പ്പെടുത്തിയതില്‍ പ്രതിഷേധിച്ച്  രാജിവെച്ചു.
• ഗുജറാത്തിലെ ഏറ്റുമുട്ടലുകളെക്കുറിച്ചുള്ള അന്വേഷണത്തിന്റെ മേല്‍നോട്ടത്തിന് സ്വന്തം നിലയില്‍ ചെയര്‍മാനെ നിയോഗിച്ചതിന് മോഡി സര്‍ക്കാറിനെ സുപ്രീംകോടതി രൂക്ഷമായി വിമര്‍ശിച്ചു.
• യു.എന്‍ മുന്‍ ജനറല്‍ സെക്രട്ടറി കോഫി അന്നാനെ സിറിയയിലെ പ്രത്യേക സമാധാന ദൂതനായി യു.എന്‍ നിയമിച്ചു.
• ഗവേഷകനും സാങ്കേതിക ശാസ്ത്ര കോളമിസ്റ്റുമായ ഇന്ത്യന്‍ വംശജന്‍ വിവേക് വാധ്വക്ക് യു.എസില്‍ 'വേറിട്ട അമേരിക്കന്‍ പൗരന്‍' പുരസ്കാരം.
• സ്റ്റോക് ഹോം ഗാലന്‍ മീറ്റില്‍ 5.01 മീറ്റര്‍ ഉയര്‍ന്നു ചാടി വനിതാ പോള്‍വാള്‍ട്ടിലെ സ്വന്തം റെക്കോഡ് ഒരിക്കല്‍ കൂടി തിരുത്തി റഷ്യക്കാരിയെലേന ഇസിന്‍ബയേവ ചരിത്രം കുറിച്ചു.

ഫെബ്രുവരി 25

• പ്രമുഖ നാടകകൃത്തും അഭിനേതാവും സംഗീതകാരനും സാംസ്കാരിക പ്രവര്‍ത്തകനുമായ കുറ്റിച്ചിറ പുതിയ നാലകത്ത് മാളിയേക്കല്‍ ആലിക്കോയ (പി.എന്‍.എം. ആലിക്കോയ-92) അന്തരിച്ചു.
• യമനില്‍ 33 വര്‍ഷത്തെ ഏകാധിപത്യ ഭരണത്തിന് വിരാമമിട്ട് മുന്‍ വൈസ്  പ്രസിഡന്റ് അബ്ദുറബ്ബ് മന്‍സൂര്‍ ഹാദി പുതിയ പ്രസിഡന്റായി സത്യപ്രതിജ്ഞ ചെയ്തു.
• ചലച്ചിത്ര ഫിലിം സൊസൈറ്റിയുടെ 2011 ലെ മികച്ച സംവിധായക പ്രതിഭക്കുള്ള  അരവിന്ദന്‍ പുരസ്കാരം ബംഗാളി ചലച്ചിത്രമായ 'ജുമേലി'യുടെ സംവിധായിക അനുമിത ദാസ് ഗുപ്തക്ക ലഭിച്ചു്.

ഫെബ്രുവരി 26

• സിറിയയില്‍ പുതിയ ഭരണഘടനക്ക് അംഗീകാരം ലഭിക്കാന്‍ ഹിതപരിശോധന നടന്നു.
• ഇന്ത്യയുടെ പുരുഷ ഹോക്കി ടീം  2012 ലണ്ടന്‍ ഒളിമ്പിക്സ് യോഗ്യത നേടി.

ഫെബ്രുവരി 27

• ഇന്ത്യന്‍ ഫുട്ബാളിലെ നൂറ്റാണ്ടിന്റെ താരം ശൈലന്‍ മന്ന (ശൈലേന്ദ്രനാഥ് മന്ന 87) അന്തരിച്ചു.
• 84ാമത് ഓസ്കര്‍ പുരസ്കാരങ്ങള്‍ പ്രഖ്യാപിച്ചു.ഏറ്റവുംമികച്ച ചിത്രം 'ദി ആര്‍ട്ടിസ്റ്റ്'.  മിഷേല്‍ ഹസനാവിഷ്യസ് മികച്ച സംവിധായകന്‍. ജീന്‍ ദുജാര്‍ദിന്‍ മികച്ച നടന്‍. 'ദ അയണ്‍ ലേഡി'യിലെ അഭിനയത്തിന് മെറില്‍ സ്ട്രീപ് മികച്ച നടി. മികച്ച വിദേശഭാഷാ ചിത്രത്തിനുള്ള പുരസ്കാരം നേടി അസ്ഗര്‍ ഫര്‍ഹാദി സംവിധാനം ചെയ്ത ഇറാന്‍ ചിത്രം 'എ സെപറേഷന്‍' ചരിത്രമെഴുതി. പാകിസ്താനില്‍നിന്നുള്ള 'സേവിങ് ഫേസ്' മികച്ച ഡോക്യുമെന്ററിയായി.
• പ്രമുഖ ചരിത്രകാരനും ചര്‍ച്ച് ഹിസ്റ്ററി അസോസിയേഷന്‍ ഓഫ് ഇന്ത്യയുടെ സെക്രട്ടറി ജനറലുമായിരുന്ന ഡോ. ജോണ്‍ ഓച്ചന്‍തുരുത്ത് (66) നിര്യാതനായി.

ഫെബ്രുവരി 28     

• ഇന്ത്യയിലെ പ്രമുഖ തൊഴിലാളി സംഘടനകളുടെ നേതൃത്വത്തില്‍ രാജ്യ വ്യാപകമായി പണിമുടക്കു നടന്നു.
• രണ്ട് മത്സ്യത്തൊഴിലാളികളുടെ മരണത്തിന് കാരണക്കാരായ ഇറ്റാലിയന്‍ കപ്പലിന്റെ ഉടമകള്‍ മൂന്ന് കോടി സെക്യൂരിറ്റി കെട്ടിവെക്കാന്‍ ഹൈകോടതി നിര്‍ദേശിച്ചു.
• സ്വവര്‍ഗരതി കുറ്റകൃത്യമല്ലെന്ന നിലപാടാണ് തങ്ങള്‍ക്കെന്ന് കേന്ദ്ര സര്‍ക്കാര്‍ സുപ്രീംകോടതിയില്‍ ബോധിപ്പിച്ചു.

ഫെബ്രുവരി 29

• നായര്‍ സര്‍വീസ് സൊസൈറ്റി (എന്‍.എസ്.എസ്.) പ്രസിഡന്റും മുന്‍ ജനറല്‍ സെക്രട്ടറിയുമായ  പി.കെ. നാരായണപ്പണിക്കര്‍ അന്തരിച്ചു.
• നദീസംയോജനം സംബന്ധിച്ച സുപ്രീംകോടതി വിധി കേരളത്തിന് ബാധകമല്ലെന്ന് മുഖ്യമന്ത്രി ഉമ്മന്‍ചാണ്ടി.
• പതിനൊന്ന് വര്‍ഷം മുമ്പ് ഗസ്സ മുനമ്പില്‍ ഇസ്രായേലീ സൈന്യത്തിന്റെ വെടിയേറ്റ്  മരിച്ച ഫലസ്തീന്‍ ബാലന്റെ ദൈന്യമരണത്തെക്കുറിച്ച് അന്വേഷിക്കാന്‍ ഫ്രഞ്ച് ഹൈകോടതി ഉത്തരവിട്ടു.

തയാറാക്കിയത്: കെ.കെ. ഉസ്മാന്‍