‘വാളെടുത്തവരെല്ലാം വെളിച്ചപ്പാടുകള്‍’ എന്നൊരു പ്രയോഗം കേട്ടിട്ടില്ളേ? ഏതാണ്ട് ഇതേ അവസ്ഥയായിരുന്നു ശാസ്ത്രം പുരോഗതി പ്രാപിക്കുന്നതിനുമുമ്പ് ലോകത്തെ ചികിത്സാ രംഗം. ബാര്‍ബറും കൊല്ലനും മരംവെട്ടുകാരനും ഇറച്ചിവെട്ടുകാരനുമെന്നുവേണ്ട, കത്തിയും വാളും ഉപയോഗിക്കുന്നവരൊക്കെ ശസ്ത്രക്രിയ ചെയ്യാന്‍ അധികാരപ്പെട്ടവരായിരുന്ന കാലം! ഒരാളുടെ കൈക്ക് പഴുപ്പുബാധിച്ചുവെന്നിരിക്കട്ടെ, അതു ചികിത്സിച്ചു ഭേദമാക്കുന്നതിനേക്കാള്‍ ‘എളുപ്പം’ രോഗം ബാധിച്ച കൈ തന്നെയങ്ങ് വെട്ടിക്കളയുകയാണ് എന്നായിരുന്നു വൈദ്യന്മാര്‍ വിധിച്ചത്. അങ്ങനെ രോഗിയെ പെരുങ്കൊല്ലന്‍െറ ആലയിലേക്ക് കൊണ്ടുവരുകയും കൊല്ലന്‍െറ കൊടുവാള്‍ കൊണ്ട് ‘ഓപറേഷന്‍’ കഴിയുകയും ചെയ്തു. രോഗിക്ക് ഭാഗ്യമുണ്ടെങ്കില്‍ ജീവന്‍ തിരിച്ചുകിട്ടും. അല്ളെങ്കില്‍ വിധി എന്നു കരുതി സമാധാനിക്കും വീട്ടുകാര്‍. അത്ര തന്നെ!
അസുഖം ബാധിച്ച ഏതൊരാളെയും ഇങ്ങനെ ‘ചികിത്സിക്കാന്‍’ അന്നത്തെ മരംവെട്ടുകാരനും പൂജാരിക്കും വെളിച്ചപ്പാടിനും വരെ അധികാരമുണ്ടായിരുന്നുവത്രെ. കൊടുവാളും ഉളിയും മുട്ടിയും കൂര്‍ത്ത എല്ലുകളും മീന്‍മുള്ളും കല്ലുമൊക്കെയായിരുന്നു അന്നത്തെ ശസ്ത്രക്രിയോപകരണങ്ങള്‍. കത്തി ഉണ്ടാക്കുന്നവനും ഉപയോഗിക്കുന്നവനുമൊക്കെ ‘സര്‍ജറി സ്പെഷലിസ്റ്റുകള്‍’ ആയ അന്നത്തെ മറ്റൊരു രീതിയായിരുന്നു ‘രക്തം ഊറ്റിക്കളയല്‍ വിദ്യ.’ പേരു സൂചിപ്പിക്കുന്നതുപോലെ തന്നെയായിരുന്നു ഈ ചികിത്സ. രോഗിയുടെ ശരീരത്തില്‍നിന്ന് അസുഖം ബാധിച്ച രക്തം ഒഴുക്കിക്കളഞ്ഞ് രോഗം മാറ്റുന്ന രീതി! ഇന്ന് നമ്മള്‍ രക്തം ഒരേ ഗ്രൂപ്പിലുള്ളവര്‍ക്ക് നല്‍കുന്നതിന്‍െറ നേര്‍ വിപരീതം! ഓര്‍മക്കുറവ്, ബധിരത, മരവിപ്പ്, പഴുപ്പ് തുടങ്ങിയ അസുഖങ്ങള്‍ക്കാണ് അന്നത്തെ ‘സ്പെഷല്‍ വൈദ്യന്‍സ്’ ഇങ്ങനെയൊരു രീതി നിശ്ചയിച്ചിരുന്നത്. അട്ടകളെക്കൊണ്ട് കടിപ്പിച്ചും മുറിവുണ്ടാക്കിയും രക്തം ഊറ്റിക്കളയും. പലപ്പോഴും ഈ ചികിത്സ രോഗിയെ കൂടുതല്‍ അവശനാക്കുകയോ കൊല്ലുകയോ ചെയ്തിരുന്നു. 1860ല്‍ ഈ സമ്പ്രദായത്തിന് ഫുള്‍സ്റ്റോപ്പിട്ടുവത്രെ!

ഭൂതചികിത്സ
പുരാതന മെസൊപ്പൊട്ടേമിയക്കാരുടെ വിശ്വാസം ഭൂത-പ്രേത-പിശാചുക്കളാണ് മനുഷ്യന് രോഗങ്ങള്‍ നല്‍കുന്നതെന്നായിരുന്നു. അസുഖം വന്നയാളെ സമൂഹത്തിലെ പുരോഹിതന്‍െറയടുത്തേക്കാണ് ആദ്യം കൊണ്ടുപോവുക. പുരോഹിതന്‍ പച്ചവെള്ളം പോലും നല്‍കാതെ രോഗിയെ രണ്ടു ദിവസം പട്ടിണിക്കിടും. മൂന്നാം നാള്‍ രോഗിയെ ദേവാലയത്തില്‍ കൊണ്ടുപോയി, അസുഖപ്പിശാച് ശരീരം വിട്ടുപോകാന്‍ വിശേഷാല്‍ പ്രാര്‍ഥന നടത്തുകയും അവിടെയുള്ളൊരു വിശേഷപ്പെട്ട മരത്തില്‍ രോഗിയുടെ തല ശക്തിയായി മൂന്നുതവണ ഇടിപ്പിക്കുകയുംചെയ്യും. ‘അസുഖം എടുത്തുപോ’ എന്ന് പുരോഹിതന്‍ അലറുന്നുമുണ്ടാകും. മൂന്നു ദിവസം പട്ടിണി കിടക്കുമ്പോഴേക്കും രോഗി മരണത്തോടടുത്തിയിരിക്കും. കൂടാതെ, അസുഖവും പിന്നെ തലയടിക്കലും കൂടിയാകുമ്പോള്‍ പാവം രോഗിയുടെ കാറ്റുപോയിട്ടുണ്ടാകും. എന്നാലും പുരോഹിതനെ ആരും ഒന്നും ചെയ്യില്ല. കാരണം, പിശാചുബാധ അത്രക്കും കേമമായിരുന്നു. അതുകൊണ്ടാണല്ളോ രോഗി മരിച്ചുപോയത്!

തലയോട്ടി തുരന്ന് ചികിത്സ
പിശാചുക്കളാണ് സകലവിധ അസുഖങ്ങള്‍ക്കും കാരണം എന്നു തന്നെയായിരുന്നു പഴയ ശിലായുഗ ജനതയുടെയും വിശ്വാസം. പിശാചുക്കളെ അകറ്റാന്‍ അവര്‍ വിശ്വസിച്ചിരുന്ന ദേവീദേവന്മാരുടെ ചിഹ്നങ്ങള്‍ കൊത്തിയ ‘മാന്ത്രികവടികള്‍’ കൊണ്ടായിരുന്നുവത്രെ ചികിത്സ. അസുഖമുള്ള രോഗിയുടെ തലച്ചോറിലാണ് ബാധയുള്ളതെന്ന് ഗണിച്ചുമനസ്സിലാക്കി, തലയോട്ടി തുരന്ന് വടി അകത്തുകടത്തി, ചില മന്ത്രങ്ങള്‍ ചൊല്ലിയായിരുന്നു ചികിത്സ. തലച്ചോറില്‍ ചികിത്സ നടത്തിയ പാവം രോഗികളുടെ അവസ്ഥയൊന്നാലോചിച്ചുനോക്കൂ...ശിലായുഗത്തില്‍നിന്നു ലഭിച്ച ചില തലയോട്ടികളില്‍ ഇത്തരത്തിലുള്ള വൃത്താകാരത്തിലുള്ള ദ്വാരങ്ങള്‍ കണ്ടെത്തിയിരുന്നു. ഇത്തരം ചികിത്സയുടെ ഫലമായിരിക്കാം കാരണമെന്നാണ് ചരിത്രകാരന്മാര്‍ ഊഹിക്കുന്നത്. ഇങ്ങനെ ചികിത്സ ലഭിച്ച് മരിച്ചവരുടെ തലയോട്ടികള്‍ ആഭരണമായി അവര്‍ അണിഞ്ഞിരുന്നുവത്രെ. അത്തരക്കാരെ ബാധിക്കാന്‍ പിശാചിന് പേടിയായിരിക്കുമെന്നുള്ള വിശ്വാസമായിരുന്നു കാരണം.

മുറിവുണക്കാന്‍...
സര്‍പ്പവിഷമേറ്റാല്‍ ആ ഭാഗം ബ്ളേഡ് കൊണ്ട് കീറി, വിഷം കലര്‍ന്ന രക്തം ഊമ്പി വലിക്കുന്ന സമ്പ്രദായം പ്രഥമ ചികിത്സയായി നമ്മള്‍ പിന്തുടരുന്നുണ്ടല്ളോ. ഈ രീതി ശിലായുഗത്തിലുമുണ്ടായിരുന്നതായി ചരിത്രകാരന്മാര്‍ കണ്ടെത്തുന്നു. മുറിവേറ്റ ഭാഗം നക്കുകയോ വലിച്ചുകുടിച്ചു തുപ്പുകയോ ചെയ്തിരുന്നു അവര്‍. കുറേ രക്തം വാര്‍ന്നുപോയാല്‍ വേദന കുറയുമെന്നായിരുന്നു വിശ്വാസം. സാധാരണ മുറിവുകള്‍ക്ക് ഇതു മതിയെങ്കിലും മുറിവ് മാരകമാണ് എങ്കില്‍ ചികിത്സയും വലുതായിരിക്കും-അവിടെ തീവെച്ചു പൊള്ളിച്ചാണ് ചികിത്സ! ഇത്തരം ചികിത്സയും അതിജീവിച്ചവര്‍ അന്നുണ്ടായിരുന്നുവത്രെ!

ചികിത്സ സ്വപ്നമായും!
പ്രാചീന റോമക്കാരാണ് ഇങ്ങനെ വിശ്വസിച്ചിരുന്നത്. ഒൗഷധ ദേവനായ ‘ഇസ്കുലാഫിയസി’ന്‍െറ ക്ഷേത്രത്തിലെ പ്രത്യേക പാത്തിയില്‍ രോഗിയെ കിടത്തുകയാണ് ആദ്യപടി. അങ്ങനെ, ദേവന്‍ സ്വപ്നത്തില്‍വന്ന്, രോഗം ഇന്നതാണ് എന്നും ചികിത്സയും പറയും. കണ്ട സ്വപ്നം രോഗി പുരോഹിതനോട് പറയണം. അങ്ങനെ പുരോഹിതനാണ് ചികിത്സ വിധിക്കുന്നത്.

ബലിയും കുരുതിയും
പ്രാചീന ഭാരതീയര്‍ ഹോമപൂജാദികള്‍ നടത്തിയാണ് ചികിത്സ നടത്തിയിരുന്നത്. മൃഗബലിയും പ്രപഞ്ച ശക്തികളെ ആരാധിച്ചുള്ള ചികിത്സയും ഇവിടെയുണ്ടായിരുന്നു. ദേവീദേവന്മാര്‍ കോപിച്ചതാണ് കാരണമെന്നും അവരെ പ്രീതിപ്പെടുത്തിയാല്‍ മാത്രമേ അസുഖം ഭേദമാകൂവെന്നുമുള്ള വിശ്വാസത്തില്‍ നിന്നായിരുന്നു ബലിയും കുരുതിയുമൊക്കെ ഉണ്ടായത്. ഇന്ത്യയിലെ ചില കുഗ്രാമങ്ങളില്‍ ഇന്നും ഇത്തരം വിശ്വാസങ്ങളുണ്ട്. ബാലവിവാഹവും നരബലിയുമെല്ലാം നടക്കുന്നതിന്‍െറ വാര്‍ത്തകള്‍ ബിഹാര്‍, രാജസ്ഥാന്‍ തുടങ്ങിയ സംസ്ഥാനങ്ങളില്‍നിന്നും നമ്മള്‍ അറിയാറുണ്ടല്ളോ.

അസുഖങ്ങള്‍ തിരിച്ചറിഞ്ഞ്  ചികിത്സ
സിന്ധു നദീതട സംസ്കാരകാലത്ത് ചികിത്സാ രംഗം ഒന്നുകൂടി പുരോഗമിച്ചു. നാഡികളുടെ പ്രാധാന്യം അന്നുള്ളവര്‍ മനസ്സിലാക്കിയിരുന്നു. ആയിരത്തിലേറെ രോഗങ്ങളെ തിരിച്ചറിയുകയും ചികിത്സിക്കുകയും അതിനുള്ള ഉപകരണങ്ങള്‍ അവര്‍ വികസിപ്പിച്ചെടുക്കുകയും ചെയ്തിരുന്നു. സര്‍ജറി വേളകളില്‍ വേദന അറിയാതിരിക്കാന്‍ ബോധം കെടുത്താനുള്ള മരുന്നുകള്‍ വരെ അക്കാലത്തുണ്ടായിരുന്നുവെന്നറിയുമ്പോള്‍ നമ്മള്‍ അതിശയിച്ചുപോകുന്നു. ഖനനാവശിഷ്ടങ്ങളില്‍നിന്ന് ഒൗഷധക്കൂട്ടും ചികിത്സക്ക് ഉപയോഗിച്ചിരുന്ന ഉപകരണങ്ങളും കണ്ടുകിട്ടിയതില്‍ നിന്നാണ് ചരിത്രകാരന്മാര്‍ ഈ ഊഹങ്ങള്‍ നമുക്ക് തരുന്നത്.

അക്യുപങ്ചര്‍
ചൈനയില്‍ ചികിത്സ പുരോഗമിക്കുന്നത് ക്രിസ്തുവിന് 2800 വര്‍ഷങ്ങള്‍ക്കു മുമ്പാണെന്നാണ് ചരിത്രകാരന്മാര്‍ കണ്ടെത്തുന്നത്. ആരോഗ്യം നശിച്ചാല്‍ അത് വീണ്ടെടുക്കാന്‍ അവര്‍ ചില സൂത്രവിദ്യകള്‍ വികസിപ്പിച്ചെടുത്തിരുന്നു. ശരീരത്തിലെ ചില പ്രത്യേക സ്ഥലങ്ങളില്‍ നേരിയ സൂചികള്‍ കൊണ്ട് കൊച്ചു സുഷിരങ്ങള്‍ വീഴ്ത്തി ആ ഭാഗത്തെ രക്തം കുറേശ്ശയായി പുറത്തേക്ക് കളഞ്ഞാല്‍, ആരോഗ്യം പതിന്മടങ്ങുണ്ടാകുമെന്നായിരുന്നു കണ്ടുപിടിത്തം. ഇന്നത്തെ ‘അക്യുപങ്ചര്‍’ ചികിത്സയുടെ മുന്‍ഗാമിയാണ് ചൈനക്കാരുടെ ഈ സൂത്രമെന്ന് ചരിത്രം പറയുന്നു.

ഒൗഷധപ്പുക കടത്തിവിട്ടും...
നൂറ്റാണ്ടുകളങ്ങനെ കഴിഞ്ഞപ്പോള്‍ മനുഷ്യന്‍ കൂടുതല്‍ പരീക്ഷണങ്ങള്‍ നടത്തി പുതിയ രീതികള്‍ വികസിപ്പിച്ചെടുത്തു. സസ്യങ്ങളില്‍നിന്ന് അസുഖങ്ങള്‍ സുഖപ്പെടാനുള്ള മരുന്നുകള്‍ എടുക്കുന്ന സൂത്രം മനുഷ്യന്‍ വശമാക്കി. അതുപോലെ, ഇന്നത്തെ പ്രകൃതിചികിത്സയുടെ മുന്‍ഗാമിയായ മണ്ണുകൊണ്ട് ശരീരത്തില്‍ ‘പ്ളാസ്റ്റര്‍’ ഒട്ടിച്ച് സുഖപ്പെടുന്ന വിദ്യയും മനുഷ്യന്‍ മനസ്സിലാക്കി. ഒപ്പം ഉളുക്കിനും ചതവിനും ഉഴിച്ചില്‍ നടത്തുന്നതും ആഹാരം കുറക്കുകയോ ക്രമീകരിക്കുയോ ചെയ്താല്‍ അസുഖം വരുന്നത് നിയന്ത്രിക്കാമെന്നും കണ്ടെത്തി. മൃഗങ്ങളുടെ എല്ല്, കായ്കനികള്‍, ചില പ്രത്യേക തരത്തിലുള്ള മണ്ണ്, മരത്തൊലി തുടങ്ങിയവ ഉണക്കിപ്പൊടിച്ച് ഒൗഷധമായും അവന്‍ ഉപയോഗിച്ചു. കൂടാതെ ശരീരത്തിലെ നവദ്വാരങ്ങളിലൂടെ ഒൗഷധപ്പുക കടത്തിവിട്ട് ചികിത്സയാകാമെന്ന് മനുഷ്യന്‍ അറിഞ്ഞു.

മമ്മിയില്‍നിന്ന് പ്രചോദനം
‘മമ്മി’ എന്ന ശരീര സംരക്ഷണത്തെക്കുറിച്ച് കൂട്ടുകാര്‍ പഠിച്ചിട്ടുണ്ടല്ളോ. പുരാതന ഈജിപ്ഷ്യന്‍ സംസ്കാരത്തിലെ ഈ രീതിയില്‍ നിന്നു തന്നെയായിരുന്നു ശരീര പഠനത്തിന്‍െറ ഹരിശ്രീയുമുണ്ടാകുന്നത്. മമ്മിയാക്കി സൂക്ഷിച്ചിരുന്ന മനുഷ്യ ശരീരങ്ങള്‍ പലപ്പോഴായി അവര്‍ പരിശോധിച്ചു നോക്കിയിരുന്നു. സുഗന്ധദ്രവ്യങ്ങളും ഒൗഷധങ്ങളുമുപയോഗിച്ച് കേടുകൂടാതെ സൂക്ഷിക്കുന്ന ഈ ഏര്‍പ്പാടു തന്നെയായിരിക്കണം ശരീരശാസ്ത്രത്തിന് നാന്ദിയായത്.

ശരീരത്തിലെ മുറിഞ്ഞ ഭാഗങ്ങള്‍ തമ്മില്‍ ഒട്ടിച്ചാല്‍ മുറിവുകള്‍ പെട്ടെന്ന് ഭേദമാകുമെന്നും അവര്‍ മനസ്സിലാക്കി. ഫലപ്രദമായ പല ഒൗഷധങ്ങളും പിന്നീട് നിലവില്‍ വന്നു. എങ്കിലും അന്ധവിശ്വാസങ്ങള്‍ അന്നും സുലഭമായിരുന്നു കേട്ടോ.... അസുഖമുണ്ടാക്കുന്നത് ഭൂത-പ്രേത-പിശാചുക്കള്‍ തന്നെയാണെന്നും അവയെ ഓടിക്കാന്‍ കാളരക്തവും സര്‍പ്പക്കൊഴുപ്പും പുരോഹിതരും തന്നെ വേണമെന്നുമുള്ള വിശ്വാസം പ്രബലമായുണ്ടായിരുന്നു.