ന്യൂദല്ഹി: മുസ്ലിംകളോട് ഷെഡ്യൂള്ഡ് ബാങ്കുകള് കാണിക്കുന്ന വിവേചനം അവസാനിപ്പിക്കണമെന്നാവശ്യപ്പെട്ട് കേന്ദ്ര ന്യൂനപക്ഷ മന്ത്രാലയം എല്ലാ സംസ്ഥാനങ്ങളിലെയും ചീഫ് സെക്രട്ടറിമാര്ക്ക് കത്തെഴുതി. ന്യൂനപക്ഷ സ്കോളര്ഷിപ്പിന് ബാങ്ക് അക്കൗണ്ട് തുറക്കാന് ആന്ധ്രപ്രദേശിലെ 90,000 മുസ്ലിം വിദ്യാര്ഥികള് നല്കിയ അപേക്ഷ എല്ലാ ബാങ്കുകളും തിരസ്കരിച്ച പശ്ചാത്തലത്തിലാണ് കേന്ദ്ര ന്യൂനപക്ഷ മന്ത്രാലയത്തിന്റെ നടപടി. കേന്ദ്ര സാമ്പത്തിക സേവന സെക്രട്ടറിക്കും ഇക്കാര്യം ചൂണ്ടിക്കാണിച്ച് കത്തെഴുതിയ കേന്ദ്ര ന്യൂനപക്ഷ സെക്രട്ടറി വിവേക് മല്ഹോത്ര കത്തിന്റെ കോപ്പി റിസര്വ് ബാങ്ക് ഗവര്ണര്ക്ക് അയക്കുകയും ചെയ്തു. സീറോ ബാലന്സ് അക്കൗണ്ടുകള് തുറക്കണമെന്ന് റിസര്വ് ബാങ്ക് സര്ക്കുലര് നേരത്തേ ഇറക്കിയിട്ടും ഇത്രയും പേരുടെ അപേക്ഷ തള്ളിയതിന് ന്യായീകരണമില്ലെന്ന് മല്ഹോത്ര പറഞ്ഞു. ബാങ്കുകള്ക്കായുള്ള സംസ്ഥാന തലത്തിലും (എസ്.എല്.ബി.സി) ജില്ലാ തലത്തിലു(ഡി.എല്.ബി.സി)മുള്ള കമ്മിറ്റികള് വിളിച്ചുകൂട്ടി പ്രശ്നം പരിഹരിക്കണമെന്നാണ് ചീഫ് സെക്രട്ടറിമാര്ക്ക് നല്കിയ നിര്ദേശം. റിസര്വ് ബാങ്ക് സര്ക്കുലറിനെക്കുറിച്ച് കമ്മിറ്റിയോഗങ്ങളില് ഓര്മപ്പെടുത്തണമെന്ന് കത്തില് നിര്ദേശിച്ചിട്ടുണ്ട്.
Email this Story