12:30:26
27 Aug 2014
Wednesday
Facebook
Google Plus
Twitter
Rssfeed

പുത്തനുടുപ്പില്ലാത്ത പെരുന്നാളുകള്‍

പുത്തനുടുപ്പില്ലാത്ത പെരുന്നാളുകള്‍

സ്കൂള്‍ വിട്ട് വരുമ്പോഴേക്കും വലിയ ചോറ്റുപാത്രത്തില്‍ എല്ലാം തയാറാക്കിവെച്ചിട്ടുണ്ടാകും. ഞങ്ങളുടെ പള്ളിയിലെ ഉസ്താദിന് ചെലവ് കൊടുക്കുന്ന ദിവസം മുക്രി മുഹമ്മദാല്യാക്ക കൊണ്ടുവരുന്ന അതേ വലുപ്പത്തിലുള്ള തട്ടുപാത്രംപോലൊന്ന് ഉപ്പയും വാങ്ങിയിരുന്നു. പത്തിരിയും കറിയും അതിന്‍െറ ഓരോ തട്ടിലും നിറച്ചുവെച്ചിട്ടുണ്ടാകും. അത് കൈയില്‍ പിടിച്ച് ഒറ്റ നടത്തമാണ്. നോമ്പു തുറക്കാറാകുമ്പോഴേക്കും കിഴക്കത്തേലയില്‍ എത്തണം. അതിന് പുല്‍വെട്ടയിലെ മണ്ണുപാറുന്ന പഞ്ചായത്ത് റോഡിലൂടെ നടന്ന്, ചിറക്കല്‍ക്കുണ്ടിലെ പുഴ കടന്ന് നമ്പൂതിരിപ്പാടിന്‍െറ പാടം പിന്നിടണം. നാഗത്താന്‍കുന്ന് കോളനിയിലൂടെ ചുടലയും പിന്നിട്ട് അല്‍പംകൂടി നടന്നാല്‍ കിഴക്കത്തേലയിലെത്തും. മഗ്്രിബ് ആകാറായ സമയങ്ങളില്‍ കുട്ടികള്‍ ചുടലപ്പറമ്പിലൂടെ നടക്കാറില്ല. പ്രേതങ്ങള്‍ ആ സമയമാണത്രെ പുറത്തിറങ്ങുക. കണ്ടുപേടിച്ചാല്‍ ഭ്രാന്ത് പിടിക്കുമത്രെ. അങ്ങനെ ആര്‍ക്കൊക്കെയോ ഭ്രാന്തു വന്നിട്ടുണ്ട്.
പെരുന്നാള്‍ അടുക്കാറാകുമ്പോഴാണ് ഉപ്പക്ക് നോമ്പുതുറക്കാനുള്ള വിഭവങ്ങളുമായുള്ള യാത്രകള്‍. കരുവാരകുണ്ട് കിഴക്കത്തേലയിലെ നജാത്ത് കെട്ടിടത്തിലാണ് ഉപ്പയുടെ സബ്കാ ടെയ്ലേഴ്സ്. ഓടിട്ട കെട്ടിടത്തിന് മുകളില്‍ അങ്ങത്തേലക്കല്‍. ഞങ്ങളുടെ നാട്ടിലെ ഒരേയൊരു റേഡിയോ റിപ്പയര്‍ ഷോപ്പിന് അടുത്തുള്ള മുറിയാണ് ടെയ്ലര്‍ഷോപ്പ്. കരുവാരകുണ്ട്, തുവ്വൂര്‍, കാളികാവ്, മേലാറ്റൂര്‍ പഞ്ചായത്തുകളിലുള്ള ആള്‍ക്കാര്‍ റേഡിയോ നന്നാക്കാന്‍ വരുക ആര്യാടന്‍ കുഞ്ഞിമുഹമ്മദിന്‍െറ മോഡേണ്‍ റേഡിയോ ഷോപ്പിലേക്കാണ്. അയ്യപ്പേട്ടന്‍െറ വാച്ച് റിപ്പയര്‍ കടയും അതിനകത്തുതന്നെ. ഒരു കണ്ണില്‍ ലെന്‍സ് പിടിപ്പിച്ച് അയ്യപ്പേട്ടന്‍ വാച്ചുകളുടെ ജാതകം പരിശോധിക്കുന്നത് കാണാം. മിക്കപ്പോഴും സൊറ പറഞ്ഞ് അയ്യപ്പേട്ടന്‍റടുത്ത് ആലക്കാടന്‍ കുഞ്ഞാക്കയും ഇരിപ്പുണ്ടാകും. പല തരത്തിലുള്ള റേഡിയോകളും ടേപ്പ് റെക്കോഡുകളും ക്ളോക്കുകളും കൊണ്ട് മോഡേണ്‍ റേഡിയോ നിറഞ്ഞിരിക്കും. മെഡിക്കല്‍ കോളജ് ആണെന്നാണ് കുഞ്ഞാക്ക തമാശ പറയുക.
നോമ്പ് പകുതി കഴിയുമ്പോഴേക്ക് ഉപ്പാന്‍െറ മുഖം തെളിയാന്‍ തുടങ്ങും. അതുവരെ പണി കുറവായിരിക്കും. വീട്ടുചെലവിനുതന്നെ പലപ്പോഴും കടം വാങ്ങണം. സ്കൂള്‍ തുറക്കുന്ന സമയത്ത് പുസ്തകങ്ങള്‍ക്ക് പണമൊപ്പിക്കുന്ന പാട് കണ്ടിട്ടുണ്ട്. അപ്പോഴൊക്കെ കുഞ്ഞുമുഹമ്മദ്ക്കാന്‍റടുത്തുനിന്നാണ് കടം വാങ്ങുക. ആ പണത്തിന് കുഞ്ഞിമുഹമ്മദ്ക്ക കണക്കുവെക്കാറില്ല. തിരിച്ചുകൊടുത്താല്‍ വാങ്ങും. അല്ലെങ്കില്‍ മറക്കും.
പെരുന്നാളിനാണ് കുട്ടികള്‍ക്കും മുതിര്‍ന്നവര്‍ക്കും പുത്തന്‍ കുപ്പായങ്ങള്‍ എടുക്കുക. അല്ലെങ്കില്‍ കല്യാണമോ മറ്റോ ഉണ്ടാവണം. റമദാന്‍ പത്ത് കഴിയുന്നതോടെ ടെയ്ലര്‍ഷോപ്പില്‍ തിരക്ക് തുടങ്ങും. പലതരം തുണിശീലകളുമായി കുട്ടികളും മുതിര്‍ന്നവരും കോണികയറി വരാന്‍ തുടങ്ങും. ഓരോന്നും അളന്നെടുത്ത് ഇന്ന ദിവസം തയ്ച്ചുകൊടുക്കാമെന്ന് ഉറപ്പുകൊടുക്കും. അന്ന് വന്നാല്‍ കുപ്പായവുമായോ പാവാടയുമായോ പെങ്കുപ്പായവുമായോ ഒക്കെ തിരിച്ചുപോകാം. സീസണില്‍ മാത്രം കിട്ടുന്ന പണിയായതുകൊണ്ട് കൊണ്ടുവരുന്നതൊന്നും ഉപ്പ തിരിച്ചയക്കാറില്ല. എല്ലാം വാങ്ങിവെക്കും. എന്നിട്ട് രാത്രി ഏറെ നേരം പണിയെടുക്കും. ഈ കാലത്താണ് എന്‍െറ കിഴക്കത്തേലയിലേക്കുള്ള യാത്രകള്‍. തയ്ച്ചുവെക്കുന്ന കുപ്പായങ്ങളും മറ്റും തുളതുന്നലും ബട്ടന്‍സ് പിടിപ്പിക്കലും ഒരാള്‍ ചെയ്താല്‍ തീരില്ല. തുന്നല് പഠിക്കുന്ന കുട്ടിക്ക് സഹായത്തിന് ആള് വേണം. ആ സഹായിയാണ് ഞാന്‍. സ്കൂളില്‍ ലാസഞ്ചര്‍ മിഠായിയും കടല മിഠായിയും വാങ്ങാനുള്ള ചില്ലറപ്പൈസ തരപ്പെടും. പെരുന്നാള്‍ പൈസ പുറമേ കിട്ടും.
മുറിയുടെ വരാന്തയിലാണ് മെഷീനുകള്‍ ഇട്ടിരിക്കുന്നത്. ഉപ്പ അവിടെ ഇരുന്നാണ് തയ്ക്കുക. കഴുത്തില്‍ നീളമുള്ള ടേപ്പ് തൂങ്ങിക്കിടപ്പുണ്ടാകും. അതെടുത്ത് ഇടക്കിടെ അളവ് നോക്കുന്നത് കാണാം. അളവ് കണക്കാക്കി തുണിവെട്ടുമ്പോള്‍ കത്രിക കരയും. വെട്ടുന്നത് ഒരിക്കലും വളയാറില്ല. നല്ല തയ്യല്‍ക്കാരന്‍െറ അടയാളമാണത്. ഞാനും വരാന്തയിലാണ് ബട്ടന്‍സ് തുന്നാന്‍ ഇരിക്കാറ്. കെട്ടിടത്തിന്‍െറ ഒന്നാം നിലയിലായതിനാല്‍ അങ്ങാടി ഏറക്കുറെ കാണാം. സീമ ടാക്കീസില്‍നിന്ന് സിനിമ കഴിഞ്ഞ് വരുന്നവരുടെ ഒഴുക്കും ബഹളവും. മഞ്ചേരിയില്‍നിന്നും പെരിന്തല്‍മണ്ണയില്‍നിന്നും വരുന്ന ബസുകള്‍ തിരിച്ചിടുമ്പോഴുണ്ടാകുന്ന ക്ളീനര്‍മാരുടെ റൈറ്റ് പറച്ചിലുകള്‍, എല്ലാം കേള്‍ക്കാം. എന്‍െറ കൂട്ടുകാരിയുടെ വീടും ആ വഴിയാണ്. എല്ലാംകൂടി ബഹുരസമാണ്. അതിനേക്കാളേറെ എന്നെ മോഹിപ്പിക്കുന്നത് പാട്ടുകേള്‍ക്കലാണ്. തുണി തുന്നുമ്പോള്‍ ഉറക്കം വരാതിരിക്കാനാണ് പാട്ടുകേള്‍ക്കുന്നത്. ഞങ്ങള്‍ക്ക് സ്വന്തമായി റേഡിയോയോ ടേപ്പ് റെക്കോഡറോ ഉണ്ടായിരുന്നില്ല. പണമുള്ളവന്‍െറ പത്രാസ്സിന്‍െറ ഭാഗമായിരുന്നു അന്നൊക്കെ ടേപ്പ് റെക്കോഡറുകള്‍. ഗള്‍ഫില്‍നിന്ന് വരുമ്പോള്‍ സംസം വെള്ളത്തിനും ഈത്തപ്പഴത്തിനും ഫോറിന്‍ തുണിത്തരങ്ങള്‍ക്കുമൊപ്പം കൊണ്ടുവരുന്ന തിലൊന്നാണ് ടേപ്പ് റെക്കോഡര്‍. പെരുന്നാള്‍ അടുത്താല്‍ ഏതെങ്കിലും ഒരു ടേപ്പ് റെക്കോഡര്‍ കുഞ്ഞിമുഹമ്മദ്ക്ക സംഘടിപ്പിച്ചുതരും. റിപ്പയര്‍ചെയ്തുവെച്ചവയില്‍ ഒന്ന്. അതിലിടാനുള്ള കാസറ്റുകളും മൂപ്പര് തരും. ഉപ്പയുടെ കാലുകള്‍ മെഷീനില്‍ അമരുമ്പോള്‍ ചക്രങ്ങള്‍ തിരിയും. അത് ഒരു പ്രത്യേക താളത്തിലുള്ള ശബ്ദമായി രൂപപ്പെടും. അതിനേക്കാള്‍ ഉച്ചത്തില്‍ ടേപ്പ് റെക്കോഡറില്‍നിന്ന് പാട്ടുവരും- കാഫ് മല കണ്ട പൂങ്കാറ്റേ... പതിഞ്ഞ, ഉച്ചസ്ഥായിയിലുള്ള ആ പാട്ട് കല്യാണവീടുകളിലെ തെങ്ങില്‍ കെട്ടിയ കാഹളത്തിലൂടെയും കേട്ടിട്ടുണ്ട്. പാട്ടുകള്‍ പലതും മാറുമ്പോഴേക്കും മേശയില്‍ ഉടുപ്പുകള്‍ അട്ടിയായി രൂപപ്പെട്ടുതുടങ്ങിയിട്ടുണ്ടാകും. ബട്ടന്‍വെക്കാനുള്ള തുളകള്‍ അടയാളപ്പെടുത്തി തന്നാല്‍ തുന്നാന്‍ തുടങ്ങും.
പെരുന്നാളിന് അടുത്ത മൂന്നുനാലു ദിവസങ്ങളില്‍ ഉറക്കം പതിവില്ല. വാങ്ങിവെച്ചതെല്ലാം തിരിച്ചുകൊടുക്കണം. രാവിലെ മുതല്‍ ആളുകള്‍ വന്നുതുടങ്ങും. ഇസ്തിരിയിട്ട് കടലാസില്‍ ഭംഗിയായി പൊതിഞ്ഞു കൊടുക്കണം. പുതിയ പുതിയ കുപ്പായങ്ങളും ഉടുപ്പുകളും വാങ്ങാന്‍ ഉപ്പമാരുടെ കൈയില്‍ തൂങ്ങി ആണ്‍കുട്ടികളും പെണ്‍കുട്ടികളും വരും. ശവ്വാല്‍പ്പിറ അവരുടെ മുഖത്താണ് ഉദിച്ചതെന്ന് തോന്നും. സന്തോഷത്തോടെ തിരിച്ചുപോകുന്നത് നോക്കിനില്‍ക്കുമ്പോള്‍ എന്‍െറ മനസ്സിലും സന്തോഷം. ആ കുപ്പായങ്ങളില്‍ എന്‍െറയും അധ്വാനമുണ്ടല്ലോ... തയ്യല്‍ക്കാരന്‍െറ മക്കളായതിനാല്‍ പെരുന്നാളിന് തലേ ദിവസമാണ് ഞങ്ങള്‍ക്ക് ഇന്ത്യ സില്‍ക്ഹൗസില്‍നിന്ന് കുപ്പായത്തിനും പാന്‍റ്സിനും പെങ്ങള്‍ക്ക് പാവാടക്കും തുണിയെടുക്കുക. അത് കൊണ്ടുവന്ന് വെട്ടുമേശയുടെ മുകളില്‍ വെക്കും. കവറില്‍നിന്ന് ആ ശീലക്കെട്ടുകള്‍ ഉപ്പ എടുക്കണേയെന്ന് പ്രാര്‍ഥിക്കും. ചിലപ്പോള്‍ ഫാതിഹ ഓതി ദുആ ഇരക്കും. എന്നാലും അത് എടുക്കുക പതിവില്ല. കിട്ടിയ പണിയെല്ലാം പൂര്‍ത്തിയാക്കാന്‍ ഒരിക്കലും കഴിയാറില്ല. എന്നാല്‍, വരുന്നതൊന്നും മടക്കിവിടാനും ഉപ്പാക്ക് മനസ്സ് വരില്ല. അത് കുടുംബചിന്ത ഉള്ളിലുള്ളതുകൊണ്ടാണ്.
പെരുന്നാള്‍ തലേന്ന് രാത്രി മുഴുവന്‍ ഉറക്കമിളച്ചിരുന്ന് തുന്നി രാവിലെ വീട്ടിലേക്ക് നടക്കുമ്പോള്‍ ഉപ്പ തുന്നിക്കൊടുത്ത കുപ്പായവുമിട്ട് കുട്ടികള്‍ ആഹ്ളാദത്തോടെ പള്ളിയിലേക്ക് പെരുന്നാള്‍ നമസ്കാരത്തിന് ഓടുന്നുണ്ടാകും. അവര്‍ എന്നെയും കടന്നുപോയാല്‍ അത്തറിന്‍െറ മണം വഴിയില്‍ പരക്കും. ഞാനപ്പോള്‍ എന്‍െറ പഴയ കുപ്പായത്തിലേക്ക് നോക്കും. കഴിഞ്ഞ പെരുന്നാളിന് വാങ്ങിയ കുപ്പായം അലക്കി നീലംമുക്കി ഉമ്മ എടുത്തുവെച്ചിട്ടുണ്ടാകും. ടെയ്ലറുടെ മകനല്ലേ... നാട്ടുകാര്‍ പുതിയത് ഇടുമ്പോഴാണ് നമുക്ക് പൈസയുണ്ടാകുക. അവരുടേത് കഴിഞ്ഞിട്ടല്ലേ നമ്മളത് അടിക്കാന്‍ പറ്റൂ.. വല്യുമ്മ സമാധാനിപ്പിക്കും. എല്ലാ പെരുന്നാളിനും പുതിയ കുപ്പായമിടാതെ പള്ളിയില്‍ പോകും. പള്ളിയില്‍ അണിയണിയായിരിക്കുന്നവരില്‍നിന്നും വമിക്കുന്ന പുത്തന്‍ മണം മൂക്കിലേക്ക് അടിച്ചുകയറുമ്പോള്‍ കണ്ണ് നിറയുന്നുണ്ടാകും. പുത്തനിടാത്ത പെരുന്നാളുകള്‍...
വലുതായപ്പോഴാണ് പെരുന്നാളിന് പുത്തനുടുപ്പുകള്‍ കിട്ടാന്‍ തുടങ്ങിയത്. അപ്പോഴേക്കും സബ്കാ ടെയ്ലേഴ്സിന്‍െറ പ്രതാപകാലം അസ്തമിച്ചിരുന്നു; ഉപ്പയുടെയും. പഴയ ഓടിട്ട കെട്ടിടം പൊളിച്ചുമാറ്റി കോണ്‍ക്രീറ്റിട്ട ഷോപ്പിങ് കോംപ്ളക്സ് വന്നിരുന്നു.
പുതിയ തലമുറയിലെ ചെറുപ്പക്കാര്‍ വന്നപ്പോള്‍ പഴയ തലമുറയിലെ തുന്നല്‍ക്കാര്‍ പിന്നിലായി. പിന്നെ സ്വന്തം തലമുറയിലെ കൂട്ടുകാരുടെ തയ്യല്‍ക്കാരനായി മാത്രം മാറിയിരുന്നു ഉപ്പ.


നിങ്ങളുടെ അഭിപ്രായങ്ങള്‍

ഇവിടെ കൊടുക്കുന്ന അഭിപ്രായങ്ങള്‍ മാധ്യമത്തിന്റെ അഭിപ്രായമാവണമെന്നില്ല.
Please Note:
അഭിപ്രായങ്ങള്‍ മലയാളത്തിലോ ഇംഗ്ലീഷിലോ എഴുതുക. മംഗ്ലീഷില്‍ എഴുതുന്ന അഭിപ്രായങ്ങള്‍ പോസ്റ്റ് ചെയ്യുന്നതല്ല. അവഹേളനപരവും വ്യക്തിപരമായ അധിക്ഷേപങ്ങളും അശ്ളീല പദപ്രയോഗങ്ങളും ദയവായി ഒഴിവാക്കുക.
comments powered by Disqus