മുംബൈ: രഞ്ജി ട്രോഫി നോക്കൗട്ട് റൗണ്ടിലെ ക്വാര്‍ട്ടര്‍ മത്സരങ്ങള്‍ക്ക് ഇന്ന് തുടക്കം. വാശിയേറിയ ഗ്രൂപ് റൗണ്ടിലെ പോരാട്ടങ്ങള്‍ക്കു ശേഷം ക്വാര്‍ട്ടറില്‍ നാലുവേദികളിലായി എട്ടു ടീമുകള്‍ ഗ്രൗണ്ടിലിറങ്ങും. ജാംഷഡ്പൂരില്‍ ഝാര്‍ഖണ്ഡ് പഞ്ചാബിനെയും മുംബൈയില്‍ ആതിഥേയരായ മുംബൈ ബറോഡയെയും രാജ്കോട്ടില്‍ സൗരാഷ്ട്ര കര്‍ണാടകയെയും ഇന്ദോറില്‍ സര്‍വീസസ് ഉത്തര്‍ പ്രദേശിനെയും നേരിടും. പരിഷ്കരിച്ച ടൂര്‍ണമെന്‍റില്‍ മൂന്നു ഗ്രൂപ്പുകളായി തിരിഞ്ഞ് മത്സരിച്ചശേഷമാണ് നോക്കൗട്ട് ലൈനപ്പ് പൂര്‍ത്തിയായത്. 40ാം കിരീടം തേടുന്ന മുംബൈയാണ് ഇക്കുറി ഹോട് ഫേവറിറ്റ്. തുടര്‍ച്ചയായി രണ്ട് തവണ കിരീടം ചൂടിയ രാജസ്ഥാന്‍ ഇക്കുറി ഒരു മത്സരംപോലും ജയിക്കാതെ ഗ്രൂപ് റൗണ്ടില്‍തന്നെ പുറത്തായി.
ഏകദിന ക്രിക്കറ്റില്‍നിന്ന് വിരമിച്ച സചിന്‍ ടെണ്ടുല്‍കറാണ് ടൂര്‍ണമെന്‍റിന്‍െറ പ്രധാന ശ്രദ്ധാകേന്ദ്രം. സഹീര്‍ഖാന്‍, അജിത് അഗാര്‍ക്കര്‍, വസിം ജാഫര്‍ തുടങ്ങിയ പരിചയ സമ്പന്നര്‍ അണിനിരക്കുന്ന മുംബൈക്കൊപ്പം സചിന്‍ ടെണ്ടുല്‍കര്‍ കൂടി പാഡണിയുന്നതോടെ ഇതിഹാസ താരത്തിലേക്കാണ് ശ്രദ്ധ. എതിരാളികളായ ബറോഡക്കുവേണ്ടി ഇന്ത്യന്‍ താരങ്ങളായ ഇര്‍ഫാന്‍ പത്താന്‍, മുനാഫ് പട്ടേല്‍ എന്നിവര്‍ കളിക്കുന്നുണ്ട്.
ജനുവരി 16നാണ് സെമിഫൈനല്‍, 26 ന് ഫൈനല്‍ മത്സരവും നടക്കും. ഇതാദ്യമായി രഞ്ജി ട്രോഫി മത്സരം നിയന്ത്രിക്കാന്‍ വിദേശ അമ്പയര്‍മാരും എത്തും. മുംബൈ-ബറോഡ മത്സരത്തിനു ദക്ഷിണാഫ്രിക്കയുടെ അഡ്രിയാന്‍ ഹോള്‍ഡ്സ്റ്റോകും, യു.പി -സര്‍വീസസ് മത്സരത്തിന് ഇംഗ്ളണ്ടിന്‍െറ റോബ് ബെയ്ലിയും അമ്പയര്‍മാരാവും. അഞ്ചുദിവസമാണ് നോക്കൗട്ട് റൗണ്ട് മത്സരങ്ങള്‍.