മനാമ: രാജ്യത്തെ അനധികൃത തൊഴിലാളികളുടെ എണ്ണം വര്‍ധിച്ചതായ റിപ്പോര്‍ട്ടിന്‍െറ അടിസ്ഥാനത്തില്‍ അധികൃതര്‍ കര്‍ശന നടപടിക്ക് ഒരുങ്ങുന്നു. അനധികൃത തൊഴിലാളികള്‍ 49,500 ആയി വര്‍ധിച്ചതായാണ് റിപ്പോര്‍ട്ട്. കഴിഞ്ഞ വര്‍ഷത്തില്‍നിന്നും 11 ശതമാനമായാണ് വര്‍ധന. ലേബര്‍ മാര്‍ക്കറ്റ് റഗുലേറ്ററി അതോറിറ്റി (എല്‍.എം.ആര്‍.എ) നടത്തിയ പഠനത്തിലാണ് ഈ കണ്ടെത്തലുകള്‍. ഫ്രീ വിസ മൂലമുണ്ടാകുന്ന വിവിധ പ്രശ്നങ്ങളിലേക്ക് പഠനം വെളിച്ചം വീശുന്നു. ഏഴ് കോടി ദിനാറോളം വരുന്ന കരിഞ്ചന്ത വ്യാപാരമാണ് അനധികൃത വിസ ഇടപാടിലൂടെ നടക്കുന്നതെന്ന് പഠനം പറയുന്നു. രാജ്യത്തിനകത്തും പുറത്തുമായി മധ്യവര്‍ത്തികളും വിതരണക്കാരുമടങ്ങിയ ശൃംഘലയാണ് ഈ വ്യാപാരത്തിന് പിന്നില്‍.
അനധികൃത തൊഴിലാളികളുടെ എണ്ണം ഇതിലും കൂടിയേക്കാം. അനധികൃത തൊഴിലാളികളെ ജോലിക്ക് വെക്കരുതെന്ന് എല്‍.എം.ആര്‍.എ നേരത്തെ മുന്നറിയിപ്പ് നല്‍കിയിരുന്നു. അനധികൃത തൊഴിലാളികളെ കണ്ടെത്താന്‍ അധികാരികള്‍ നടത്തിയ പരിശോധനയില്‍ ഇത്തരം 600ഓളം തൊഴിലാളികളെ ജോലിക്ക് വെച്ച സ്ഥാപനം കണ്ടെത്തുകയും ചെയ്തു.
കൂടുതല്‍ വിദേശ തൊഴിലാളികളെ റിക്രൂട്ട് ചെയ്യാനുള്ള സൗകര്യം ചൂഷണം ചെയ്യുന്ന തൊഴിലുടമകള്‍ക്കെതിരെ ശക്തമായ നിയമ നടപടി വേണമെന്നും പഠനം നിര്‍ദേശിക്കുന്നു. ഇത്തരം റിക്രൂട്ട്മെന്‍റുകള്‍ അവരെ തൊഴില്‍ വിപണയില്‍ സ്വതന്ത്രരായി വിടുകയാണ്. ഇത്തരക്കാരോ ‘റണ്‍എവേ’ ആയ തൊഴിലാളികളോ കൂടുതലും സ്പോണ്‍സറുടെയോ തൊഴിലുടമയുടെയോ കീഴില്‍ ജോലി ചെയ്യാത്തവരാണ്. അനധികൃത വിദേശ തൊഴിലാളികളെ പിടികൂടുന്നതിന് ആഭ്യന്തര മന്ത്രാലയവുമായി ചേര്‍ന്ന് പരിശോധന ശക്തമാക്കാനുള്ള തൊഴില്‍ മന്ത്രിയുടെ നിര്‍ദേശത്തിന് മന്ത്രിസഭ നേരത്തെ അംഗീകാരം നല്‍കിയിരുന്നു.