ലണ്ടന്‍: മാഞ്ചസ്റ്റര്‍ സിറ്റിയുടെ അര്‍ജന്‍ൈറന്‍ താരം സെര്‍ജിയോ അഗ്യൂറോയും ഫുട്ബാള്‍ ഇതിഹാസം ഡീഗോ മറഡോണയുടെ മകള്‍ ജിയാനിനയും തമ്മില്‍ വേര്‍പിരിഞ്ഞു. ഇത് സംബന്ധിച്ച് പുറത്തുവന്ന അഭ്യൂഹങ്ങള്‍ ട്വിറ്ററിലൂടെ ജിയാനിന തന്നെയാണ് സ്ഥിരീകരിച്ചത്. ജീവിതത്തില്‍ നിരവധി മാറ്റങ്ങള്‍ വന്നുവെന്നും കഴിഞ്ഞുപോയത് പ്രയാസ വര്‍ഷമായിരുന്നുവെന്നും വിശദീകരിച്ച 23കാരി തങ്ങള്‍ പിരിയുകയാണന്നും അറിയിച്ചു. 24കാരനായ അഗ്യൂറോയുടെയും ജിയാനിനയുടെയും നാലര വര്‍ഷം നീണ്ട ദാമ്പത്യ ബന്ധത്തില്‍ മൂന്നു വയസ്സുള്ള ആണ്‍കുട്ടിയുണ്ട്.
ഒരു ഗായികയുമായി അഗ്യൂറോക്ക് അടുപ്പമുള്ളതാണ് പ്രശ്നങ്ങള്‍ക്ക് കാരണമെന്ന് പറയപ്പെടുന്നു. മറഡോണയുടെ കാമുകി വെറോണിക ഒജേഡ ഗര്‍ഭിണിയായതിനെച്ചൊല്ലിയും ഇവര്‍ തമ്മില്‍ വാഗ്വാദമുണ്ടായിരുന്നുവത്രെ. ഭാര്യാപിതാവിന് അനുകൂലമായ നിലപാട് അഗ്യൂറോ സ്വീകരിച്ചപ്പോള്‍ ജിയാനിന അതിനെ എതിര്‍ക്കുകയാണ് ചെയ്തത്.
മകന്‍ ബെഞ്ചമിനൊപ്പം ജിയാനിന മഡ്രിഡില്‍ കഴിയുകയാണ്. വിഡ്ഢിയായ അഗ്യൂറോ തന്നെ അര്‍ഹിക്കുന്നില്ലെന്ന് ഒരാള്‍ ട്വിറ്ററില്‍ കുറിച്ചതിനെ ജിയാനിന എതിര്‍ത്തു. ‘എന്‍െറ കുഞ്ഞിന്‍െറ അച്ഛനായ അദ്ദേഹം നിങ്ങള്‍ പറയുന്ന തരത്തിലുള്ള ആളല്ല’ എന്നായിരുന്നു മറുപടി.