ടോക്യോ: ഒളിമ്പിക്സിലെ മെഡല്‍ നഷ്ടങ്ങള്‍ക്ക് കണക്കു തീര്‍ത്ത് ഇന്ത്യയുടെ ദീപിക കുമാരിക്ക് അമ്പെയ്ത്തില്‍ വെള്ളിത്തിളക്കം. ജപ്പാനിലെ ടോക്യോ ഹിബിയ പാര്‍ക്കില്‍ നടക്കുന്ന അമ്പെയ്ത്ത് ലോകകപ്പില്‍ ഒളിമ്പിക്സ് ഡബ്ള്‍ സ്വര്‍ണമെഡല്‍ ജേതാവ് ദക്ഷിണ കൊറിയയുടെ ബൊബെയ് കിയുമായി ഫൈനലില്‍ ഇഞ്ചോടിഞ്ച് പോരടിച്ച് കീഴടങ്ങിയാണ് ദീപിക വെള്ളി മെഡല്‍ കൊണ്ട് തൃപ്തിയടഞ്ഞത്. മുന്‍ ലോക ഒന്നാം നമ്പറുകാരിയായ ദീപിക ഒളിമ്പിക്സില്‍ ഒന്നാം റൗണ്ടില്‍ തന്നെ പുറത്തായതിനു പിന്നാലെ റാങ്കിങ്ങില്‍ രണ്ടാം സ്ഥാനത്തേക്ക് പിന്തള്ളപ്പെട്ടിരുന്നു.
ലോകകപ്പ് റീകര്‍വ് വിഭാഗത്തില്‍ ക്വാര്‍ട്ടറിലും സെമി ഫൈനലിലും തകര്‍പ്പന്‍ ജയത്തോടെ ഫൈനലിലെത്തിയ ദീപിക അവസാന പോരാട്ടത്തില്‍ ബൊബെയ്കിനു മുന്നില്‍ 4-6ന് കീഴടങ്ങുകയായിരുന്നു. 26-23, 27-25, 24-28, 23-26, 25-26.
ലണ്ടന്‍ ഒളിമ്പിക്സിനു ശേഷം ഇന്ത്യന്‍ താരത്തിന്‍െറ ആദ്യ മത്സര വേദിയായിരുന്നു ലോകകപ്പ്. ആദ്യ രണ്ട് റൗണ്ടിലും ജയിച്ച് ദീപിക മുന്നേറിയെങ്കിലും ലോക ഒന്നാം നമ്പറുകാരിയായ കൊറിയന്‍ താരം അടുത്ത രണ്ട് റൗണ്ടും പിടിച്ചെടുത്താണ് മത്സരത്തിലേക്ക് തിരിച്ചെത്തിയത്. നിര്‍ണായക മൂന്നാം റൗണ്ടില്‍ ഇരുവരും ഒപ്പത്തിനൊപ്പം പ്രകടനം കാഴ്ചവെച്ചെങ്കിലും തലനാരിഴ വ്യത്യാസത്തിന് ദീപിക കീഴടങ്ങി. കൊറിയയുടെ ചോയ് യെന്‍ഞ്ചുവിനാണ് വെങ്കലം. ശനിയാഴ്ച നടന്ന ക്വാര്‍ട്ടര്‍ ഫൈനലില്‍ ദീപിക ജപ്പാന്‍െറ മികി കാനെയെയും 25-23, 26-26, 29-24, 27-24 (7-1), സെമിയില്‍ അമേരിക്കയുടെ ജെന്നിഫര്‍ നികോളസിനെയും 28-24, 25-26, 26-25, 28-27 (6-2) തോല്‍പിച്ചാണ് ഫൈനലില്‍ പ്രവേശിച്ചത്. ഝാര്‍ഖണ്ഡുകാരിയായ ദീപിക ദല്‍ഹി കോമണ്‍വെല്‍ത്ത് ഗെയിംസിലെ ഡബ്ള്‍ സ്വര്‍ണ നേട്ടക്കാരിയാണ്.