ചണ്ഡിഗഢ്: ഡേവിസ് കപ്പ് ഏഷ്യ ഓഷ്യാനിയ ഗ്രൂപ് ഒന്നിലെ പ്ളേഓഫില്‍ ഇന്ത്യക്ക് ജയത്തോടെ തുടക്കം. ന്യൂസിലന്‍ഡിനെതിരെ സിംഗ്ള്‍സില്‍ ഇറങ്ങിയ യൂകി ഭാംബ്രി അഞ്ചു സെറ്റ് നീണ്ട മാരത്തണ്‍ പോരാട്ടത്തിനൊടുവില്‍ ജയിച്ചുകയറിയാണ് ആതിഥേയര്‍ക്ക് മികച്ച തുടക്കം സമ്മാനിച്ചത്. ന്യൂസിലന്‍ഡിന്‍െറ ഡാനിയല്‍ കിങ് ടര്‍ണര്‍ക്കെതിരെ ഇറങ്ങിയ ഭാംബ്രി ആദ്യ ഒന്നും രണ്ടും സെറ്റ് കൈവിട്ടപ്പോള്‍ ഉജ്ജ്വല മികവോടെ തിരിച്ചെത്തിയാണ് മത്സരം സ്വന്തമാക്കിയത്. സ്കോര്‍: 3-6 0-6 6-2 6-4 6-2.
നിര്‍ണായക മൂന്നാം സെറ്റില്‍ എതിരാളി വിജയം ഉറപ്പിച്ച് കോര്‍ട്ടിലിറങ്ങിയപ്പോഴാണ് താരത്തിളക്കമില്ലാത്ത ഇന്ത്യന്‍ ടീമിന്‍െറ നായകന്‍ തിരിച്ചടിച്ചത്.
മഴയെ തുടര്‍ന്ന് ഒന്നര മണിക്കൂര്‍ വൈകിയാണ് മത്സരം ആരംഭിച്ചത്. തുടക്കംതന്നെ പിഴച്ച ഇന്ത്യന്‍ താരം ആദ്യ ഗെയിമില്‍ തന്നെ അടിയറവു പറഞ്ഞു. കിവി താരത്തിന്‍െറ ലോങ് റാലികള്‍ക്കു മുന്നില്‍ ഭാംബ്രി അടിതെറ്റി. സെര്‍വുകളെ വിജയകരമായി അതിജയിക്കുന്നതിലും ഇന്ത്യന്‍ താരം പരാജയമായപ്പോള്‍ ഒന്നും രണ്ടും സെറ്റുകള്‍ ടര്‍ണര്‍ അനായാസം സ്വന്തമാക്കി. മൂന്നാം സെറ്റില്‍ ജീവന്‍മരണ പോരാട്ടത്തിന് മനസ്സുറപ്പിച്ചായിരുന്നു ഇന്ത്യന്‍ താരം കളത്തിലിറങ്ങിയത്. ഇത് വിജയം കാണുകയും ചെയ്തു. 6-2ന് സെറ്റ് സ്വന്തമാക്കി ഭാംബ്രി മത്സരത്തിലേക്ക് തിരിച്ചെത്തി. തുടര്‍ച്ചയായി മൂന്നു സെറ്റും സ്വന്തമാക്കിയാണ് യൂകി ഇന്ത്യക്ക് ജയത്തോടെ തുടക്കംകുറിച്ചത്. രണ്ടാം സിംഗ്ള്‍സില്‍ വിഷ്ണുവര്‍ധന്‍ കിവികളുടെ ഒന്നാം നമ്പര്‍ താരം ജോസ് സ്റ്റതാമിനെ നേരിടും. ദിവിജ് ശരണ്‍-വിഷ്ണു വര്‍ധന്‍ സഖ്യമാണ് ഡബ്ള്‍സില്‍ ഇറങ്ങുന്നത്്.