കോഴിക്കോട്: 38ാമത് ദേശീയ പുരുഷ-വനിത പവര്‍ലിഫ്റ്റിങ്ങില്‍ റെയില്‍വേ ഓവറോള്‍ ചാമ്പ്യന്‍ഷിപ് നിലനിര്‍ത്തി. കോഴിക്കോട് സ്വദേശിയും റെയില്‍വേ താരവുമായ പി. സുരേഷിനെ സ്ട്രോങ്മാന്‍ ഓഫ് ഇന്ത്യയായും ഉത്തര്‍ പ്രദേശിന്‍െറ വന്ദന ദുബെ സ്ട്രോങ് വുമണായും തെരഞ്ഞെടുക്കപ്പെട്ടു.
93 പോയന്‍റുമായാണ് മുന്‍വര്‍ഷത്തെ ചാമ്പ്യന്മാരായ റെയില്‍വേ കിരീടം നിലനിര്‍ത്തിയത്.
44 പോയന്‍റുമായി മഹാരാഷ്ട്ര രണ്ടാമതും, 38 പോയന്‍റുമായി കേരളം മൂന്നാമതുമാണ്. ഏറ്റവും അച്ചടക്കമുള്ള ടീമായി കേരളത്തെ തെരഞ്ഞെടുത്തു. പുരുഷവിഭാഗം ഇന്‍റര്‍സ്റ്റേറ്റില്‍ 57 പോയന്‍റുമായി മഹാരാഷ്ട്ര ഒന്നാമതും 46 പോയന്‍റുമായി കേരളം രണ്ടാമതും, 38 പോയന്‍റുമായി ഉത്തര്‍പ്രദേശ് മൂന്നാമതുമാണ്.
വനിതകളില്‍ 51 പോയന്‍റുമായി ചത്തിസ്ഗഢ് ഒന്നാമതും 35 പോയന്‍റുമായി മഹാരാഷ്ട്ര രണ്ടാമതും 34 പോയന്‍റുമായി കേരളം മൂന്നാം സ്ഥാനവും കരസ്ഥമാക്കി. സ്മാര്‍ട്ട് റഫറി ആന്ധ്രപ്രദേശിന്‍െറ ജോസഫ് ജെയിംസാണ്.
അവസാന ദിവസം നടന്ന 120 കിലോ ഇന്‍റര്‍സ്റ്റേറ്റ് വിഭാഗത്തില്‍ മലയാളിതാരം എ. ജുനൈദ് 780 കിലോ ഉയര്‍ത്തി സ്വര്‍ണമെഡല്‍ കരസ്ഥമാക്കി. വൈകുന്നേരം നടന്ന ചടങ്ങില്‍ മന്ത്രി ഡോ. എം.കെ. മുനീര്‍ സമ്മാനങ്ങള്‍ വിതരണം ചെയ്തു. കോര്‍പറേഷന്‍ ഡെപ്യൂട്ടി മേയര്‍ പ്രഫ. പി.ടി. അബ്ദുല്‍ ലത്തീഫ് അധ്യക്ഷത വഹിച്ചു. ഏഷ്യന്‍ പവര്‍ലിഫ്റ്റിങ് ഫെഡറേഷന്‍ ജനറല്‍ സെക്രട്ടറി സുബ്രദോ ദത്ത മുഖ്യപ്രഭാഷണം നടത്തി. ജില്ലാ പ്രസിഡന്‍റ് മുല്ലവീട്ടില്‍ മൊയ്തീന്‍ സ്വാഗതവും സംസ്ഥാന സെക്രട്ടറി വേണു ജി. നായര്‍ നന്ദിയും പറഞ്ഞു.