അരീക്കോട്: ലോകത്തെ ഏറ്റവും സന്തോഷവാന്‍ ഇപ്പോള്‍ താനാണെന്ന് ഒളിമ്പ്യന്‍ കെ.ടി. ഇര്‍ഫാന്‍. കുനിയിലില്‍ കീഴുപറമ്പ് ഗ്രാമപഞ്ചായത്ത് നല്‍കിയ സ്വീകരണസമ്മേളനത്തില്‍ സംസാരിക്കുകയായിരുന്നു അദ്ദേഹം. ഒളിമ്പിക്സിലെ മികച്ച പ്രകടനത്തിനുശേഷം ദല്‍ഹിയില്‍ തിരിച്ചെത്തിയപ്പോള്‍ ജീവിതത്തില്‍ ഒരിക്കലും കിട്ടുമെന്ന് പ്രതീക്ഷിച്ചിട്ടില്ലാത്ത സ്വീകരണമാണ് ലഭിച്ചത്. പ്രധാനമന്ത്രിയുടെയും സോണിയാഗാന്ധിയുടെയും മുന്‍ ഉപപ്രധാനമന്ത്രി എല്‍.കെ. അദ്വാനിയുടെയും വിരുന്നുകളില്‍ പങ്കെടുത്തു. ഇന്ത്യാഗേറ്റ് മുറിച്ചുകടക്കാനുള്ള അപൂര്‍വാവസരം ലഭിച്ചു. ഒരിക്കലും കയറാനാവുമെന്ന് കരുതിയിട്ടില്ലാത്ത പാര്‍ലമെന്‍റിന്‍േറയും രാഷ്ട്രപതിഭവന്‍െറയും അകത്തുകയറാനായി. സ്പീക്കറില്‍നിന്ന് ഉപഹാരവും സ്വീകരിച്ചു.
വളര്‍ന്നതിനു ശേഷം മികച്ച പ്രകടനം കാഴ്ചവെക്കുന്നവര്‍ക്ക് എന്ത് സഹായവും ചെയ്യുകയെന്നതാണ് നമ്മുടെ രാജ്യത്തെ പൊതുരീതി. എന്നാല്‍ കഴിവുള്ളവരെ വളര്‍ത്തിക്കൊണ്ടുവരുന്നതിലാണ് ശ്രദ്ധിക്കേണ്ടത്. കഴിവുണ്ടായിട്ടും ഉചിതമായ സമയത്ത് ആവശ്യമായ പരിശീലനം കിട്ടാത്തതിനാല്‍ അവസരം ലഭിക്കാതെ പോകുന്നവരുണ്ട്. 20 കിലോമീറ്റര്‍ നടന്നിട്ടും വിയര്‍ക്കാതിരുന്നയാള്‍ നാട്ടുകാര്‍ നല്‍കിയ ഗംഭീരസ്വീകരണത്തില്‍ അക്ഷരാര്‍ഥത്തില്‍ വിയര്‍ത്തതായും ഇര്‍ഫാന്‍ പറഞ്ഞു. പി.കെ. ബഷീര്‍ എം.എല്‍.എ മുന്‍കൈയെടുത്ത് 20 ലക്ഷത്തിന്‍െറ വീട് നിര്‍മിച്ചുതരുമെന്ന പ്രഖ്യാപനത്തിനും വിവിധ കോണുകളില്‍നിന്നുള്ള സഹായത്തിനും ഇര്‍ഫാന്‍ നന്ദി പറഞ്ഞു.