നാഷനല്‍ കൗണ്‍സില്‍ ഓഫ് എജുക്കേഷന്‍ റിസര്‍ച്ച് ആന്‍ഡ് ട്രെയ്നിങ് (എന്‍.സി.ഇ.ആര്‍.ടി) ഈ അധ്യയനവര്‍ഷത്തെ പ്രതിഭാനിര്‍ണയ പരീക്ഷക്ക് പത്താംതരത്തില്‍ പഠിക്കുന്ന മിടുക്കരായ വിദ്യാര്‍ഥികളില്‍നിന്ന് അപേക്ഷ ക്ഷണിച്ചു. അപേക്ഷിക്കേണ്ട അവസാന തീയതി ആഗസ്റ്റ് 31. ഇതാദ്യമായാണ് പത്താംതരത്തിലുള്ളവര്‍ക്കായി പ്രതിഭാനിര്‍ണയ പരീക്ഷ നടത്തുന്നത്. കഴിഞ്ഞ വര്‍ഷം വരെ എട്ടാം തരത്തില്‍ പഠിക്കുന്നവര്‍ക്കായിരുന്നു ഈ പരീക്ഷ നടത്തിയിരുന്നത്.
പത്താം തരത്തിനുശേഷം ഗവേഷണ (പിഎച്ച്.ഡി) പഠനം വരെ സ്കോളര്‍ഷിപ് നല്‍കി മിടുക്കരായ വിദ്യാര്‍ഥികളെ പ്രോത്സാഹിപ്പിക്കുകയാണ് പദ്ധതിയുടെ ലക്ഷ്യം. പ്രഫഷനല്‍ കോഴ്സുകളായ എന്‍ജിനീയറിങ,് മെഡിസിന്‍, നിയമം, മാനേജ്മെന്‍റ് തുടങ്ങി സാമൂഹികശാസ്ത്ര പഠനത്തിനും കോമേഴ്സ് ഉപരിപഠനത്തിനും സ്കോളര്‍ഷിപ് ലഭിക്കും.
രണ്ടു ഘട്ടങ്ങളിലായാണ് പരീക്ഷ നടത്തുക. സംസ്ഥാനതലത്തില്‍ നടക്കുന്ന ആദ്യഘട്ട പരീക്ഷ കേരളത്തില്‍ 2012 നവംബര്‍ 18നാണ്. ആദ്യഘട്ടത്തില്‍ മെന്‍റല്‍ എബിലിറ്റി ടെസ്റ്റ് (മാറ്റ്), സ്കൊളാസ്റ്റിക് ആപ്റ്റിറ്റ്യൂഡ് ടെസ്റ്റ് (സാറ്റ്) എന്നിവയാണ് നടക്കുക. ഇതില്‍ യോഗ്യത നേടിയവര്‍ക്ക് ദേശീയതലത്തില്‍ 2013 മേയ് 12ന് നടക്കുന്ന രണ്ടാംഘട്ട പരീക്ഷയില്‍ പങ്കെടുക്കാം.
എന്‍.സി.ഇ.ആര്‍.ടിയുടെ വെബ്സൈറ്റില്‍ (www.ncert.nic.in) പ്രസിദ്ധീകരിച്ച ലൈസണ്‍ ഓഫിസുകള്‍ വഴിയോ വെബ്സൈറ്റില്‍നിന്ന് ഡൗണ്‍ലോഡ് ചെയ്തോ അപേക്ഷ അയക്കാം. പൂരിപ്പിച്ച അപേക്ഷ വിദ്യാര്‍ഥി പഠിക്കുന്ന സ്ഥാപന മേധാവി സാക്ഷ്യപ്പെടുത്തി വെബ്സൈറ്റില്‍ നല്‍കിയ ലൈസണ്‍ ഓഫിസുകളില്‍ സമര്‍പ്പിക്കണം. കേരള ഓഫിസ് വിലാസം: Assistant Professor, S.C.E.R.T, Vidhya Bhavan, Poojappura (P.O.), Thiruvananthapuram-695012, Kerala. ഫോണ്‍: 0471-2341883, 2340323. ഫാക്സ്: 0471-2341869.