ന്യൂയോര്‍ക്: കാല്‍മുട്ടിനേറ്റ പരിക്കിനെത്തുടര്‍ന്ന് സ്പെയിനിന്‍െറ റാഫേല്‍ നദാല്‍ യു.എസ് ഓപ്പണില്‍നിന്ന് പിന്മാറി. വിംബ്ള്‍ഡണില്‍ അപ്രതീക്ഷിത തോല്‍വിയേറ്റ നദാലിന്‍െറ പിന്മാറ്റം ടെന്നിസ് ആരാധകരെ അമ്പരപ്പിച്ചു. ലോക മൂന്നാം റാങ്കുകാരനായ നദാല്‍ പരിക്കുകാരണം ലണ്ടന്‍ ഒളിമ്പിക്സിലും പങ്കെടുത്തിരുന്നില്ല. യു.എസ് ഓപ്പണില്‍ പങ്കെടുക്കുന്നില്ലെന്ന് അറിയിക്കുന്നതില്‍ ഖേദമുണ്ടെന്ന് നദാല്‍ ട്വിറ്ററിലൂടെ ആരാധകരോട് പറഞ്ഞു.
കൂടക്കൂടെ അലട്ടുന്ന പരിക്ക് 26കാരനായ താരത്തിന്‍െറ ഭാവിയെപ്പറ്റി ആശങ്കയുളവാക്കുന്നതാണ്. ഫ്രഞ്ച് ഓപ്പണിലെ ഏഴെണ്ണമുള്‍പ്പെടെ 11 ഗ്രാന്‍റ്സ്ളാം കിരീടങ്ങള്‍ നദാല്‍ സ്വന്തമാക്കിയിട്ടുണ്ട്. 2009ലും കാല്‍മുട്ടിന്‍െറ പരിക്കിനെത്തുടര്‍ന്ന് നദാലിന് വിംബിള്‍ഡണില്‍ പങ്കെടുക്കാനായിരുന്നില്ല. പിന്നീട് തിരിച്ചുവരവ് നടത്തിയ നദാല്‍ തുടര്‍ച്ചയായി വിജയക്കൊടി പാറിക്കുകയായിരുന്നു.
നദാലിന്‍െറ പിന്മാറ്റത്തോടെ, നിലവിലെ ചാമ്പ്യന്‍ നൊവാക് ദ്യോക്യോവിച്ച്, അഞ്ചു തവണ യു.എസ് ഓപണ്‍ ജേതാവും ടോപ് റാങ്കുകാരനുമായ റോജര്‍ ഫെഡറര്‍, ഒളിമ്പിക്സിലെ സ്വര്‍ണ മെഡല്‍ ജേതാവ് ആന്‍ഡി മുറെ എന്നിവരാണ് യു.എസ് ഓപ്പണില്‍ പങ്കെടുക്കുന്ന പ്രമുഖര്‍. കഴിഞ്ഞ വര്‍ഷത്തെ യു.എസ് ഓപ്പണ്‍ ഫൈനലില്‍ നദാലിനെ തോല്‍പിച്ചാണ് ദ്യോകോവിച്ച് കിരീടം നേടിയത്.
ജൂണില്‍ നടന്ന വിംബ്ള്‍ഡണ്‍ മത്സരത്തില്‍ 100ാം റാങ്കുകാരനായ ലൂക്കാസ് റെസോളാണ് നദാലിനെ അട്ടിമറിച്ചത്. അതിനുശേഷം ടെന്നിസില്‍നിന്ന് വിട്ടുനില്‍ക്കുകയാണ് നദാല്‍. സ്പെയിനില്‍ ദ്യോകോവിച്ചുമായി നടക്കേണ്ടിയിരുന്ന ചാരിറ്റി മത്സരവും അദ്ദേഹം ഉപേക്ഷിച്ചു.
നദാലിന്‍െറ പിന്മാറ്റം യു.എസ് ഓപ്പണ്‍ ടൂര്‍ണമെന്‍റ് ഡയറക്ടര്‍ ഡേവിഡ് ബ്ര്യൂവറും സ്ഥിരീകരിച്ചു. ആഗസ്റ്റ് 27നാണ് യു.എസ് ഓപ്പണ്‍ തുടങ്ങുന്നത്.