കുവൈത്ത് സിറ്റി: ചെറിയ പെരുന്നാള്‍ പ്രമാണിച്ച് രാജ്യത്തെ സര്‍ക്കാര്‍ സ്ഥാപനങ്ങള്‍ക്കും ഓഫീസുകള്‍ക്കും മൂന്ന് ദിവസം അവധി പ്രഖ്യാപിച്ചുകൊണ്ട് സിവില്‍ സര്‍വ്വീസ് കമ്മീഷന്‍ ഉത്തരവായി.
പെരുന്നാള്‍ ശനി, ഞായര്‍ എന്നിവയില്‍ ഏതുദിവസം ആയാലും ഞായറാഴ്ച തുടങ്ങുന്ന അവധി ഈമാസം 21 ചൊവ്വാഴ്ചയോടെ അവസാനിക്കുമെന്നും 22ന് ബുധനാഴ്ച പ്രവര്‍ത്തി ദിനമായിരിക്കുമെന്നും കമ്മീഷന്‍ അറിയിച്ചു.
മന്ത്രിസഭ യോഗത്തിന്‍െറ തീരുമാനമനുസരിച്ചാണ് സിവില്‍ സര്‍വ്വീസ് കമ്മീഷന്‍ പെരുന്നാള്‍ അവധി പ്രഖ്യാപിച്ചിരിക്കുന്നത്. ഇതനുസരിച്ച് 17ന് തുടങ്ങുന്ന വാരാന്ത്യ അവധി ഉള്‍പ്പെടെ ഉദ്യോഗസ്ഥര്‍ക്ക് അഞ്ചുദിവസം തുടര്‍ച്ചയായി ഒഴിവ് ലഭിക്കും. അതിനിടെ, പെരുന്നാള്‍ അവധി കഴിഞ്ഞുള്ള 21,22 ദിവസങ്ങളില്‍ ലീവെടുക്കുന്നതില്‍നിന്ന് ഉദ്യോഗസ്ഥര്‍ വിട്ടുനില്‍ക്കണമെന്ന് ബന്ധപ്പെട്ടവര്‍ അറിയിച്ചു. ഈ രണ്ട് ദിവസങ്ങളില്‍ അവധിയെടുക്കുന്നത് പ്രത്യേകം നിരീക്ഷിക്കുമെന്നും കമ്മീഷന്‍ പുറത്തിറക്കിയ പത്രക്കുറിപ്പില്‍ കൂട്ടിച്ചേര്‍ത്തു.