ലണ്ടന്‍: വനിതാ സ്പ്രിന്‍റിലെ വീറുറ്റ പോരാട്ടം 4X100 മീറ്റര്‍ റിലേയിലും ആവര്‍ത്തിച്ച അമേരിക്ക 27 വര്‍ഷം പഴക്കമുള്ള ലോക റെക്കോഡ് തിരുത്തിയെഴുതി ഈയിനത്തില്‍ സ്വര്‍ണം നേടി. 40.82 സെക്കന്‍ഡില്‍ ഓടിയെത്തിയാണ് ബദ്ധവൈരികളായ ജമൈക്കയുടെ സുവര്‍ണമോഹങ്ങളെ ടിയാന മാഡിസണ്‍, അലൈസണ്‍ ഫെലിക്സ്, ബിയാന്‍കാ നൈറ്റ്, കാര്‍മലിറ്റാ ജെറ്റര്‍ എന്നിവര്‍ ഉള്‍പ്പെട്ട അമേരിക്കന്‍ ടീം രണ്ടാം സ്ഥാനത്തേക്ക് പിന്തള്ളിയത്. പുതിയ ദേശീയ റെക്കോഡായ 41.41 സെക്കന്‍ഡില്‍ ഓടിയെത്തിയിട്ടും അമേരിക്കക്ക് ഏറെ പിന്നില്‍ ഫിനിഷ് ചെയ്യാനേ ജമൈക്കക്ക് കഴിഞ്ഞുള്ളൂ. ഷെല്ലി ആന്‍ ഫ്രേസര്‍, ഷെറോണ്‍ സിംപ്സണ്‍, വെറോണികാ കാംപ്ബെല്‍ ബ്രൗണ്‍, കെറോണ്‍ സ്റ്റിവാര്‍ട്ട് എന്നിവരാണ് കരീബിയന്‍ സംഘത്തിനുവേണ്ടി ബാറ്റണേന്തിയത്.
1985ല്‍ പശ്ചിമ ജര്‍മനി സ്ഥാപിച്ച 41.37 സെക്കന്‍ഡിന്‍െറ റെക്കോഡാണ് ലണ്ടനിലെ ഒളിമ്പിക് സ്റ്റേഡിയത്തില്‍ തകര്‍ന്നു വീണത്. 42.04 സെക്കന്‍ഡില്‍ ദേശീയ റെക്കോഡിനെ വെല്ലുന്ന പ്രകടനം പുറത്തെടുത്ത് യുക്രെയ്ന്‍ വെങ്കലം നേടി.