ലണ്ടന്‍: 400 മീറ്റര്‍ ഓട്ടത്തില്‍ ലോക ചാമ്പ്യന്‍ കിരാനി ജെയിംസിന്‍െറ വിജയഗാഥ. ഒളിമ്പിക്സില്‍ മൂന്നു പതിറ്റാണ്ടുകാലം അമേരിക്കക്കാര്‍ കുത്തകയാക്കിയ ഇനത്തില്‍ 43.94 സെക്കന്‍ഡില്‍ ഫിനിഷ് ചെയ്ത് സ്വര്‍ണം നേടിയ 19കാരന്‍ കരീബിയന്‍ രാജ്യമായ ഗ്രാനഡക്ക് ചരിത്രത്തിലെ ആദ്യ ഒളിമ്പിക് മെഡല്‍ വാങ്ങിക്കൊടുത്തു. തുടര്‍ന്നുള്ള സ്ഥാനങ്ങളിലെത്തിയ ഡൊമിനിക്കന്‍ റിപ്പബ്ളിക്കിന്‍െറ ലുഗുവെലിന്‍ സാന്‍റോസിനും (44.46) ട്രിനിഡാഡ്-ടുബേഗോയുടെ ലാലോന്‍ഡെ ഗോര്‍ഡനും (44.52) കിരാനിക്ക് കാര്യമായി വെല്ലുവിളി ഉയര്‍ത്താനായില്ല.
400 മീറ്റര്‍ 44 സെക്കന്‍ഡില്‍ താഴെ പൂര്‍ത്തിയാക്കുന്ന ആദ്യത്തെ അമേരിക്കക്കാരനല്ലാത്ത അത്ലറ്റാണ് കിരാനി. 1999ല്‍ യു.എസ് താരം മൈക്കല്‍ ജോണ്‍സണ്‍ കുറിച്ച 43.18 സെക്കന്‍ഡാണ് ഈ ഇനത്തില്‍ ലോക റെക്കോഡ്. 44.60ല്‍ ഫിനിഷ് ചെയ്ത് 2011ലെ ദേഗു ലോക ചാമ്പ്യന്‍ഷിപ്പില്‍ ഒന്നാമനായ ഗ്രാനഡക്കാരന്‍ തിങ്കളാഴ്ച വൈകീട്ട് ഒളിമ്പിക് സ്റ്റേഡിയത്തില്‍ സ്വന്തം പേരിലേക്ക് എഴുതിച്ചേര്‍ത്തത് കരീബിയന്‍ റെക്കോഡ് കൂടിയാണ്.
ലോകത്തെ ഏറ്റവും വേഗമേറിയ മനുഷ്യനായി അറിയപ്പെടുന്ന ജമൈക്കന്‍ താരം ഉസൈന്‍ ബോള്‍ട്ടിനേക്കാള്‍ കേമന്‍ പ്രകടനമാണ് 400 മീറ്ററില്‍ കിരാനിയുടെത്. 16ാം വയസ്സില്‍ 45.35 സെക്കന്‍ഡിലാണ് ബോള്‍ട്ട് ഈ ദൂരം ഓടിയതെങ്കില്‍ ഇതേ പ്രായക്കാരനായിരിക്കെ 45.24ല്‍ പൂര്‍ത്തിയാക്കാന്‍ അദ്ദേഹത്തിന് കഴിഞ്ഞിരുന്നു. 400 മീറ്ററില്‍ 13, 14, 15 വയസ്സിലുള്ളവരുടെ ലോക റെക്കോഡും മറ്റാരുടെയും പേരിലല്ല.
ലോക യൂത്ത് ചാമ്പ്യന്‍ഷിപ്പില്‍ 200, 400 മീറ്ററുകളില്‍ സ്വര്‍ണം നേടിയിട്ടുണ്ടെങ്കിലും 200ലേക്ക് മാറാന്‍ പരിപാടിയില്ലെന്ന് അലബാമ സര്‍വകലാശാല വിദ്യാര്‍ഥിയായ കിരാനി പറഞ്ഞു. 400 ലെ തന്‍െറ റെക്കോഡ് തകര്‍ക്കാന്‍ ഏറ്റവും സാധ്യത ഈ യുവാവിനുതന്നെയാണെന്നാണ് ജോണ്‍സന്‍െറ പക്ഷം. ആദ്യ ഒളിമ്പിക് മെഡല്‍, അതും സ്വര്‍ണത്തിന്‍െറ രൂപത്തില്‍ ലഭിച്ചതോടെ ഒരു ലക്ഷത്തിനു മുകളില്‍ മാത്രം ജനസംഖ്യയുള്ള ഗ്രാനഡ ആഘോഷത്തിലാണ്. കിരാനി രാജ്യത്തിന്‍െറ അഭിമാനമുയര്‍ത്തിയതില്‍ താന്‍ അതീവ സന്തോഷവാനാണെന്ന് മത്സ്യത്തൊഴിലാളിയായ പിതാവ് ജെയിംസ് പറഞ്ഞു.