ലണ്ടന്‍: പുരുഷ ട്രിപ്പ്ള്‍ ജമ്പില്‍ ഇന്ത്യയുടെ ഏകപ്രതിനിധിയായിരുന്ന മലയാളി താരം രഞ്ജിത് മഹേശ്വരി യോഗ്യതാ റൗണ്ടില്‍ പുറത്ത്. ആദ്യ മൂന്ന് ശ്രമങ്ങളും ഫൗളായതിനെത്തുടര്‍ന്നാണ് കോട്ടയത്തുകാരന് പിന്‍വാങ്ങേണ്ടി വന്നത്. ഒരു ചാട്ടം പോലും ശരിയായി എടുക്കാനാവാത്ത ഏക മത്സരാര്‍ഥിയായ രഞ്ജിത് യോഗ്യതാ റൗണ്ടില്‍ അവസാനസ്ഥാനക്കാരനായി.
ഇന്ത്യന്‍ സമയം ചൊവ്വാഴ്ച വൈകുന്നേരം 3.30ഓടെ ഫീല്‍ഡിലിറങ്ങിയ 26കാരന് ഫൈനല്‍ പ്രവേശത്തിന് 17 മീറ്റര്‍ മാര്‍ക്ക് പിന്നിടുക ആവശ്യമായിരുന്നു. എന്നാല്‍, ആദ്യ ശ്രമത്തില്‍ ഫൗളായി തിരിച്ചുവരുന്നതാണ് കണ്ടത്. ഇതാവര്‍ത്തിച്ചതോടെ മൂന്നാം ശ്രമം വിധി നിര്‍ണയത്തിന്‍െറതായി. 17.1 മീറ്റര്‍ ചാടേണ്ടിയിരുന്ന രഞ്ജിത്തിന് പക്ഷേ ചാട്ടം എടുക്കാനാവാതെ നോ മാര്‍ക്കായി ഫിനിഷ് ചെയ്യേണ്ടി വന്നു. 27 പേര്‍പങ്കെടുത്ത യോഗ്യതാ റൗണ്ടില്‍ 12 പേര്‍ക്കായിരുന്നു ഫൈനല്‍ പ്രവേശം. രഞ്ജിത്ത് മത്സരിച്ച ഗ്രൂപ് എയില്‍ 17.06 മീറ്റര്‍ ചാടി ഫ്രാന്‍സിന്‍െറ ബെഞ്ചമിന്‍ കംപോര്‍ ഒന്നാമനായി. ഗ്രൂപ് ബിയില്‍ 17.21 മീറ്ററുമായി അമേരിക്കക്കാരന്‍ ക്രിസ്റ്റ്യന്‍ ടെയ്ലറാണ് മുന്നിലെത്തിയത്.
2010ലെ കോമണ്‍വെല്‍ത്ത് ഗെയിംസില്‍ 17.07 മീറ്റര്‍ ചാടി ദേശീയ റെക്കോഡോടെയാണ് രഞ്ജിത് വെങ്കലം നേടിയത്. ഒളിമ്പിക്സില്‍ ഈ പ്രകടനം ആവര്‍ത്തിച്ചാല്‍ ഫൈനലില്‍ കടക്കാന്‍ കഴിയുമായിരുന്നെങ്കിലും സംഭവിച്ചത് മറ്റൊന്ന്. വെള്ളിയാഴ്ച വനിതാ വിഭാഗത്തില്‍ മലയാളി താരം മയൂഖാ ജോണി ട്രിപ്പ്ള്‍ ജമ്പില്‍ പങ്കെടുത്തിരുന്നു. എന്നാല്‍ 22ാമതായി ഫിനിഷ് ചെയ്ത അവര്‍ക്കും ഫൈനലിലെത്താനായില്ല. ആദ്യ ശ്രമത്തിലെ 13.77 മീറ്ററായിരുന്നു മയൂഖയുടെ മികച്ച ദൂരം.