മുംബൈ: സാമ്പത്തിക വളര്‍ച്ച ലക്ഷ്യമിട്ട് ധന മന്ത്രി പി. ചിദംബരം നടപ്പാക്കുമെന്ന് പ്രതീക്ഷിക്കുന്ന പരിഷ്കരണ നടപടികളുടെയും പലിശ കുറക്കുമെന്ന പ്രതീക്ഷകളുടെയും ചുവട് പിടിച്ച് ഓഹരി വിപണിയില്‍ മുന്നേറ്റം. 188.82 പോയന്‍റുയര്‍ന്ന മുംബൈ ഓഹരി സൂചിക ഒരുമാസത്തെ ഏറ്റവും ഉയര്‍ന്ന നിലവാരത്തിലെത്തി. 17601.78 പോയന്‍റിലാണ് സെന്‍സെക്സ് ചൊവ്വാഴ്ച വ്യാപാരമവസാനിപ്പിച്ചത്. ദേശീയ ഓഹരി വിപണിയിലും ഉണര്‍വ് പ്രകടമായിരുന്നു. നിഫ്റ്റി 54.15 പോയന്‍റുയര്‍ന്ന് 5336.70ലാണ് വ്യാപാരമവസാനിപ്പിച്ചത്. ഓട്ടോ, റിയല്‍റ്റി, ബാങ്കിങ് മേഖലകളിലെ ഓഹരികള്‍ നിക്ഷേപകര്‍ വാങ്ങിക്കൂട്ടിയതാണ് ബി.എസ്.ഇ സൂചികക്ക് കരുത്ത് നല്‍കിയത്. സെന്‍സെക്സ് ഒരു ഘട്ടത്തില്‍ 17641.55 പോയന്‍റ് വരെയുയര്‍ന്നിരുന്നു. നാല് മാസത്തിനിടെയുണ്ടായ ഏറ്റവും ഉയര്‍ന്ന നിലവാരമാണിത്. ഐ.സി.ഐ.സി.ഐ ബാങ്ക്, ടാറ്റ മോട്ടോഴ്സ്, ടി.സി.എസ്, എച്ച്.ഡി.എഫ്.സി, എസ്.ബി.ഐ, എല്‍ ആന്‍ഡ് ടി, ബജാജ് ഓട്ടോ എന്നിവ നേട്ടമുണ്ടാക്കിയ ഓഹരികളാണ്. അതേസമയം, ഹീറോ മോട്ടോ, ഭാരതി എയര്‍ടെല്‍, സണ്‍ ഫാര്‍മ, ആര്‍.ഐ.എല്‍ തുടങ്ങിയവയുടെ വിലയിടിഞ്ഞു. മറ്റു ഏഷ്യന്‍ വിപണികളിലും ഉണര്‍വ് പ്രകടമായിരുന്നു.