മനാമ: ഇസാ ടൗണിലെ കത്തി നശിച്ച മാര്‍ക്കറ്റ് എത്രയും വേഗം പുനര്‍ നിര്‍മിക്കാനും അവിടെ സുരക്ഷാ നടപടികള്‍ സ്വീകരിക്കാനും പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ഖലീഫ നിര്‍ദേശിച്ചു. നിലവിലുള്ള വ്യാപാരികള്‍ക്കാണ് പുതുതായി പണിയുന്ന മാര്‍ക്കറ്റില്‍ മുന്‍ഗണ നല്‍കേണ്ടതെന്നും അദ്ദേഹം ആവശ്യപ്പെട്ടു. ഗുദൈബിയ പാലസില്‍ തന്നെ സന്ദര്‍ശിക്കാന്‍ എത്തിയ വ്യാപാരികളെയും അദ്നാന്‍ മാലികി എം.പി, ഇസാടൗണ്‍ ഖാദിയും സെന്‍ട്രല്‍ ഗവര്‍ണറേറ്റ് മുനിസിപ്പല്‍ കൗണ്‍സില്‍ ഡപ്യൂട്ടി ചെയര്‍മാനുമായ യൂസുഫ് അല്‍ സബ്ബാഗ് എന്നിവരെയും സ്വീകരിച്ച് സംസാരിക്കുകയായിരുന്നു അദ്ദേഹം.
ഇസാ ടൗണ്‍ മാര്‍ക്കറ്റ് പരമ്പരാഗത ശേഷിപ്പാണെന്നും നിരവധി വ്യാപാരികളുടെ വരുമാന മാര്‍ഗമാണെന്നും പ്രധാനമന്ത്രി അഭിപ്രായപ്പെട്ടു. അതുകൊണ്ടുതന്നെ വ്യാപാരികളെ സഹായിക്കുകയെന്നത് ഭരണകൂടത്തിന്‍െറ ബാധ്യതയാണ്. തീപിടിത്തമുണ്ടായപ്പോള്‍ എല്ലാ ഭാഗത്തുനിന്നും സര്‍ക്കാരിനുണ്ടായ സഹകരണത്തെ അദ്ദേഹം നന്ദി പ്രശംസിച്ചു. ഇസാ ടൗണ്‍ മാര്‍ക്കറ്റ് സന്ദര്‍ശിക്കുകയും ആവശ്യമായ സഹായങ്ങള്‍ ചെയ്യുകയും ചെയ്ത പ്രധാനമന്ത്രിക്ക് വ്യാപാരികള്‍ നന്ദി പ്രകാശിപ്പിച്ചു.