ലണ്ടന്‍: പുരുഷന്മാര്‍ക്ക് പിന്നാലെ വനിതകള്‍ക്കും ഉന്നംപിഴച്ച ഒളിമ്പിക്സ് അമ്പെയ്ത്തില്‍ ഇന്ത്യക്ക് തിരിച്ചടി. ടീമിനത്തിലെ ആവേശകരമായ പോരാട്ടത്തില്‍ ഒരു പോയന്‍റിന്‍െറ വ്യത്യാസത്തിന് ഡെന്മാര്‍ക്കാണ് ദീപിക കുമാരിയെയും സംഘത്തെയും കീഴടക്കിയത്. പോയന്‍റ്. 210-211.
ലോര്‍ഡ്സ് ക്രിക്കറ്റ് ഗ്രൗണ്ടില്‍ ലോക ഒന്നാംനമ്പര്‍ താരം ദീപിക കുമാരിയുടെ നേതൃത്വത്തില്‍ ബൊംബെയ്ല ദേവി, ചെക്രവൊലു സ്യുരോ എന്നിവരാണ് ഇന്ത്യക്കു വേണ്ടി വില്ലുകുലച്ചത്. ലൂയിസ് ലോര്‍സെന്‍, മജ ജാഗര്‍, കരീന ക്രിസ്റ്റ്യന്‍സെന്‍ എന്നിവരടങ്ങിയ ഡാനിഷ് ടീം നിര്‍ണായകഘട്ടത്തില്‍ മികച്ചലക്ഷ്യങ്ങള്‍ കണ്ടാണ് ഇന്ത്യന്‍ ടീമിനെ മറികടന്നത്. കൃത്യമായ ലക്ഷ്യത്തില്‍ അമ്പെയ്ത് 10 പോയന്‍റും നേടുന്നതില്‍ ഇന്ത്യന്‍ വനിതകളാണ് മുന്നിട്ടുനിന്നത്. എന്നാല്‍, ഉദ്വേഗമുറ്റിനിന്ന അവസാന നിമിഷങ്ങളിലെ സമ്മര്‍ദം അതിജയിക്കാനാവാതെ പോയത് വിനയായി. ഒന്നാം നമ്പര്‍ താരമായ ദീപികയുടെ മോശം ഫോമും തിരിച്ചടിയായി. ആദ്യത്തെയും അവസാനത്തെയും സെറ്റുകള്‍ ഇന്ത്യയാണ് ജയിച്ചത്. എന്നാല്‍, മൊത്തം ലീഡ് നിലനിര്‍ത്തി ഡെന്മാര്‍ക്ക് വനിതകള്‍ വിജയതീരമണിഞ്ഞു. ബൊംബെയ്ലയുടെ പ്രകടനമാണ് അവസാനം വരെ ഇന്ത്യക്ക് പ്രതീക്ഷ നല്‍കിയത്. ബൊംബെയ്ല തുടര്‍ച്ചയായി മൂന്നുവട്ടം മുഴുവന്‍ പോയന്‍റും നേടി. എന്നാല്‍, സ്യുരോ എയ്ത അമ്പുകള്‍ അഞ്ചും ആറും പോയന്‍റ് മാത്രമേ ഇന്ത്യന്‍ സ്കോര്‍ ബോര്‍ഡില്‍ എത്തിച്ചുള്ളൂ. ഇതോടെ പ്രതീക്ഷയുണ്ടായിരുന്ന ഇനമായ അമ്പെയ്ത്തും നിരാശ സമ്മാനിച്ചു.