ദുബൈ: റദാനില്‍ രാജ്യത്ത് നടപ്പാക്കുന്ന പ്രധാന ജീവകാരുണ്യ പദ്ധതികളില്‍ ഒന്നാമത്തേതായ ‘അനാഥകള്‍ക്കായി കുടുംബ ഗ്രാമ’ത്തിന് യു.എ.ഇ വൈസ് പ്രസിഡന്‍റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാശിദ് ആല്‍ മക്തൂം തുടക്കമിട്ടു.
റമദാനില്‍ നടത്തേണ്ട ജീവകാരുണ്യ പദ്ധതികള്‍ സംബന്ധിച്ച് ശൈഖ് മുഹമ്മദ് പൊതുജനങ്ങളില്‍ നിന്ന് നിര്‍ദേശം ക്ഷണിച്ചിരുന്നു. ഇത്തരത്തില്‍ ലഭിച്ച ആയിരക്കണക്കിന് അഭിപ്രായങ്ങളില്‍ നിന്ന് തെരഞ്ഞെടുത്ത ‘അനാഥകള്‍ക്കായി കുടുംബ ഗ്രാമം’ പദ്ധതിയാണ് ആദ്യമായി നടപ്പാക്കുന്നത്. എമിറേറ്റ്സ് ടവറില്‍ നടന്ന ചടങ്ങില്‍ കിരീടാവകാശിയും ദുബൈ എക്സിക്യൂട്ടീവ് കൗണ്‍സില്‍ ചെയര്‍മാനുമായ ശൈഖ് ഹംദാന്‍ ബിന്‍ മുഹമ്മദ് ബിന്‍ റാശിദ് ആല്‍ മക്തൂം, ഉപഭരണാധികാരി ശൈഖ് മക്തൂം ബിന്‍ മുഹമ്മദ് ബിന്‍ റാശിദ് ആല്‍ മക്തൂം എന്നിവര്‍ പങ്കെടുത്തു.
രാജ്യത്തെ അനാഥ കുട്ടികള്‍ക്ക് കുടുംബാന്തരീക്ഷത്തില്‍ വളരാന്‍ അവസരമൊരുക്കുകയാണ് പദ്ധതിയുടെ ലക്ഷ്യം.