ന്യൂദല്‍ഹി: ഇന്ത്യ-പാകിസ്താന്‍ ക്രിക്കറ്റ് ബന്ധം പുന$സ്ഥാപിക്കാനുള്ള ബി.സി.സി.ഐ തീരുമാനത്തോട് സമ്മിശ്ര പ്രതികരണം. മുന്‍ ഇന്ത്യന്‍ ക്യാപ്റ്റന്‍ സുനില്‍ ഗവാസ്കര്‍ ശക്തമായ വിമര്‍ശവുമായി രംഗത്തെത്തിയപ്പോള്‍ മറ്റൊരു ഇന്ത്യന്‍ താരം ബിഷന്‍ സിങ് ബേദി സ്വാഗതം ചെയ്തു. മുംബൈ ഭീകരാക്രമണവുമായി ബന്ധപ്പെട്ട് അന്വേഷണത്തില്‍ സഹകരിക്കാത്ത പശ്ചാത്തലത്തില്‍ പാകിസ്താനുമായുള്ള ക്രിക്കറ്റ് സൗഹൃദം പുന$സ്ഥാപിക്കേണ്ടിയിരുന്നില്ലെന്ന് ഗവാസ്കര്‍ പറഞ്ഞു. ഇംഗ്ളണ്ട് പരമ്പരക്കിടയില്‍ ഇത്തരമൊരു മത്സരം കളിക്കാര്‍ക്കും ഉചിതമാവില്ലെന്ന് ഗവാസ്കര്‍ കുറ്റപ്പെടുത്തി. മുന്‍ പാകിസ്താന്‍ ക്യാപ്റ്റന്‍ സഹീര്‍ അബ്ബാസ് തീരുമാനത്തെ സ്വാഗതം ചെയ്തു.
ഇരു രാഷ്ട്രങ്ങള്‍ക്കുമിടയിലെ സൗഹൃദം വളര്‍ത്താന്‍ ക്രിക്കറ്റ് ബന്ധം പുന$സ്ഥാപിക്കുന്നതോടെ കഴിയുമെന്ന് അദ്ദേഹം പറഞ്ഞു. ഇന്ത്യയില്‍ കളിക്കാനെത്തുന്ന പാകിസ്താന്‍ ടീമിനെ ബിഷന്‍ സിങ് ബേദി സ്വാഗതം ചെയ്തു. ബി.സി.സി.ഐയുടെ തീരുമാനം ക്രിക്കറ്റിനും ഗുണകരമാണെന്ന് അദ്ദേഹം വ്യക്തമാക്കി.